សព្វថ្ងៃនេះ បញ្ហានៃការថប់បារម្ភកំពុងក្លាយជារឿងដ៏​គួរ​ឱ្យ​ចាប់អារម្មណ៍ ព្រោះតែ​មនុស្ស​ស្ទើរ​តែជុំវិញពិភពលោក​បាន​​កើត​នូវបញ្ហានេះ តាមរយៈ​ហេតុផល​ផ្សេងៗ។ បញ្ហាថប់បារម្ភ ក៏​ត្រូវ​ចាត់ទុកថា គឺជា​ជំងឺមួយ​ដ៏​គួរ​ឱ្យ​ខ្លាច​មិន​ខុស​ពី​ជំងឺបាក់ទឹកចិត្ត​នោះដែរ។ យ៉ាងណាក៏ដោយ​ជា​ដំណោះស្រាយ អ្នកចិត្តសាស្រ្ត និងអ្នកវិទ្យាសាស្ត្រប្រព័ន្ធប្រសាទជាច្រើនបានរកដំណោះស្រាយតាមរយៈបច្ចេកទេស ការសាកល្បង និងសិក្សាមួយចំនួន ដើម្បីជួយឱ្យ​មនុស្សស្ងប់អារម្មណ៍ជៀស​ចេញពីបញ្ហាថប់បារម្ភនេះ។

ខាងក្រោម​នេះគឺជាវិធីសាស្រ្តមួយចំនួនដែលអាចជួយអ្នកឱ្យស្ងប់អារម្មណ៍៖

១.​​ ការលុបលាងមុខជាមួយទឹកត្រជាក់ ៖ ការលុបមុខ គឺជាវិធីសាស្ត្រដ៏មានប្រសិទ្ធភាពមួយដែលមានតាំងពីសម័យមុន និង ត្រូវបានគេយកមកអនុវត្ត ។ គេសិក្សាឃើញថា វិទ្យាសាស្រ្តនៅពីក្រោយការលុបមុខ គឺជាសកម្មភាពមួយដែលឆ្លុះបញ្ចាំងនៃរាងកាយរបស់មនុស្ស ដោយសារមនុស្សមិនអាចដកដង្ហើមនៅក្រោមទឹក ឬ ពេលដែលទឹកប៉ះនឹងមុខនោះទេ។ ដូចនេះ វាធ្វើឱ្យ​ចង្វាក់បេះដូងថយចុះ ប៉ុន្តែធ្វើឱ្យ​រាងកាយមានអារម្មណ៍សម្រាក ហើយការលាងមុខរបស់អ្នកនឹងជួយឱ្យផ្លូវចិត្តស្ងប់ស្ងាត់ និងកាត់បន្ថយកម្រិតស្ត្រេស។

២. ឥរិយាបថបែបវីរៈបុរស ៖ ដើម្បី​យល់​ពី​ចំណុច​នេះ ក្បាច់នេះគឺដូចជា​ Superman ទ្រូង​ទៅ​មុខដៃ​លើ​ត្រគាក និង មើល​ឡើងលើ។ វាមានប្រយោជន៍ជាពិសេសនៅពេលដែលអារម្មណ៍សុខៗមានការតានតឹង ។ ឥរិយាបថនេះ​គឺជា ​វិធី​ដ៏​ល្អ​ក្នុងការ​ទទួលយក​​អុកស៊ីហ្សែន​កាន់តែច្រើន និង​ ធ្វើឱ្យ​អារម្មណ៍ប្រសើរជាងមុន។

៣. ការដើរលំហែក្នុងទីធ្លាបៃតង ៖ ប្រសិនបើអ្នកមានអារម្មណ៍ថាតានតឹង ភ័យខ្លាច និងឯកកោ នោះការដើរលំហែអាចជារឿងល្អបំផុត ។ អ្នកចិត្តសាស្រ្តជឿថា ការដើរក្នុងទីធ្លាបៃតងបានបញ្ជូនសញ្ញាសុវត្ថិភាពទៅកាន់ខួរក្បាល ហើយការដើរពី ៥ ទៅ ១០ នាទីនៅក្នុងសួនច្បារក្បែរអ្នកអាចធ្វើឱ្យអ្នកស្ងប់អារម្មណ៍ និងជួយអ្នកគ្រប់គ្រងការតានតឹងកាន់តែប្រសើរជាងមុន។

៤. ការដកដង្ហើមជ្រៅៗ ៖ នេះគឺជាវិធីសាមញ្ញបំផុត និងមានប្រសិទ្ធភាពបំផុតក្នុងការធ្វើឱ្យសរសៃប្រសាទរបស់អ្នកស្ងប់ និង ធ្វើឱ្យ​អារម្មណ៍មានការគ្រប់គ្រងឡើងវិញ។ ការដកដង្ហើមជ្រៅៗត្រូវបានណែនាំស្ទើរតែគ្រប់ករណីនៃការតានតឹង ជាពិសេសនៅពេលដែលអ្នកមិនអាចដកខ្លួនចេញពីស្ថានភាពជាក់លាក់នោះ។ ដើម្បីទទួលបានការដកដង្ហើមជ្រៅៗប្រកបដោយប្រសិទ្ធភាព សូម​ស្រូបចូលយឺតៗដោយប្រើច្រមុះរបស់អ្នក និងឱ្យ​បានច្រើនតាមដែលអាចធ្វើបានពី ៧ ទៅ ១០ វិនាទី ។ បន្ទាប់មកដកដង្ហើមចេញយឺតៗតាមមាត់របស់អ្នក ដោយគួរស្រូបចូលប្រហែល ៥ វិនាទី។ មិនត្រឹមតែប៉ុណ្ណោះ វាជួយបង្កើនកម្រិតអុកស៊ីហ្សែនក្នុងខ្លួនរបស់អ្នក សម្រាកខួរក្បាលរបស់អ្នកចេញពីការគិតដ៏ស្រ្តេស និង សម្រួលអារម្មណ៍បាន។

៥. ការញ៉ាំផ្លែប៉ោម ៖ ផ្លែប៉ោមគឺជាផ្លែឈើដ៏អស្ចារ្យមួយ ជាពិសេសប្រសិនបើអ្នកមានជំងឺទឹកនោមផ្អែម នេះអាចជារឿងតែមួយគត់ដែលអ្នកត្រូវការ។ ផ្លែប៉ោមគឺជាប្រភពដ៏សម្បូរបែបនៃសារធាតុប្រឆាំងអុកស៊ីតកម្ម ជាតិដែក និងសំខាន់បំផុតគឺជាតិស្ករធម្មជាតិ។ ការញ៉ាំផ្លែប៉ោមមួយផ្លែអាចជួយឱ្យអ្នកឆាប់ទទួលបានជាតិស្ករដែលរាងកាយអ្នកត្រូវការ មានភាពងាយស្រួលក្នុងការរំលាយជាតិស្ករ និង ជួយសុខភាព ជាពិសេសជាតិសរសៃនៅក្នុងផ្លែប៉ោមនឹងសម្រួលដល់ពោះវៀន ដែលនាំឱ្យរាងកាយមានតុល្យភាព និងស្ងប់អារម្មណ៍៕