ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ខណៈពិធីបុណ្យចូលឆ្នាំ ប្រពៃណីចិន នឹងប្រព្រឹត្តទៅនៅចុងសប្តាហ៍នេះ ឯកឧត្តម រស់ សុវាចា អគ្គលេខាធិការ និងជាអ្នកនាំពាក្យក្រសួងអប់រំ យុវជន និងកីឡា បានធ្វើការអំពាវនាវ ដល់មាតាបិតា អ្នកអាណាព្យាបាលទាំងអស់ សូមរៀបចំកម្មវិធីគ្រួសារ ដោយកុំឱ្យប៉ះពាល់ដល់ការសិក្សារបស់បុត្រធីតា ហើយជាមួយគ្នានេះ បុគ្គលិកអប់រំ ក៏ត្រូវរៀបចំកម្មវិធីការងារឱ្យមានដំណើរការជាប្រក្រតីផងដែរ។
បើតាមប្រសាសន៍របស់ ឯកឧត្តម រស់ សុវាចា ពិធីបុណ្យចូលឆ្នាំចិន គឺមិនស្ថិតក្នុងប្រតិទិនឈប់សម្រាកការងាររបស់មន្រ្តីរាជការ និយោជិក កម្មករ ប្រចាំឆ្នាំ២០២៣នោះទេ។
ការអំពាវនាវរបស់មន្រ្តីជាន់ខ្ពស់ក្រសួងអប់រំ យុវជន និងកីឡានេះ គឺធ្វើឡើងក្រោយកាលពីឆ្នាំកន្លងមក គេសង្កេតឃើញថា សាលារៀននៅតាមទីប្រជុំជនមួយចំនួនបានអវត្តមានសិស្សមកកាន់សាលារៀន ក្នុងនោះគ្រួសារខ្លះបាននាំកូនៗទៅដើរកម្សាន្ត រហូតខ្លះទៅបរទេសថែមទៀត ដែលធ្វើឱ្យខាតបង់ដល់ការសិក្សារបស់សិស្ស។
ឯកឧត្តម រស់ សុវាចា រំពឹងថា នៅក្នុងឱកាស នៃពិធីបុណ្យចូលឆ្នាំចិនខាងមុខនេះ មាតាបិតា និងអ្នកអាណាព្យាបាលសិស្ស នឹងនាំកូនៗទៅសាលារៀនគ្រប់ៗគ្នាដូចប្រក្រតី ដើម្បីកុំឱ្យពួកគេខាតការសិក្សា ជាបច្ច័យធ្វើឱ្យរៀនមិនទាន់គេ ក៏ដូចជាអាចធ្លាក់មធ្យមភាគជាដើម។
គួរបញ្ជាក់ថា ពិធីបុណ្យចូលឆ្នាំប្រពៃណីជនជាតិចិនសម្រាប់ឆ្នាំ២០២៣នេះ គ្រោងនឹងប្រព្រឹត្តធ្វើចាប់ពីថ្ងៃទី២២, ២៣ និង ២៤ ខែមករា ៕
