ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម័យកាលបច្ចុប្បន្ននេះមនុស្សគ្រប់គ្នាប្រើប្រាស់កុំព្យូទ័រសម្រាប់រៀនសូត្រ និងធ្វើការងារប្រចាំថ្ងៃ ដូចនេះតម្រូវការអ្នកជំនាញមើលថែ និងជួសជុលក៏ត្រូវមានច្រើនផងដែរ បានជំរុញឱ្យកញ្ញា ខេង ស្រីនីត ចាប់យកជំនាញកុំព្យូទ័រ ក្នុងវគ្គបណ្តុះបណ្តាលយុវជន ១,៥លាននាក់ របស់រាជរដ្ឋាភិបាល នៅវិទ្យាស្ថានពហុបច្ចេកទេសកំពង់ឆ្នាំង។
កញ្ញា ខេង ស្រីនីត ក៏បានប្រាប់ដែរថា ក្រៅតែមើលឃើញពីទីផ្សារដែលកំពុងត្រូវការអ្នកជំនាញផ្នែកកុំព្យូទ័រកាន់តែច្រើន ក៏មានកត្តាផ្សេងទៀតដែលជំរុញនាងចាប់យកជំនាញនេះដែរ គឺការស្រលាញ់ជំនាញកុំព្យូទ័រតែម្តង។
ក្នុងនាមជាកូនស្រីប៉ុន្តែចាប់ជំនាញជួសជុលកុំព្យូទ័រ ស្រីនីតក៏ទទួលបានការលើកទឹកចិត្ត និងការគាំទ្រនូវការសិក្សារបស់នាងពីឪពុកម្ដាយ និងមិត្តភក្តិផងដែរ។ កម្លាំងជំរុញចិត្តទាំងនេះហើយដែលធ្វើឱ្យស្រីនីតមានឆន្ទៈបន្ថែមក្នុងការសិក្សាជំនាញនេះឱ្យបានចប់កម្មវិធីសិក្សា ដើម្បីទទួលបានជំនាញមួយច្បាស់លាស់។
យុវតី ខេន ស្រីនីត បានបន្ថែមថា ក្នុងរយៈពេល៣ខែនេះ ការសិក្សាបានជួយឱ្យស្រីនីតចេះប្រើប្រាស់កុំព្យូទ័របានដោយស្ទាត់ជំនាញ ស្គាល់ពីគ្រឿងបង្គុំរបស់កុំព្យូទ័រ និងអាចជួសជុលក៏ដូចជាតម្លើងផ្នែករឹង និងផ្នែកទន់កុំព្យូទ័រ។ ស្រីនីត ជឿជាក់ថា ការសិក្សានេះនឹងអាចផ្លាស់ប្ដូរ និងកែប្រែជីវភាពក្នុងគ្រួសាររបស់ស្រីនីត ដែលអាចមានចំណូលប្រចាំថ្ងៃ និងសម្រាប់ផ្គត់ផ្គងខ្លួនឯង និងការសិក្សារបស់ប្អូនៗផងដែរ។
និយាយទាំងអួលដើមក ស្រីនីត បន្តថា ការសិក្សាជំនាញនេះធ្លាប់ទទួលបានពាក្យមិនល្អពីអ្នកខាងក្រៅមួយចំនួនដែលលើកឡើងថា ជំនាញជួសជុលកុំព្យូទ័រនេះជាជំនាញមនុស្សប្រុស គួរតែត្រូវការប្រើប្រាស់ភាសាអង់គ្លេសច្រើន និងមានឧបករណ៍ប្រើប្រាស់ច្រើនផងដែរ តែយ៉ាងណាពេលនេះ នាងអាចរៀនជំនាញកុំព្យូទ័រ ជំនះលើពាក្យមិនល្អទាំងនោះ ។ បន្ថែមពីនេះ ស្រីនីត ក៏បានអំពាវនាវទៅដល់យុវជន យុវនារី ដែលមិនមានលទ្ធភាពបន្តការសិក្សា ឬបោះបង់ការសិក្សាព្រោះតែកត្តាផ្សេងៗអាចទៅសិក្សាជំនាញវិជ្ជាជីវៈនៅវិទ្យាស្ថានបច្ចេកទេស ឬមជ្ឈមណ្ឌលបណ្ដុះបណ្ដាលវិជ្ជាជីវៈនៅតាមបណ្ដាខេត្តផ្សេងៗដែលនៅជិត ដើម្បីទទួលបានជំនាញមួយប្រចាំជីវិត៕
