ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងកិច្ចប្រជុំជាមួយសាកលវិទ្យាល័យរដ្ឋ និងឯកជន កាលពីពេលថ្មីៗនេះ ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា បានជំរុញឱ្យគ្រឹះស្ថានឧត្តមសិក្សាទាំងនោះ សហការជាមួយវិស័យឯកជន ក្នុងការស្រាវជ្រាវបង្កើនផលិតផល និងសេវាកម្មប្រកបដោយគុណភាព ដើម្បីជំនួសទំនិញនាំចូលមួយចំនួន។
កិច្ចប្រជុំដែលធ្វើឡើងនៅវិមានព្រឹទ្ធសភាកាលពីថ្ងៃទី៩ កក្កដា បានធ្វើការពិភាក្សាទៅលើ លទ្ធភាពសហការរវាងសាកលវិទ្យាល័យ និងវិស័យឯកជនដើម្បីស្រាវជ្រាវផលិតទំនិញ, ការពិនិត្យគុណភាព និងគាំទ្រ ដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និង ឱកាសបង្កើតផ្សារ និងការគាំទ្រផលិតផលខ្មែរ។
ឯកឧត្តមបណ្ឌិត ធន់ វឌ្ឍនា មានប្រសាសន៍ថា បច្ចុប្បន្ននេះ សាកលវិទ្យាល័យនីមួយៗ បានធ្វើការស្រាវជ្រាវជាច្រើន រហូតដល់មានផលិតផលមួយចំនួន បានដាក់លក់នៅតាមទីផ្សារ។ ក្នុងបរិបទនៃជម្លោះព្រំដែន កម្ពុជាមិនគ្រាន់តែមានឱកាសជំរុញការផលិតទំនិញបន្ថែមប៉ុណ្ណោះទេ ថែមទាំងជំរុញការគាំទ្រផលិតផលខ្មែរផងដែរ។
អនុប្រធានទី២ព្រឹទ្ធសភារំពឹងថា សាកលវិទ្យាល័យរដ្ឋ ក៏ដូចជាឯកជន និងស្ថាប័នពាក់ព័ន្ធ នឹងរួមគ្នាស្រាវជ្រាវដើម្បី កែច្នៃអាហារ ផលិតពូជដំណាំ ការផលិតជី បង្កើតប្រព័ន្ធគ្រប់គ្រងឌីជីថល ព្រមទាំងរួមគ្នាបង្កើតផ្សារសម្រាប់ផលិតផលខ្មែរ។
គួរជំរាបជូនដែរថា កន្លងមកសាកលវិទ្យាល័យ ក៏ដូចជាគ្រឹះស្ថានឧត្តមសិក្សានានានៅកម្ពុជា បានចូលរួមយ៉ាងសកម្មក្នុងការស្រាវជ្រាវដើម្បីបង្កើនផលិតផលក្នុងស្រុក ជាពិសេសក្នុងវិស័យកសិកម្ម បច្ចេកវិទ្យា និងការអភិវឌ្ឍន៍សង្គម ដូចជា ការស្រាវជ្រាវគ្រាប់ពូជស្រូវ ពោត និងបន្លែដែលធន់នឹងអាកាសធាតុ, ការបង្កើតបច្ចេកវិទ្យាដំណាំដោយគ្មានដី (Hydroponics) សម្រាប់ដំណាំបន្លែ, ការអភិវឌ្ឍប្រព័ន្ធត្រួតពិនិត្យសំណើមដី និងស្ថានភាពដំណាំតាមរយៈស្មាតហ្វូន, ការសិក្សាអំពីការប្រើប្រាស់ថាមពលព្រះអាទិត្យ និងជីវៈម៉ាស់សម្រាប់ផលិតអគ្គិសនី ជាដើម៕
