ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាមការសិក្សាជាសកលថ្មីមួយ បានឱ្យដឹងថា កុមារអាយុក្រោម ១៣ឆ្នាំ មិនគួរប្រើទូរស័ព្ទស្មាតហ្វូននោះទេ, នេះបើតាមសារព័ត៌មាន Euro News ។
កុមារដែលបានប្រើស្មាតហ្វូនមុនអាយុ ១៣ឆ្នាំ ទំនងជាពិបាកគ្រប់គ្រងអារម្មណ៍ ឱ្យតម្លៃខ្លួនឯងទាប មានអត្តចរិតកោងកាច និងព្យាយាមផ្ដាច់ខ្លួនចេញពីសង្គម, នេះបើយោងតាមការសិក្សា ដែលបានចេញផ្សាយនៅក្នុង Journal of the Human Development and Capabilities។
ការស្រាវជ្រាវបានបន្ថែមថា ក្មេងស្រីត្រូវរងផលប៉ះពាល់ ដោយសារការប្រើប្រាស់ស្មាតហ្វូនច្រើនជាងក្មេងប្រុស ដោយ ៩,៥ភាគរយ នៃអ្នកឆ្លើយតបជាក្មេងស្រីបានលើកឡើងថា ពួកគេពិបាកប្រឈមនឹងបញ្ហាផ្លូវចិត្ត ខណៈក្មេងប្រុសមាន ៧ភាគរយ។ លទ្ធផលនៃការស្រាវជ្រាវនេះ មិនកំណត់ពីតំបន់ ដែលពួកគេរស់នៅនោះទេ។
ការសិក្សាបានរកឃើញថា ក្មេងអាយុក្រោម ១៣ឆ្នាំទំនងជាប្រឈមនឹងបញ្ហាដេកមិនលក់ ការគំរាមកំហែងតាមអ៊ីនធឺណិត និងទំនាក់ទំនងអវិជ្ជមានក្នុងគ្រួសារ។
ការសិក្សានេះ បានទាញយកទិន្នន័យពីរបាយការណ៍សុខភាពផ្លូវចិត្តផ្ទាល់ខ្លួនរបស់យុវជន ១ម៉ឺននាក់ ដែលមានអាយុចន្លោះពី ១៨ ទៅ២៤ឆ្នាំ។
ការសិក្សាធ្វើឡើងដោយក្រុមអ្នកស្រាវជ្រាវមិនរកប្រាក់ចំណេញនៃ Sapien Labs បានរកឃើញថា ពិន្ទុសុខភាពផ្លូវចិត្តកាន់តែយ៉ាប់ទៅៗ ពេលដែលក្មេងកាន់តែប្រើទូរស័ព្ទទំនើប។
អ្នកដឹកនាំក្រុមអ្នកស្រាវជ្រាវ លោកស្រី Tara Thiagarajan បានលើកឡើងថា លោកស្រីចង់ឃើញការដាក់កំហិត លើការប្រើស្មាតហ្វូនគ្រប់ប្រភេទ សម្រាប់កុមារអាយុក្រោម ១៣ឆ្នាំ ហើយត្រូវគ្រប់គ្រងដូចជា គ្រឿងស្រវឹង និងថ្នាំជក់ ដោយរដ្ឋាភិបាល។ អ្នកជំនាញរូបនេះ បន្តថា កុមារវ័យក្មេង គឺជាវ័យស្ថិតក្នុងដំណាក់កាលកំពុងអភិវឌ្ឍបញ្ញា និងស្មារតី ហើយពួកគេងាយរងគ្រោះ ក្នុងបរិយាកាសអនឡាញខ្លាំងណាស់៕
