ភ្នំពេញ – កម្មវិធីអាហារូបករណ៍ព្រះអង្គម្ចាស់ក្សត្រីយ៍មហាក្សត្រីយ៍មហាចក្រី សិរិនថន ចំនួន0៦កន្លែងកំពុងប្រកាសជ្រើសរើសសម្រាប់សាធារណជនកម្ពុជាទាំងពីរភេទសម្រាប់ឆ្នាំសិក្សា២០២៣-២០២៤ ។ ភាគីអាហារូបករណ៍នឹងគាំទ្រថ្លៃសិក្សា កន្លែងស្នាក់នៅ និងប្រាក់អាហារូបករណ៍ប្រចាំខែដល់បេក្ខជនជ័យលាភីអាហារូបករណ៍ ។

ជំនាញដែលអាហារូបករណ៍ផ្ដល់ជូនរួមមាន ថ្នាក់បរិញ្ញាបត្រសិល្បៈផ្នែកគ្រប់គ្រងទេសចរណ៍ និងបដិសណ្ឋារកិច្ច១កន្លែង, បរិញ្ញាបត្រសិល្បៈផ្នែកគ្រប់គ្រងសណ្ឋាគារ និងបដិសណ្ឋារកិច្ច១កន្លែង, បរិញ្ញាបត្រវិស្វកម្មមេកានិច ១កន្លែង, បរិញ្ញាបត្រវិស្វកម្មអគ្គិសនី១កន្លែង ដោយបេក្ខជនត្រូវមានសញ្ញាបត្រមធ្យមសិក្សាទុតិយភូមិ ឬសញ្ញាបត្របណ្ដុះបណ្ដាលវិជ្ជាជីវៈកម្រិត៣ ។ លើសពីនេះ បរិញ្ញាបត្រផ្នែកគ្រប់គ្រងពាណិជ្ជកម្ម កម្មវិធីកុំព្យូទ័រអាជីវកម្ម ១កន្លែង និង បរិញ្ញាបត្រកម្មវិធីគ្រប់គ្រងពាណិជ្ជកម្ម ក្នុងធុរកិច្ចអន្តរជាតិ ១កន្លែង ដោយបេក្ខជនត្រូវមានសញ្ញាបត្រមធ្យមសិក្សាទុតិយភូមិ ឬសញ្ញាបត្រដែលមានតម្លៃស្មើ ។

សំណុំឯកសារចាំបាច់ដែលបេក្ខជនត្រូវបំពេញមានដូចជា បង្កាន់ដៃទទួលពាក្យប្រឡង១ច្បាប់ ពាក្យសុំអាហារូបករណ៍១ច្បាប់ ជីវប្រវត្តិសង្ខេប១ច្បាប់ រូបថត៤គុណ៦ (០៤សន្លឹក ផ្ទៃក្រោយស ថតថ្មី) ។ សញ្ញាបត្រមធ្យមសិក្សាទុតិយភូមិ ឬសញ្ញាបត្របណ្ដុះបណ្ដាលវិជ្ជាជិវៈកម្រិត៣ចំនួន១ច្បាប់ (ច្បាប់ចម្លង និងភ្ជាប់ជាមួយច្បាប់ដើមដើម្បីត្រួតពិនិត្យ និងផ្ទៀងផ្ទាត់) លិខិតបញ្ជាក់ពីគ្រឹះស្ថានសិក្សាចំពោះបេក្ខជនជានិស្សិត និងលិខិតបញ្ជាក់ពីអង្គភាពចំពោះបេក្ខជនជាមន្ត្រីរាជការ ។

បេក្ខជនអាចទទួលពាក្យ និងដាក់ពាក្យនៅការិយាល័យអាហារូបករណ៍ និងកម្មសិក្សានៃនាយកដ្ឋានទំនាក់ទំនងវប្បធម៌ និងអាហារូបករណ៍ដែលមានអាសយដ្ឋាននៅ អគារលេខ២៣ ផ្លូវលេខ៣៦០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ ។

គួរបញ្ជាក់ដែរថា សាកលវិទ្យាល័យមហាសារ៉ាខាមក៏មានផ្ដល់អាហារូបករណ៍តាមផ្នែក( Partial Scholarship) ដល់សិស្ស-និស្សិរដែលមានបំណងចង់សិក្សានៅទីនោះផងដែរ ។ សម្រាប់ព័ត៌មានលម្អិតនឹងមានបង្ហាញជូនក្នុងពិព័រណ៍អប់រំ នៅវិទ្យាស្ថានបច្ចេកវិទ្យាកម្ពុជា ថ្ងៃទី២៤ ខែឧសភា ឆ្នាំ២០២៣ ។

ផុតកំណត់ទទួលពាក្យថ្ងៃទី១៧ ខែឧសភា ឆ្នាំ២០២៣ ម៉ោង៤:០០ល្ងាច ៕