ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការចាប់ផ្តើមទម្លាប់ហាត់ប្រាណអាចមានភាពងាយស្រួល នៅពេលដែលយើងរកឃើញហេតុផលដ៏ត្រឹមត្រូវ ឬកំពុងមានកម្លាំងចិត្ត និងការសម្លឹងឃើញពីផលប្រយោជន៍នៃការហាត់ប្រាណច្បាស់លាស់។ ការនឹកឃើញចង់ហាត់ប្រាណភ្លាម ចាប់ផ្តើមភ្លែត គឺជាដំណាក់កាលដំបូងៗ ប៉ុន្តែដំណាក់កាលបន្ទាប់ គឺធ្វើយ៉ាងណាបន្តសកម្មភាពនេះឱ្យបានជាប់លាប់។ នៅពីក្រោយការដាក់សម្ពាធ និងវិន័យចំពោះខ្លួនឯង តើមានវិធីសាស្រ្តបែបណាដែលកាន់តែផ្តល់ភាពងាយស្រួលក្នុងការជំរុញភាពទៀងទាត់ក្នុងដំណើរការហាត់ប្រាណ?
តាមរយៈ Nuhealth Lifestyle បានប្រាប់វិធី ៣ ដើម្បីជំរុញបាននូវភាពទៀតទាត់នៃការហាត់ប្រាណ ដោយមានដូចជា ការកំណត់គោលដៅ, ជ្រើសរើសលំហាត់ប្រាណដែលរីករាយ, មានកាលវិភាគក្នុងការចាប់ផ្តើម, គេងឱ្យគ្រប់គ្រាន់ និងស្ងប់, បរិភោគអាហារឱ្យមានតុល្យភាព និងផ្តល់នូវសារធាតុចិញ្ចឹម, រកគ្នាដើម្បីហាត់ជាមួយ រួមទាំងសាកល្បងចលនាថ្មីៗជាដើម។
១. កំណត់គោលដៅ ៖ ការរក្សាភាពទៀងទាត់ក្នុងដំណើរការហាត់ប្រាណ គឺត្រូវជ្រើសរើសឱ្យហើយថា ហាត់ដើម្បីសម្រក់គីឡូ? ដើម្បីពង្រឹងសាច់ដុំ? ឬក៏គ្រាន់តែចង់ឱ្យមានចលនា និងអភិវឌ្ឍន៍រាងកាយទាំងមូល? ការកំណត់បែបនេះ គឺជាការផ្តល់ភាពងាយស្រួលក្នុងការចាប់ផ្តើម, ការហាត់ប្រាណនេះមិនត្រឹមតែត្រូវការកម្លាំងកាយដើម្បីធ្វើចលនានោះទេ ប៉ុន្តែក៏ត្រូវការកម្លាំងចិត្ត និងហេតុផលក្នុងការបន្តដូចគ្នា ចំពោះកម្លាំងចិត្តទៀតសោតគឺមិនស្ថិតស្ថេរនោះទេ វាប្រែប្រួលទៅតាមស្ថានភាពដូចគ្នា ដែលជាហេតុត្រូវការគោលដៅ ដើម្បីជាសារដាស់តឿនក្នុងការបន្តសម្មភាព ឬជាកត្តាក្នុងការដាក់វិន័យចំពោះខ្លួនឯង។ ការហាត់ប្រាណមានច្រើនទម្រង់ និងច្រើនប្រភេទ បើមិនមានគោលដៅទៅលើអ្វីដែលខ្លួនចង់បាន នោះក៏ពិបាកក្នុងការបន្ត និងមិនដឹងថា ចាប់ផ្តើមនៅត្រង់ណាដែរ។
២. ផ្តើមពីសកម្មភាពស្រួលៗ និងសប្បាយៗ ៖ មិនមែនគ្រប់គ្នា សុទ្ធតែចូលចិត្តសកម្មភាព ឬលំហាត់ប្រាណដូចគ្នាទេ ទោះមានភាពងាយស្រួលយ៉ាងណាក៏ដោយ នេះក៏ដោយសារតែប្រភេទនៃរាងកាយ និងថាមពលមនុស្សខុសគ្នា ដែលជាហេតុត្រូវស្វែងរកឱ្យឃើញថា ប្រភេទលំហាត់ប្រាណមួយណាដែលមានភាពសមស្របទៅនឹងតម្រូវការខ្លួនឯង ហើយមិនត្រឹមតែឆ្លើយតបទេ ប្រសិនបើសកម្មភាពទាំងនោះបង្កបាននូវការកម្សាន្តទៀត នោះការរក្សាភាពទៀងទាត់ក្នុងដំណើរលំហាត់ប្រាណរឹងរឹតតែងាយស្រួលក្នុងការបន្តអនុវត្តន៍ មិនថា ជាការដើរ ការរត់ ការរាំ និងសកម្មភាពដទៃៗជាច្រើនទៀត។
៣. កាលវិភាគ ៖ ភាពទៀងទាត់មានសារៈសំខាន់ណាស់ ក្នុងការបន្តទម្លាប់ធ្វើចលនា នៅពេលដែលមិនទាន់មានទម្លាប់ គឺចាំបាច់ត្រូវបង្កើតកាលវិភាគក្នុងមួយអាទិត្យៗ ថា តើថ្ងៃណាដែលផ្តល់នូវភាពងាយស្រួល ហើយតើថ្ងៃនីមួយៗ ត្រូវហាត់សាច់ដុំកន្លែងណាខ្លះ? ដៃ? ជើង? ឬក៏ទូទៅនៃដងខ្លួន? កាលវិភាគមិនមែនជាការដាក់សម្ពាធ ប៉ុន្តែជាការជួយបង្កើតភាពទៀងទាត់ក្នុងការប្រើប្រាស់ទម្លាប់ប្រចាំថ្ងៃឱ្យមានតុល្យភាព។ ក្រៅពីនេះ ការគេងឱ្យគ្រប់ ស្វែងរកគ្នាហាត់ជាមួយ ឬក៏សាកល្បងសកម្មភាពថ្មីៗម្តងម្កាល ក៏ជាកត្តាជំរុញអារម្មណ៍ឱ្យរីករាយ និងផ្សារភ្ជាប់ទម្លាប់ហាត់ប្រាណបានជាប្រចាំផងដែរ៕
