​នៅក្នុង​យុគសម័យ​ឌីជីថល​នេះ​ ​ការ​មាន​ជំនាញ​ ​ឬ​សមត្ថភាព​តែ​មួយ​មុខ​មិន​ទាន់​គ្រប់គ្រាន់​នោះ​ទេ​ ​ប្រសិនបើ​គ្មាន​នរណា​ម្នាក់​បាន​ឃើញ​ ​ឬ​ស្គាល់​ពី​អ្វី​ដែល​អ្នក​កំពុង​ធ្វើ​ទេ ​ឱកាស​ល្អ​ៗ​ជាច្រើន​អាចនឹង​មើល​រំលង​អ្នក​។​

​នៅក្នុង​សៀវភៅ​លក់​ដាច់​បំផុត​ «​Show​ ​Your​ ​Work​!​» ​របស់​អ្នកនិពន្ធ​ ​Austin​ ​Kleon​ ​បាន​លុបបំបាត់​គំនិត​ដែល​ថា​ ​”​ទាល់តែ​ជា​អ្នកជំនាញ ​ឬ​ជា​ជន​កំពូល​ប្រាជ្ញា​ ​(​Genius​) ​ទើប​អាច​ចែករំលែក​ស្នាដៃ​បាន​”​។ ​ផ្ទុយទៅវិញ​ លោក​បាន​លើកទឹកចិត្ត​ឱ្យ​មនុស្ស​គ្រប់​គ្នា​ក្លាយជា​ «​Amateur​» ​ឬ​អ្នករៀនសូត្រ​ដោយ​បេះដូង​ ​ដែល​ហ៊ាន​បង្ហាញ​ដំណើរការ​នៃ​ការ​ធ្វើ​ការងារ​របស់​ខ្លួន​ជាសាធារណៈ​។​

​ខាងក្រោម​នេះ​ជា​ ​៤​ ​គន្លឹះ​សំខាន់​ៗ​ដកស្រង់​ចេញ​ពី​សៀវភៅ​នេះ​ ​ដើម្បី​ជួយ​ឱ្យ​សមត្ថភាព​ ​និង​ស្នាដៃ​របស់​អ្នក​ត្រូវបាន​គេ​ស្គាល់​ ​៖​

​១.​ មិន​បាច់​ទាល់តែ​ល្អ​ឥត​ខ្ចោះ​ទេ​

មនុស្ស​ជាច្រើន​ជួប​ឧបសគ្គ​ធំ​បំផុត​គឺ​ “​ភាព​ឥត​ខ្ចោះ​” ​(​Perfectionism​) ​ដោយ​តែងតែ​គិត​ថា​ ​ចាំ​គម្រោង​ ​ឬ​ស្នាដៃ​របស់​ខ្លួន​រួចរាល់​ ​១០០​% ​និង​ល្អ​ឥត​ខ្ចោះ​ទើប​ហ៊ាន​បង្ហាញ​។ ​ប៉ុន្តែ​ ​Austin​ ​Kleon​ ​បាន​រំលឹក​ថា​ ​ដំណើរការ​នៃ​ការ​រៀនសូត្រ ​និង​ស្នាដៃ​ដែល​កំពុង​កែច្នៃ​ ​មាន​តម្លៃ​ស្មើនឹង​ផលិតផល​ស្រេច​។ ​ហេតុ​អ្វី​បានជា​វា​សំខាន់​? ​នៅពេល​អ្នកចែករំលែក​ស្នាដៃ​ដែល​មិន​ទាន់​ចប់​ ​ឬ​ដំណើរការ​រៀនសូត្រ​ពី​ចំណុច​សូន្យ ​អ្នកដទៃ​នឹង​មើលឃើញ​ពី​ភាព​ស្មោះត្រង់​ ​(​Authenticity​) ​និង​ការ​ខិតខំប្រឹងប្រែង​ពិតប្រាកដ​របស់​អ្នក​។ ​ដូច្នេះ​ ​សូម​កុំ​ខ្លាច​ក្នុង​ការ​បង្ហាញ​ស្នាដៃ​សាកល្បង​ ​(​Draft​) ​ឬ​គម្រោង​តូច​ៗ​ដែល​អ្នក​កំពុង​ធ្វើ​។ ​ការ​ចែករំលែក​ជំហាន​តូច​ៗ​ជារៀងរាល់​ថ្ងៃ​ ​នឹង​បង្កើត​បានជា​ផល​បូកសរុប​នៃ​សមត្ថភាព​ដ៏​ធំធេង​នៅ​ថ្ងៃ​អនាគត​។​

​២.​ ​បង្ហាញ​សកម្មភាព​ពីក្រោយ​ឆាក​

មនុស្ស​ភាគ​ច្រើន​ចូលចិត្ត​មើល​លទ្ធផល​ចុងក្រោយ​ ​ប៉ុន្តែ​អ្វី​ដែល​ធ្វើឱ្យ​គេ​ចាប់អារម្មណ៍​ ​និង​ចងចាំ​អ្នក​បាន​យូរអង្វែង​នោះ​ ​គឺ​ ​”​រឿងរ៉ាវ​ពីក្រោយ​ឆាក​” ​(​Behind​-​the​-​scenes​)​។ ​ឧទាហរណ៍​ ​ប្រសិនបើ​អ្នក​ជា​អ្នក​សរសេរ​កូដ ​ចូរ​បង្ហាញ​ពី​របៀប​ដែល​អ្នក​ដោះស្រាយ​កូដ​ដែល​ស្មុគស្មាញ ​ឬ​ ​Error​ ​ដែល​អ្នក​បាន​ចំណាយ​ពេល​ពេញ​មួយ​យប់​ដើម្បី​កែ​។​ តែ​ប្រសិនបើ​អ្នក​ជា​អ្នក​រចនា​វិញ​ ​សូម​បង្ហាញ​រូបភាព​ ​Sketch​ ​ដំបូង​ៗ​ ​មុនពេល​វា​ក្លាយជា​រូបភាព​ផ្ទាំង​ពាណិជ្ជកម្ម​ដ៏​ស្រស់ស្អាត​។ ​ការ​បង្ហាញ​ពី​ប្រវត្តិ​ ​និង​វិធីសាស្រ្ត​ធ្វើ​ការងារ​ជាក់ស្តែង​ ​បញ្ជាក់​យ៉ាង​ច្បាស់​ពី​ការ​ព្យាយាម​ ​ភាព​ច្នៃប្រឌិត​ ​និង​របៀប​គិត​ ​(​Mindset​) ​របស់​អ្នក​ ​ដែល​នេះ​ជា​អ្វី​ដែល​និយោជក ​ឬ​ដៃគូ​អាជីវកម្ម​ស្វែងរក​។​

​៣. ​ចែករំលែក​ចំណេះដឹង​ដែល​ទើបតែ​រៀន​ចេះ​

កុំ​រង់ចាំ​ទាល់តែ​អ្នកក្លាយជា​អ្នកជំនាញ​កម្រិត​កំពូល​ ​ទើប​ចាប់ផ្តើម​បង្រៀន​ ​ឬ​ចែករំលែក​។ ​នៅពេល​អ្នក​ទើបតែ​រៀន​ចេះ​អ្វី​មួយ​ថ្មី​ៗ​ ​អ្នក​គឺជា​មនុស្ស​ដែល​យល់​ពី​អារម្មណ៍​ និង​បញ្ហា​របស់​អ្នក​រៀន​ដំបូង​គេ​បំផុត​។ ​ការ​ចែករំលែក​ ​ឬ​ពន្យល់​អ្នកដទៃ​ពី​អ្វី​ដែល​អ្នក​ទើបតែ​យល់ដឹង​ ​មិន​ត្រឹមតែ​បាន​ជួយ​សម្រួល​ដល់​ការ​រៀនសូត្រ​របស់​អ្នកដទៃ​ប៉ុណ្ណោះ​ទេ​ ​ប៉ុន្តែ​វា​ក៏​ជា​វិធី​ដ៏​ល្អ​បំផុត​ក្នុង​ការ ​”​ពង្រឹង​ការ​ចងចាំ​ ​និង​ជម្រៅ​នៃ​សមត្ថភាព​ខ្លួនឯង​” ​ឱ្យ​កាន់តែ​មុត​ស្រួច​។ ​អ្នក​អាច​សរសេរ​ជា​អត្ថបទ​ខ្លី​ៗ​ ​ធ្វើជា​វីដេអូ​បង្រៀន​ខ្លី ​ឬ​ចែករំលែក​គន្លឹះ​ងាយ​ៗ​ ​(​Tips​ ​& ​Tricks​) ​លើ​បណ្តាញ​សង្គម​អំពី​ឧបករណ៍​ ​(​Tools​) ​ឬ​វិធីសាស្រ្ត​ដែល​អ្នក​បាន​ប្រើប្រាស់​ប្រកបដោយ​ប្រសិទ្ធភាព​។​

​៤.​ ​កុំ​ខ្លាច​គេ​លួច​គំនិត​

ការ​ព្រួយបារម្ភ​ថា​ ​”​បើ​ខ្ញុំ​ចែករំលែក​ទៅ​ ​ប្រាកដជា​មាន​គេ​លួច​គំនិត​ ​ឬ​យក​តម្រាប់​តាម​” ​គឺជា​គំនិត​ដែល​ឃាំង​ឃាត់​ការ​លូតលាស់​របស់​អ្នក​។ ​នៅក្នុង​ពិភពលោក​ដែល​តភ្ជាប់គ្នា​ដោយ​អ៊ីនធឺណិត​ ​ការ​លាក់បាំង​គំនិត​មាន​ន័យ​ស្មើនឹង​ការ​ធ្វើឱ្យ​ខ្លួនឯង​បាត់បង់​ឱកាស​។ ​ត្រូវ​ចងចាំ​ថា​ ​គំនិត​តែ​មួយ​មុខ​គ្មាន​តម្លៃ​ទេ ​ប្រសិនបើ​គ្មាន​ការ​អនុវត្ត​ ​(​Execution​)​, ​មនុស្ស​ពីរ​នាក់​អាច​មាន​គំនិត​ដូចគ្នា​ ​ប៉ុន្តែ​របៀប​ធ្វើ​ ​និង​លទ្ធផល​នឹង​ខុសគ្នា​ទាំងស្រុង​។ ​ដូច្នេះ​ ការ​ដាក់​បង្ហាញ​ស្នាដៃ​ ​និង​គំនិត​ដោយ​បើក​ចំហ ​គឺជា​ ​”​មេ​ដែក​” ​ដ៏​មាន​ឥទ្ធិពល​បំផុត​ក្នុង​ការ​ទាក់ទាញ​មនុស្ស​ដែល​មាន​ចំណង់ចំណូលចិត្ត​ដូចគ្នា​ ​អ្នក​សហការ​ និង​បើក​ផ្លូវ​សម្រាប់​ឱកាស​ការងារ​ ​ឬ​គម្រោង​ថ្មី​ៗ​ដែល​អ្នក​មិន​ធ្លាប់​រំពឹងទុក​៕