ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
គ្រប់សកម្មភាពរស់នៅប្រចាំថ្ងៃត្រូវការថវិកាប្រើប្រាស់ជាចាំបាច់ ហើយម្ចាស់ថវិកាតែងតែមានសិទ្ធិសម្រេចចិត្តលើការប្រើប្រាស់ធនធានថវិការបស់ខ្លួនឱ្យសមប្រកប។ ស្របគ្នានេះ ឯករាជ្យភាពក្នុងការសម្រេចចិត្តរបស់យុវជនក៏អាស្រ័យលើភាពចាស់ទុំក្នុងការគ្រប់គ្រងថវិកាដែរ។ ប្រសិនបើយុវជនមានប្រាក់ចំណូលផ្ទាល់ខ្លួន នោះពួកគាត់អាចនឹងមានសេរីភាពក្នុងការសម្រេចចិត្តធ្វើអ្វីមួយបានច្រើនជាងមុន។
អ្នកស្រី ប៉ែន បុប្ផា អគ្គនាយិកានៃក្រុមហ៊ុនពុទ្ធិពល បានចែករំលែកថា បើយុវជនចាប់ផ្ដើមមានប្រាក់ចំណូលខ្លួនឯង ដែលបានមកពីការងារ ឬរកស៊ី នោះយុវជនអាចសម្រេចចិត្តដោយខ្លួនឯងបានស្ទើរតែពេញលេញ។ ពេលនោះយុវជនជាម្ចាស់ការលើខ្លួនឯង ជាម្ចាស់លុយ ហើយអាចចំណាយលុយធ្វើអ្វីដែលខ្លួនចង់បាន។ នេះជាសេរីភាពហិរញ្ញវត្ថុដែលយុវជនបង្កើតឡើងដោយខ្លួនឯង។
“ពេលនោះម្ដាយឳពុកនិងក្រុមគ្រួសារ អាចជាអ្នកជួយពិភាក្សានិងដឹងលឺការធ្វើសេចក្ដីសម្រេចរបស់គាត់តែប៉ុណ្ណោះ។ មិនដូចពេលដែលគាត់នៅក្រោមការផ្គត់ផ្គង់ពីអ្នកផ្ទះ គឺគាត់ត្រូវដើរតាមលក្ខខណ្ឌនិងការសម្រេចចិត្តរបស់អ្នកផ្ទះ ព្រោះអ្នកផ្ទះដែលជាអាណាព្យាបាលនឹងមិនអនុញ្ញាតឱ្យធ្វើអ្វីដែលមិនបានការ ឬខាតប្រយោជន៍នោះទេ”។
អ្នកស្រី ប៉ែន បុប្ផា
ថវិកាពិតជាដើរតួនាទីសំខាន់សម្រាប់យុវជន ព្រោះថាពួកគាត់ស្ថិតក្នុងវ័យមួយដែលចាប់ផ្ដើមចេះគិតស្រមៃចង់ស្គាល់ ចង់សាកល្បងធ្វើអ្វីដែលថ្មីៗ ហេតុនេះពួកគាត់ត្រូវចាប់ផ្ដើមចេះគិត ចាប់ផ្ដើមចេះសម្រេចចិត្ត គិតពីតម្រូវការខ្លួនឯង ចេះប្រឹងប្រែងសន្សំសំចៃ។
មានបទពិសោធនៅក្នុងសង្គម ក៏ដូចជាមានកូនស្រីវ័យជំទង់ក្នុងគ្រួសារផង អ្នកស្រី ប៉ែន បុប្ផា បានបន្ថែមថា ដើម្បីឱ្យមានឯករាជភាពក្នុងការសម្រេចចិត្តរឿងលុយកាក់ គ្រួសារខ្លះចាប់ផ្ដើមបង្រៀនកូនឱ្យចេះសម្រេចចិត្តខ្លួនឯង ក្នុងវ័យដែលកូនចូលរៀនវិទ្យាល័យ។ ឧទាហរណ៍ម្ដាយឳពុកផ្ដល់ប្រាក់ឧបត្ថម្ភឱ្យកូនប្រចាំសប្ដាហ៍ ហេតុនេះកូនអាចសម្រេចចិត្តក្នុងការប្រើប្រាស់ឱ្យសមស្របតាមតម្រូវការ ថាគួរចាយទាំងអស់ ឬចាយខ្លះសន្សំខ្លះទុកសម្រាប់ទិញអ្វីដែលខ្លួនត្រូវការនៅពេលក្រោយ។
“សម្រាប់យុវជនដែលមានប្រាក់ចំណូលខ្លួនឯង ខ្ញុំយល់ថាពួកគាត់ហ៊ានសម្រេចចិត្តច្រើនជាងពេលដែលគាត់សុំលុយអ្នកផ្ទះចាយ”។
អ្នកស្រី ប៉ែន បុប្ផា
តើយុវជនមានប្រាក់ចំណូលផ្ទាល់ខ្លួន មានសេរីភាពក្នុងការសម្រេចចិត្តពិតមែនដែរឬទេ? យុវជន អេង បញ្ញាវុឌ្ឍ និស្សិតឆ្នាំទី2 នៃសាកលវិទ្យាល័យភូមិន្ទភ្នំពេញ យល់ថា ស្ថិតនៅក្រោមការទំនុកបម្រុងហិរញ្ញវត្ថុពីឪពុកម្តាយ យុវជនពិតជាពិបាកក្នុងការសម្រេចចិត្តដោយខ្លួនឯង។ ប៉ុន្តែវាមិនមែនមានន័យថាពួកគាត់នឹងអាចធ្វើការសម្រេចចិត្តដោយខ្លួនឯងបានមួយរយភាគរយ នៅពេលពួកគាត់មានប្រាក់ចំណូលបាននោះទេ វាអាស្រ័យលើស្ថានភាពគ្រួសារដែរ។
បញ្ញាវុឌ្ឍ យល់ឃើញបន្តថា៖
“ជាក់ស្ដែង នៅក្នុងប្រទេសកម្ពុជាយើង ឪពុកម្តាយមួយចំនួននៅតែមានអំណាចក្នុងការសម្រេចចិត្តចំពោះកូនៗរបស់ពួកគាត់ ទោះបីជាកូនៗ របស់ពួកគាត់អាចរកប្រាក់បានដោយខ្លួនឯងហើយក៏ដោយ”
ចំណែកឯ កញ្ញា គង់ ដាលីន ជាអ្នកគ្រប់គ្រង កកូរស្ទូតឌីយោ មិនទាន់ហ៊ាននិយាយថាខ្លួនឯងមានភាពឯករាជ្យទាំងស្រុងនោះទេ ដោយសារសព្វថ្ងៃក៍មានរឿងមួយចំនួនត្រូវអាស្រ័យលើក្រុមគ្រួសារ មិត្តភក្តិ និងមិត្តរួមការងារ។ ប៉ុន្តែបើនិយាយពីគោលដៅនិងអាជីព គឺជាចំណុចដែលកញ្ញាហ៊ាននិយាយថា អាចរំពឹងលើខ្លួនឯងបានដោយមិនចាំបាច់មានការគាំទ្រជាថវិកាពីក្រុមគ្រួសារ។
ភាពឯករាជ្យក្នុងការសម្រេចចិត្ត បានផ្ដល់ឱ្យយុវតី ដាលីន នូវទំនុកចិត្តលើខ្លួនឯង ហ៊ានបង្ហាញ ហ៊ានធ្វើអ្វីក្នុងនាមជាខ្លួនឯង ស្រលាញ់ខ្លួនឯងកាន់តែខ្លាំង និងមិនរង់ចាំក្នុងការផ្ញើរសុភមង្គលនិងភាពរីករាយរបស់ខ្លួនឯងលើអ្នកដទៃ។
តាមយោបល់របស់អ្នកជំនាញហិរញ្ញវត្ថុបានបញ្ជាក់ថា សេរីភាពក្នុងការសម្រេចចិត្តរបស់មនុស្សស្ថិតនៅលើហរិញ្ញវត្ថុ។ យុវជនក៏ដូច្នេះដែរ ក្រៅពីមានភាពចាស់ទុំចេះគិតគូរ មានប្រាក់ចំណូលផ្ទាល់ខ្លួន អាចធ្វើឱ្យយុវជនមានភាពឯករាជ្យក្នុងការសម្រេចចិត្តប្រសើរជាងមុន ព្រោះយុវជនអាចចេះគិតពិចារណា យល់ពីទំហំនៃការសម្រេចចិត្ត និងចេះទទួលខុសត្រូវលើលទ្ធផលដែលខ្លួនទទួលបាន៕
ជីវប្រវត្តិ: កញ្ញា សៅ សុធារ៉ា កំពុងសិក្សាផ្នែកប្រព័ន្ធផ្សព្វផ្សាយនិងសារគមនាគមន៍ នៅសាកលវិទ្យាល័យភូមិន្ទភ្នំពេញ។ កញ្ញាធ្លាប់ជាអ្នកសរសេរអត្ថបទជាភាសាខ្មែរ និងបកប្រែឲ្យស្ថាប័នឯកជនមួយកន្លែង។ បច្ចុប្បន្ន សុធារ៉ា ជាអ្នកយកការព័ត៌មានអប់រំឲ្យសារព័ត៌មាន AMS Education។
របាយការណ៍សំខាន់
ព័ត៌មានទូទៅ
កម្ពុជាបណ្ដុះបណ្ដាលជំនាញវិជ្ជាជីវៈបានជិត ៧០ម៉ឺននាក់ ខណៈរដ្ឋបន្តជំរុញគោលដៅ ១,៥លាននាក់
និស្សិតជំរុញឱ្យយុវជនចូលរួម TVET DAY ដើម្បីស្វែងយល់ជំនាញ និងបច្ចេកវិទ្យាថ្មីៗ
នាយករដ្ឋមន្រ្តី ៖ រាជរដ្ឋាភិបាលចាត់ទុកការអប់រំបណ្តុះបណ្តាលបច្ចេកទេស និងវិជ្ជាជីវៈ ជាអាទិភាពមួយក្នុងការអភិវឌ្ឍប្រទេសជាតិ
Krahaam Podcast នឹងក្លាយជាផ្នែកមួយជួយបញ្ជ្រាបចំណេះដឹងបន្ថែមពីប្រវត្តិសាស្ត្រខ្មែរក្រហមដល់យុវជនកម្ពុជា
អាហារូបករណ៍ KOICA សម្រាប់និស្សិតកម្ពុជាសិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតនៅសាធារណរដ្ឋកូរ៉េ
កម្មវិធីផ្លាស់ប្តូរការសិក្សា «ផែនការនិស្សិតឆ្នើម ទៅសិក្សានៅបរទេសរាប់ពាន់នាក់» លើកទី៣ នឹងជួយផ្សព្វផ្សាយវប្បធម៌ ទេសចរណ៍ របស់កម្ពុជា តាមរយៈនិស្សិតចិន
បាក់ឌុបនាពេលអនាគត អាចតម្រូវឱ្យប្រឡងភាសាបរទេសជាមុខវិជ្ជាកាតព្វកិច្ច ខណៈអ្នកជំនាញគាំទ្រការលើកកម្ពស់ជំនាញភាសាសម្រាប់ទីផ្សារការងារ
អវត្តមានសិស្សខ្ពស់ និងលទ្ធផលប្រឡងទាប ៖ ក្រសួងអប់រំដាក់ផែនការកែទម្រង់វិទ្យាល័យទួលប្រាសាទសែនសុខជាបន្ទាន់
របត់ថ្មី! សិស្សជានារី រៀនជំនាញជួសជុលរថយន្តកាន់តែច្រើន ព្រោះឃើញឱកាសការងារ និងប្រាក់ចំណូលសមរម្យ
ស្ថាប័ន OECD ព្រមានពីសិស្សអវត្តមានច្រើនកំពុងក្លាយជាបញ្ហាប្រឈមធំក្នុងប្រព័ន្ធអប់រំសកល
កម្មវិធីពិសេសរបស់ AMS EDUCATION
ព័ត៌មានសង្ខេប
