ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កម្មវិធីអាហារូបករណ៍រដ្ឋាភិបាលចក្រភពអង់គ្លេស Chevening ឆ្នាំ២០២៦ ប្រកាសបើកទទួលពាក្យជាផ្លូវការ ចាប់ពីថ្ងៃទី០៥ ខែសីហា ដល់ថ្ងៃទី៧ ខែតុលា ឆ្នាំ២០២៥។ អាហារូបករណ៍ផ្ដល់ជូនការសិក្សាថ្នាក់បរិញ្ញាបត្រជាន់ខ្ពស់ នៅសាកលវិទ្យាល័យចក្រភពអង់គ្លេស។
តាមរយៈសេចក្ដីប្រកាសបើកទទួលពាក្យ លោកស្រី Emma Hennessey ប្រធានផ្នែកអាហារូបករណ៍ ប្រចាំនៅ UK Foreign, Commonwealth and Development Office (FCDO) មានប្រសាសន៍ថា ដំណើរការជ្រើសរើសនិស្សិតជ័យលាភី គឺមានការប្រកួតប្រជែងខ្ពស់ ដើម្បីធានាថា អ្នកដែលត្រូវបានជ្រើសរើសទទួលបាន អាហារូបករណ៍ Chevening គឺជាបុគ្គលតំណាងឱ្យអ្នកដែលមានភាពលេចធ្លោ និងមានគំនិតជាអ្នកដឹកនាំល្អនៅលើពិភពលោក។ ក្រោយបញ្ចប់ការសិក្សា បេក្ខជននឹងត្រូវត្រឡប់ទៅកាន់ប្រទេសកំណើតវិញ ដើម្បីទៅអភិវឌ្ឍន៍ប្រទេសជាតិ ដោយបង្ហាញសមត្ថភាពដែលទទួលបានពីការសិក្សាអាហារូបករណ៍។
ជាមួយគ្នានេះ លោក Dominic Williams ឯកអគ្គរាជទូតចក្រភពអង់គ្លេស ប្រចាំព្រះរាជាណាចក្រកម្ពុជាមានប្រសាសន៍ថា អាហារូបករណ៍ Chevening ជាការលើកទឹកចិត្តដល់ការសម្រេចក្ដីស្រមៃ និងជាឱកាសសម្រាប់និស្សិតអន្តរជាតិជាច្រើនប្រទេសរួមទាំងកម្ពុជា មានឱកាសសិក្សាថ្នាក់បរិញ្ញាបត្រជាន់ខ្ពស់នៅចក្រភពអង់គ្លេស ដែលរួមផ្សំនឹងឱកាសជាច្រើនក្នុងការសិក្សាអាហារូបករណ៍ ការបង្កើតទំនាក់ទំនង ភាពជាអ្នកដឹកនាំ និងក្លាយជាធនធានមនុស្សដ៏មានសក្ដានុពល។ អាហារូបករណ៍ផ្ដល់សម្រាប់សាធារណជនគ្រប់រូប ដោយមិនរើសអើង អាយុ ពណ៌សម្បុរ ភេទ រូបរាង សាសនា និងវប្បធម៌ឡើយ។
លក្ខខណ្ឌនៃការជ្រើសរើស ៖ ជាពលរដ្ឋនៃប្រទេសដែល Chevening ផ្ដល់សិទ្ធ (រួមទាំងកម្ពុជា), មានបំណងត្រឡប់មកកាន់ប្រទេសកំណើតវិញក្រោយបញ្ចប់ការសិក្សាក្នុងរយៈពេល២ឆ្នាំ, បានបញ្ចប់ការសិក្សាថ្នាក់បរិញ្ញាបត្រ មានវិញ្ញាបនបត្របញ្ជាក់ភាសាអង់គ្លេស មានបទពិសោធន៍ការងារយ៉ាងតិច២ឆ្នាំ ឬស្មើនឹង២៨០០ម៉ោង ។
យោងតាមសេចក្ដីប្រកាសជាផ្លូវការ បេក្ខជន បេក្ខនារីដែលមានបំណងដាក់ពាក្យស្នើអាហារូបករណ៍ Chevening អាចចូលទៅកាន់ https://www.chevening.org/apply/ និងពិនិត្យឱ្យបានច្បាស់លាស់។ សម្រាប់ព័ត៌មានបន្ថែមបេក្ខជនអាច ស្វែងរកនៅ https://www.chevening.org/resource-hub/guidance/ ៕
