ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អាជ្ញាធរហុងកុងបានអនុវត្តវិធានការថ្មី ដោយហាមឃាត់ការប្រើប្រាស់បារីអេឡិចត្រូនិច និងផលិតផលថ្នាំជក់ជំនួសនៅតាមទីសាធារណៈ ចាប់ពីថ្ងៃទី៣០ ខែមេសា ឆ្នាំ២០២៦ តទៅ ខណៈអ្នកល្មើសអាចប្រឈមការផាកពិន័យ និងទោសពន្ធនាគារ ស្របតាមគោលនយោបាយពង្រឹងសុខភាពសាធារណៈ និងកាត់បន្ថយការប្រើប្រាស់ថ្នាំជក់ក្នុងក្រុងស៊ីវិល័យមួយនេះ។
យោងតាមការផ្សាយរបស់សារព័ត៌មាន South China Morning Post ការហាមឃាត់នេះគ្របដណ្តប់លើការប្រើប្រាស់បារីអេឡិចត្រូនិចជាច្រើនប្រភេទ និងប្រព័ន្ធចែកចាយនីកូទីនផ្សេងៗនៅតាមកន្លែងសាធារណៈទូទៅ។
ជនល្មើសដែលបំពានច្បាប់ អាចត្រូវពិន័យជាប្រាក់រហូតដល់ ៥០,០០០ ដុល្លារហុងកុង (ប្រមាណ ៦,៣៨០ ដុល្លារអាមេរិក) ឬប្រឈមការជាប់ពន្ធនាគាររយៈពេលរហូតដល់ប្រាំមួយខែ។
ការហាមឃាត់នេះ អនុវត្តចំពោះបុគ្គលដែលត្រូវបានរកឃើញថាកំពុងកាន់កាប់ ឬប្រើប្រាស់បារីអេឡិចត្រូនិចលើសពី៥ប្រអប់ ទឹកបារីអេឡិចត្រូនិចលើសពី៥មីលីលីត្រ បារីកំដៅលើសពី១០០ដើម ឬបារីប្រភេទ Herbal លើសពី១០០ដើម នៅទីសាធារណៈ។
អ្នកដែលត្រូវបានរកឃើញថា កាន់កាប់ ឬដឹកជញ្ជូនផលិតផលទាំងនោះ អាចត្រូវផាកពិន័យជាប្រាក់ចំនួន ៣,០០០ ដុល្លារហុងកុង។
ក្នុងករណីរកឃើញការកាន់កាប់ ឬដឹកជញ្ជូនក្នុងបរិមាណច្រើន អាជ្ញាធរអាចចាត់ទុកជាបទល្មើសធ្ងន់ ដែលអាចនាំឱ្យមានការចោទប្រកាន់ និងផ្តន្ទាទោសដាក់ពន្ធនាគាររហូតដល់ប្រាំមួយខែ ព្រមទាំងពិន័យជាប្រាក់រហូតដល់ ៥០,០០០ ដុល្លារហុងកុង។
បន្ថែមពីនេះ ការផាកពិន័យរហូតដល់ ១០,០០០ ដុល្លារហុងកុង អាចត្រូវបានអនុវត្ត ប្រសិនបើជនត្រូវឃាត់ខ្លួនមិនអាចបង្ហាញអត្តសញ្ញាណត្រឹមត្រូវ ឬត្រូវបានចាត់ទុកថារារាំងការបំពេញភារកិច្ចរបស់មន្ត្រីអនុវត្តច្បាប់។
ច្បាប់ថ្មីនេះត្រូវបានចាត់ទុកថាជាការផ្លាស់ប្តូរដ៏សំខាន់មួយពីបទប្បញ្ញត្តិមុន ដែលអនុញ្ញាតឱ្យប្រើប្រាស់ផលិតផលជក់បារីជំនួសបាន លើកលែងតែក្នុងតំបន់ដែលហាមជក់បារី។
នាយកដ្ឋានសុខាភិបាលហុងកុងបានបញ្ជាក់ថា ខ្លួនកំពុងសហការជាមួយអាជ្ញាធរពាក់ព័ន្ធ ដើម្បីជូនដំណឹងដល់អ្នកដំណើរចូលមកទីក្រុងអំពីការផ្លាស់ប្តូរនេះ ដោយសារច្បាប់ថ្មីអាចប៉ះពាល់ដល់ភ្ញៀវទេសចរ និងអ្នកធ្វើដំណើរអន្តរជាតិ។
ទោះជាយ៉ាងណា លោក Ronald Lam អគ្គនាយកសុខាភិបាលហុងកុង បានថ្លែងក្នុងបទសម្ភាសន៍វិទ្យុមួយថា លោកមិនរំពឹងថា ការហាមឃាត់នេះនឹងប៉ះពាល់ដល់វិស័យទេសចរណ៍ឡើយ។
លោកបានបន្ថែមថា «យើងបានសហការជាមួយនាយកដ្ឋានពាក់ព័ន្ធ ដើម្បីអនុវត្តការផ្សព្វផ្សាយទ្រង់ទ្រាយធំ រួមទាំងការដាក់ផ្ទាំងព័ត៌មាននៅច្រកចូលប្រទេស និងឱ្យមន្ត្រីពីការិយាល័យគ្រប់គ្រងថ្នាំជក់ និងគ្រឿងស្រវឹង ចែកចាយឯកសារណែនាំដល់ភ្ញៀវទេសចរ»៕
