វិបត្តិផ្លូវចិត្ត គឺជាបញ្ហាប្រឈមសកល ដែលនាំឱ្យមានករណីធ្វើអត្តឃាតជារៀងរាល់ថ្ងៃ។ ការសន្និដ្ឋានរបស់អង្គការសុខភាពពិភពលោក (WHO) បានឱ្យដឹងថា មនុស្សប្រមាណជិត ៨សែននាក់ បានស្លាប់ដោយសារការធ្វើអត្តឃាតរាល់ឆ្នាំ។ ដោយអត្រាអ្នកធ្វើអត្តឃាតខ្ពស់បំផុត គឺស្ថិតក្នុងក្រុមមនុស្សមានអាយុចន្លោះពី ១៥ ទៅ២៩ឆ្នាំ ហើយ ៧៣ភាគរយ នៃស្លាប់នោះ មកពីបណ្ដាប្រទេសចំណូលទាប និងចំណូលមធ្យម។

WHO ដដែល បានប៉ានស្មានថា បច្ចុប្បន្ន មនុស្សជាង ១ពាន់លាននាក់ កំពុងមានបញ្ហាផ្លូវចិត្ត ហើយ ៧៥ភាគរយ មិនទទួលបានការព្យាបាលនោះទេ។ បើទោះបីជាដឹងថា ការស្វែងរកជំនួយពីអ្នកជំនាញ និងមនុស្សជិតស្និទ្ធ គឺជាជំហានសំខាន់ ដើម្បីកាត់បន្ថយភាពធ្ងន់ធ្ងរ នៃជំងឺក៏ដោយ ប៉ុន្តែមនុស្សមួយចំនួនធំ នៅតែមិនមានភាពក្លាហានគ្រប់គ្រាន់ ស្វែងរកជំនួយ។

លោកបណ្ឌិត ភឿន ប៊ុណ្ណា អ្នកជំនាញចិត្តសាស្ត្រ មានប្រសាសន៍ថា សព្វថ្ងៃបញ្ហាផ្លូវចិត្ត គឺជាវិបត្តិសកល និងជាវិបត្តិដ៏ធំមួយក្នុងសង្គមកម្ពុជា។ ក្នុងបរិបទសព្វថ្ងៃ លោកមើលឃើញថា មានចំណុចខ្វះខាតមួយ នៅក្នុងផ្នែកសុខភាពផ្លូវចិត្ត គឺមនុស្សភ័យខ្លាចក្នុងការស្វែងរកសេវាគាំទ្រ កង្វះការថែទាំផ្លូវចិត្តសម្រាប់បុគ្គលម្នាក់ៗ និងចំណេះដឹងសុខភាពផ្លូវចិត្តនៅមានកម្រិតនៅឡើយ ខណៈការរើសអើងនៅខ្ពស់។

បើតាមអ្នកចិត្តសាស្ត្ររូបនេះ ការស្វែងរកជំនួយ និងការគាំទ្រ មិនមែនមានន័យថា បុគ្គលម្នាក់នោះជាមនុស្សអន់ ឬទន់ខ្សោយនោះទេ ប៉ុន្តែនេះជាការបង្ហាញពីភាពក្លាហានទៅវិញ។ លោកបន្តថា សម្រាប់អ្នកដែលដឹងថាខ្លួនឯងកំពុងមានបញ្ហាផ្លូវចិត្ត អាចស្វែងរកជំនួយ​តាមរយៈមធ្យោបាយជាច្រើន ហើយមធ្យោបាយដែលមានការគាំទ្រប្រកបដោយវិជ្ជាជីវៈ គឺជាការស្វែងរកការគាំទ្រពីសំណាក់អ្នកជំនាញសុខភាពផ្លូវចិត្ត ដែលមានដូចជា អ្នកជំនាញផ្នែកចិត្តសាស្ត្រ វេជ្ជបណ្ឌិតផ្នែកវិកលវិទ្យា ឬគ្រូពេទ្យផ្លូវចិត្ត គិលានុដ្ឋាយិកាផ្នែកផ្លូវចិត្ត និងអ្នកសង្គមកិច្ចមួយចំនួន ដែលទទួលបានការបណ្ដុះបណ្ដាលលម្អិតទៅលើផ្នែកផ្លូវចិត្ត។

លោកបណ្ឌិតបន្តថា យ៉ាងណាក៏ដោយ ការគាំទ្រផ្លូវចិត្ត ដែលមានប្រសិទ្ធភាពខ្ពស់ មិនមែនកើតចេញតែពីអ្នកជំនាញមួយមុខនោះទេ។ ប្រសិនបើអ្នកជំងឺ មានសាច់ញ្ញាតិ និងគ្រួសារកក់ក្ដៅ ដែលអាចចែករំលែករឿងរ៉ាវក្នុងចិត្តបាន សូមចាប់ផ្ដើមជជែក និងស្វែងរកការគាំទ្រពួកគាត់ ឬមិត្តភក្ដិជិតស្និទ្ធក៏បាន។

“ការគាំទ្រផ្លូវចិត្ត ដែលមានប្រសិទ្ធភាព មិនមែនកើតចេញ តែពីអ្នកជំនាញមួយមុខនោះទេ។ ប្រសិនបើយើងមានសាច់ញាតិ និងគ្រួសារដ៏កក់ក្ដៅ ដែលអាចចែករំលែករឿងរ៉ាវទាំងអស់នេះបាន សូមចាប់ផ្ដើមជជែក និងស្វែងរកការគាំទ្រ ពីពួកគាត់ ឬក៏មិត្តភក្ដិស្និទ្ធស្នាលណា ដែលអាចសម្រាកទុកយើងបាន។ ប្រហែលជាពួកគាត់ អាចមានពេលច្រើនជាងអ្នកជំនាញ ដែលយើងអាចទៅជួបគាត់តែមួយម៉ោង…”

ចំពោះវិធីសាស្ត្រ ក្នុងការបង្ហាញអារម្មណ៍ លោកបណ្ឌិត ភឿន ប៊ុណ្ណា បានសង្កត់ធ្ងន់ថា អ្នកមានបញ្ហា ឬត្រូវការការគាំទ្រ ត្រូវនិយាយពីបញ្ហារបស់ខ្លួន ដោយស្មោះត្រង់អំពីស្ថានភាពរបស់ខ្លួន ចៀសវៀងការលាក់បាំង ឬនិយាយអំពីបញ្ហាអ្វីផ្សេង ដែលមិនមែនជាបញ្ហាផ្លូវចិត្ត ដែលខ្លួនកំពុងមានបញ្ហា។

ដោយឡែក ចំពោះអ្នកស្ដាប់ លោកយល់ថា ដើម្បីជួយសម្រាលទុក្ខព្រួយរបស់អ្នកមានបញ្ហាផ្លូវចិត្ត អ្នកស្ដាប់ត្រូវស្ដាប់ដោយមានការយកចិត្តទុកដាក់ ស្ដាប់ដោយមានការយល់ចិត្ត ស្ដាប់ដោយការគោរព និងឱ្យតម្លៃលើបុគ្គលដែលបានបញ្ចេញ ហើយត្រូវមានលក្ខណៈសម្បត្តិសំខាន់ ចំនួន ៣ ចំណុច។

“អ្នកស្ដាប់ គួរតែស្ដាប់ដោយមានការយកចិត្តទុកដាក់ ស្ដាប់ដោយមានការយល់ចិត្ត ស្ដាប់ដោយការគោរព និងឱ្យតម្លៃលើបុគ្គលដែលមានបញ្ហា។ ក្នុងនោះមានចំណុច ៣សំខាន់ ទី១ គឺស្ដាប់ដោយសកម្ម ទី២ ស្ដាប់ដោយការយល់ចិត្ត និងទី៣ ផ្ដល់ការគាំទ្រ កុំស្ដាប់ហើយចោល ឬស្ដាប់ហើយ គ្មានការឆ្លើយតប…”

សម្រាប់លោកបណ្ឌិត ភឿន ប៊ុណ្ណា ការមានទំនាក់ទំនង និងការប្រាស្រ័យទាក់ទងល្អជាមួយមនុស្សជុំវិញខ្លួន ពិតជាមានសារៈសំខាន់ និងជួយពង្រឹងផ្លូវចិត្តបានច្រើន។ ព្រោះតាមរយៈការប្រាស្រ័យទាក់ទងខួរក្បាល និងរាងកាយរបស់យើង នឹងបញ្ចេញអរម៉ូន អុកស៊ីតូស៊ីន ដែលជាអរម៉ូនរីករាយ ដែលធ្វើឱ្យយើងមានសេចក្ដីសុខភាព មានការពេញចិត្តក្នុងជីវិត និងមានអារម្មណ៍ល្អ ទំនុកចិត្ត ហើយមានការជឿជាក់ ប្រសិនបើយើងមានទំនាក់ទំនងជាមួយអ្នកដទៃ ហើយក៏មិនសូវមានបញ្ហាផ្លូវចិត្ត៕