ភ្នំពេញ៖ – ចំណេះដឹងបរិស្ថានពិតជាសំខាន់ព្រោះយើងរស់នៅជាប់ជាមួយបរិស្ថានសព្វថ្ងៃ។ ប្រសិនជាយើងគ្មានចំណេះដឹងទាក់ទងនឹងបរិស្ថាន យើងនឹងអាចបំផ្លាញបរិស្ថានដោយខ្លួនឯងពីមួយថ្ងៃទៅមួយថ្ងៃ ហើយយើងនឹងទទួលផលលំបាកពីបរិស្ថានមកវិញថ្ងៃក្រោយ។ នេះបើតាមការលើកឡើងរបស់លោក នៅ ចន្ទសិរីវុឌ្ឍ ជានិស្សិតឆ្នាំទី៤ ផ្នែកនីតិសាស្រ្តនៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច និងជាក្រុមជ័យលាភីលេខ១​ ក្នុងកម្មវិធីជជែកដេញដោលបៃតងវគ្គផ្ដាច់ព្រ័ត្រ គម្រោង Greencap កាលពីថ្ងៃទី២៥ ខែមីនា ឆ្នាំ២០២៣ ក្រោមប្រធានបទ​ «តើប្រទេសកម្ពុជាគួរតែដាក់ចេញបទដ្ឋានយកពន្ធលើការសាយភាយនៃឧស្ម័នកាបូនិកដែរ​ឬទេ?»។

លោក នៅ ចន្ទសិរីវុឌ្ឍ បន្ថែមថា លោកចាប់អារម្មណ៍ចូលរួមកម្មវិធីប្រកួតជជែកដេញដោលបៃតងនេះ ដោយសារមានការណែនាំពីសិស្សច្បងដែលធ្លាប់ជាម្ចាស់ជ័យលាភីលេខ១។ លើសពីនេះ ប្រធានបទក្នុងកម្មវិធីថ្មីបានបង្ហាញពីដំណោះស្រាយក្នុងការកាត់បន្ថយឧស្ម័នកាបូនិចនៅក្នុងប្រទេសកម្ពុជា ព្រមទាំងពាក់ព័ន្ធជាមួយបរិស្ថានផងដែរ។

ម្ចាស់ជ័យលាភីឆ្នើមរូបនេះ បន្ថែមថា នៅប្រទេសកម្ពុជាក៏មានការបំភាយឧស្ម័នកាបូនិចផងដែរ ប៉ុន្តែដើម្បីបរិស្ថានស្អាតគួរកាត់បន្ថយការប្រើប្រាស់ប្រេងឥន្ធនៈ ដោយអាចប្ដូរមកជិះរថយន្តក្រុង ដើម្បីកុំឱ្យមានការបំភាយឧស្ម័នកាបូនិច និងកាត់បន្ថយការកកស្ទះចរាចរណ៍ផងដែរ។ លើសពីនេះ លោក នៅ ចន្ទសិរីវុឌ្ឍ លើកទឹកចិត្តឱ្យមនុស្សប្រើប្រាស់ថាមពលស្អាតដូចជា ថាមពលសូឡា ជីវម៉ាស ដែលជាថាមពលមួយមិនបង្កឱ្យមានការបំភាយឧស្ម័នកាបូនិចនិងល្អសម្រាប់បរិស្ថានទៅថ្ងៃក្រោយទៀត។

លោក នៅ ចន្ទសិរីវុឌ្ឍ

“ចំណេះដឹងបរិស្ថានពិតជាសំខាន់ដែលយុវជនគួរយកចិត្តទុកដាក់ដើម្បីថែរក្សាបរិស្ថានឱ្យបានល្អទៅថ្ងៃក្រោយ”

កញ្ញា ហួរ សុគន្ធកញ្ញា ជានិស្សិតឆ្នាំទី២ ផ្នែកនីតិសាស្រ្តនៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច និងជាសមាជិកក្រុម  និយាយថា កម្មវិធីប្រកួតជជែកដេញដោលនេះ មានរយៈពេល៦ខែ គឺបានចាប់ផ្ដើមតាំងពីខែតុលា ឆ្នាំ២០២២ រហូតមកដល់តែមីនា ឆ្នាំ២០២៣។ សុគន្ធកញ្ញា បន្តថា បញ្ហាប្រឈមដែលជួបក្នុងការប្រកួត ដោយសារកត្តាពេលវេលា ព្រោះសមាជិកក្រុមមមារញឹកចំពោះការសិក្សារៀងៗខ្លួន និងមានការខ្វែងគំនិតគ្នាច្រើនពេលពិភក្សាគ្នា។ ទោះយ៉ាងនេះក្ដី សុគន្ធកញ្ញា ប្រាប់ថា ក្រុមរបស់គេអាចជំនះបញ្ហាទាំងនេះបាន ដោយសារសមាជិកក្រុមមានការលះបង់រៀងខ្លួន និងពិភាក្សាគ្នាដើម្បីទទួលបានគំនិតល្អរួមមួយ។

កញ្ញា ហួរ សុគន្ធកញ្ញា

“ក្រុមរបស់យើងមិនរំពឹងច្រើនទេនៅវគ្គប្រកួតផ្ដាច់ព្រ័ត្រនេះ ប៉ុន្តែនៅពេលទទួលបានជ័យលាភីល្អនេះយើងសប្បាយចិត្តមែនទែន គឺដូចអ្វីដែលយើងបានខិតខំប្រឹងប្រែងតាំងពីដើម មានអារម្មណ៍ថារំភើប និងសប្បាយចិត្តចំពោះលទ្ធផលដែលយើងទទួលបាន”

ដោយឡែក លោក ហ៊ន ពុទ្ធីវុធ ជានិស្សិតឆ្នាំទី៤ ផ្នែកនីតិសាស្រ្តនៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច និងជាសមាជិកក្រុម បានបន្ថែមថា ចំណុចពិសេសដែលធ្វើឱ្យក្រុម ORCAS អាចទទួលបានជ័យលាភីលេខ១ ក៏ដោយសារ ទី១. ការសាមគ្គីភាពជាក្រុម ទី២. ការស្វែងរកគោលការណ៍រួម និងទី៣. ការមានក្ដីសង្ឃឹម។

ម្ចាស់ជ័យលាភីឆ្នើម លោក ហ៊ន ពុទ្ធីវុធ បន្ថែមថា ការប្រកួតជជែកដេញដោលទាមទារឱ្យមានការសហការ ឬសាមគ្កីភាពនៅក្នុងក្រុមឱ្យបានរលូន បញ្ហានោះគឺថាពិបាកក្នុងការពិភាក្សាគ្នា និងមានគំនិតខ្វែងគ្នា ប៉ុន្តែបញ្ហាដែលអាចជំនះបាន គឺយើងមានសាមគ្គីភាព ដោយសារយើងមានគោលដៅតែមួយនោះគឺដើម្បីយកកិត្តិយសជូនសាលារបស់យើង ។

ជាមួយគ្នានេះដែរ លោក នៅ ចន្ទសិរីវុឌ្ឍ ក៏បានលើកទឹកចិត្តយុវជនទាំងអស់ឱ្យចូលរួមថែរក្សាបរិស្ថាន និងធ្វើយ៉ាងណាឱ្យបរិស្ថានរបស់យើងកាន់តែល្អប្រសើរទៅមុខទៀត។ មិនថាតែការកាត់បន្ថយឧស្ម័នកាបូនិចនោះទេ ការប្រើប្រាស់ប្លាស្ទិក ក៏សុទ្ធសឹងតែជាចំណែកមួយចូលរួមបំផ្លាញបរិស្ថានរបស់យើង អ្វីដែលល្អយើងត្រូវយល់ដឹងអំពីបរិស្ថានឱ្យបានស៊ីជម្រៅ ដើម្បីម្នាក់ៗចូលរួមថែរក្សាបរិស្ថានទៅថ្ងៃក្រោយព្រោះបរិស្ថានគឺជាជីវិតរបស់យើង៕