ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ចិន – កាលពីចុងសប្តាហ៍កន្លងទៅនេះ ឯកឧត្តម សុខ សូកេន សមាជិកគណៈអចិន្រៃ្តយ៍នៃគណៈកម្មាធិការកណ្ដាល ស.ស.យ.ក. ជាប្រធាននាយកដ្ឋានទំនាក់ទំងអន្តរជាតិ និងដៃគូក្រៅប្រទេស នៃ ស.ស.យ.ក. និងជាតំណាង ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានអញ្ជើញដឹកនាំប្រតិភូចូលរួមក្នុងវេទិកាថ្នាក់ដឹកនាំយុវជនអាស៊ីដែលរៀបចំឡើងនៅទីក្រុងក្វាងចូវ សាធារណរដ្ឋប្រជាមានិតចិន ពីថ្ងៃទី២៥-២៦ ខែមីនា ឆ្នាំ២០២៣។
វេទិកានោះ មានវត្តមានចូលរួមពីសំណាក់ថ្នាក់ដឹកនាំជាន់ខ្ពស់ក្នុងរដ្ឋាភិបាលចិន ប្រទេសអាស៊ី អ្នកដឹកនាំវ័យក្មេងគ្រប់វិស័យនៅអាស៊ី និងអ្នកចូលរួមសរុបប្រមាណ៥០០ នាក់។
នាឱកាសនោះដែរ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានថ្លែងសុន្ទរកថា តាមរយៈខ្សែវីដេអូ ដោយបានបង្ហាញពីការចូលរួមយ៉ាងសកម្មរបស់យុវជនកម្ពុជាជាមួយរាជរដ្ឋាភិបាលកម្ពុជា ក្នុងការចូលរួមអភិវឌ្ឍគ្រប់វិស័យ ជាពិសេសតាមរយៈបេសកម្មសប្បុរធម៌ វប្បធម៌ និងសង្គម ដើម្បីបុព្វហេតុរួមនៃជាតិ និងប្រជាជន ក៏ដូចជាការសហការជាមួយនឹងយុវជនចិន និងយុវជនពីបណ្តាប្រទេសអាស៊ី ក្នុងគោលបំណងរក្សាការពារសន្តិភាព និងជំរុញការអភិវឌ្ឍ ដោយឈរលើស្មារតីរួមគ្នាដើម្បីពង្រីកចំណងមិត្តភាព ទំនុកចិត្ត សាមគ្តីភាព ភាតរភាព ការគាំទ្រ និងជួយគ្នាទៅវិញទៅមក។
ក្នុងពិធីបិទនៃវេទិកា ឯកឧត្តម សុខ សូកេន បានថ្លែងសុន្ទកថា និងបានបញ្ជាក់បន្ថែមអំពីឆន្ទៈរបស់ ស.ស.យ.ក. ក្រោមការដឹកនាំរបស់ឯកឧត្តម ហ៊ុន ម៉ានី ក្នុងការសហការជាមួយយុវជននៅអាស៊ី ដើម្បីសម្រេចបាននូវផលប្រយោជន៍រួម ក្នុងការអភិវឌ្ឍសេដ្ឋកិច្ច សង្គម និងវប្បធម៌ ក្នុងតំបន់។
ឯកឧត្តម កឹមរ័ត្ន វិសិដ្ឋ រដ្ឋលេខាធិការនៃទីស្តីការគណៈរដ្ឋមន្រ្តី និងជាប្រធានក្រុមប្រឹក្សាភិបាលវេទិកាសម្ព័ន្ធសង្គមស៊ីវិល ក៏បានចូលរួមថ្លែងសុន្ទរកថាផងដែរ អំពីការយកចិត្តទុកដាក់របស់រាជរដ្ឋាភិបាលកម្ពុជា ក្នុងកិច្ចការបង្កើនភាពអង់អាចដល់យុវជនក្នុងកម្រិតជាតិ និងអន្តរជាតិ។
សូមជម្រាបដែរថា វេទិកានេះត្រូវបានរៀបចំឡើងដោយសមាគមការទូតសាធារណៈចិន (CPDA) មូលនិធិចិនដើម្បីសន្តិភាព និងការអភិវឌ្ឍ (CFPD) រដ្ឋបាលទីក្រុងក្វាងចូវ និងសមាគមថ្នាក់ដឹកនាំយុវជនអាស៊ី ក្នុងគោលបំណងជំរុញការផ្លាស់ប្តូរ និងសហប្រតិបត្តិការរវាងយុវជននៅអាស៊ី៕
