​ឱកាស​សិក្សា​ថ្នាក់​បរិញ្ញាបត្រ​ជាន់​ខ្ពស់​ ​(​Master​’​s​ ​Degree​) ​រយៈពេល​មួយ​ឆ្នាំ​ពេញ​ក្នុង​ចក្រភព​អង់គ្លេស ​ដោយ​ទទួលបាន​ការ​ឧបត្ថម្ភ​ពេញលេញ​ ​(​Fully​ ​Funded​) ​បាន​មកដល់​ទៀត​ហើយ​។ ​កម្មវិធី​អាហារូបករណ៍​ដ៏​ល្បីល្បាញ​របស់​រដ្ឋាភិបាល​ចក្រភព​អង់គ្លេស​ ​Chevening​ ​បាន​ប្រកាស​បើក​ទទួល​ពាក្យសុំ​អាហារូបករណ៍​ជា​ផ្លូវការ​ សម្រាប់​ឆ្នាំ​សិក្សា​ ​២០២៧​-​២០២៨​។​

​អាហារូបករណ៍​ ​Chevening​ ​ដែល​ផ្តល់​មូលនិធិ​ដោយ​ក្រសួង​ការ​បរទេស​ ​កិច្ចការ​ខម​មិន​វែល ​និង​ការ​អភិវឌ្ឍន៍​អង់គ្លេស​ ​(​FCDO​) ​រួម​ជាមួយ​អង្គការ​ដៃគូ ​មាន​គោលបំណង​ផ្លាស់ប្តូរ​ ​និង​បណ្តុះបណ្តាល​បុគ្គល​ដែល​មាន​សមត្ថភាព​ ​និង​សក្តានុពល​ដឹកនាំ​ខ្ពស់​ មកពី​ជុំវិញ​ពិភពលោក​ ​ឱ្យ​ទៅ​បន្ត​ការ​សិក្សា​នៅ​តាម​សាកលវិទ្យាល័យ​កំពូល​ៗ​ក្នុង​ចក្រភព​អង់គ្លេស​។

​អាហារូបករណ៍​ពេញលេញ​ និង​ផលប្រយោជន៍​

​បេក្ខជន​ដែល​ទទួលបាន​ជ័យលាភី ​នឹង​ទទួលបាន​ការ​គាំទ្រ​ផ្នែក​ហិរញ្ញវត្ថុ​យ៉ាង​ពេញលេញ​ ​រួមមាន​៖​
​ថ្លៃ​សិក្សា​ទាំងស្រុង​ ​នៅ​តាម​សាកលវិទ្យាល័យ​
ប្រាក់​ឧបត្ថម្ភ​ការ​រស់នៅ​ប្រចាំ​ខែ​
​សំបុត្រ​យន្តហោះ​ ​ទៅ​-​មក​ ចក្រភព​អង់គ្លេស​
ថ្លៃ​ទិដ្ឋាការ​ (​Visa​) ​និង​ប្រាក់​ឧបត្ថម្ភ​រៀបចំ​ខ្លួន​ដំបូង​
​ឱកាស​ចូលរួម​បណ្តាញ​ទំនាក់ទំនង​សកល​ រវាង​អ្នកដឹកនាំ​ និង​អ្នកធ្វើ​ការ​សម្រេចចិត្ត​ក្នុង​វិស័យ​សំខាន់​ៗ​ ​ដូចជា​ ​ការ​ប្រែប្រួល​អាកាសធាតុ​ ​កំណើន​សេដ្ឋកិច្ច​ ​ការ​ស្តារ​ឡើងវិញ​ក្រោយ​ជម្លោះ​ ​និង​វិស័យ​អភិវឌ្ឍន៍​ផ្សេង​ៗ​ទៀត​។​

​កាលបរិច្ឆេទ ​និង​កាលវិភាគ​សំខាន់​ៗ​នៃ​ការ​ដាក់ពាក្យ​

​ថ្ងៃ​បើក​ទទួល​ពាក្យ​៖​ ​ថ្ងៃទី​៤​ ​ខែសីហា ​ឆ្នាំ​២០២៦​
​ថ្ងៃ​បិទ​ទទួល​ពាក្យ​៖ ​នៅ​ថ្ងៃអង្គារ​ ​ទី​៦​ ​ខែតុលា ​វេលា​ម៉ោង​ ​៦:០០​ ​ល្ងាច​ ម៉ោង​នៅ​កម្ពុជា​
​ដំណាក់កាល​វាយតម្លៃ​ ​និង​សម្ភាសន៍​៖ ​ចាប់ពី​ខែតុលា ​ឆ្នាំ​២០២៦​ ​ដល់​ខែមេសា ​ឆ្នាំ​២០២៧​
​ការ​ប្រកាស​លទ្ធផល​៖ ​ពាក់កណ្តាល​ខែមិថុនា ​ឆ្នាំ​២០២៧​
​ចាប់ផ្តើម​ការ​សិក្សា​៖​ ​ខែកញ្ញា​/​តុលា ​ឆ្នាំ​២០២៧​

​លក្ខខណ្ឌ​វិនិច្ឆ័យ​ ​និង​ការ​រៀបចំ​ខ្លួន​សម្រាប់​បេក្ខជន​

​ដើម្បី​មាន​សមត្ថភាព​អាច​ដាក់ពាក្យ​ស្នើសុំ​អាហារូបករណ៍​ ​Chevening​ ​បាន​ ​បេក្ខជន​ត្រូវ​៖​
​1. ​បំពេញ​តាម​លក្ខខណ្ឌ​តម្រូវ​៖ ​ជា​ប្រជាពលរដ្ឋ​នៃ​ប្រទេស​ដែល​ស្ថិត​ក្នុង​បញ្ជី​ទទួល​អាហារូបករណ៍​ ​Chevening​ ​មាន​សញ្ញាបត្រ​បរិញ្ញាបត្រ ​និង​មាន​បទពិសោធន៍​ការងារ​យ៉ាងតិច​ ​២​ឆ្នាំ​។
​2. ​សំណេរ​ទម្រង់​ពាក្យ​សុំ​ដ៏​ទាក់ទាញ​៖​ ​បង្ហាញ​ពី​សមត្ថភាព​ដឹកនាំ​ ការ​បង្កើត​បណ្តាញ​ទំនាក់ទំនង​ ​និង​ផែនការ​បេសកកម្ម​ច្បាស់លាស់​ក្នុង​ការ​បង្កើត​ផល​វិជ្ជមាន​ដល់​សង្គមជាតិ​ក្រោយ​បញ្ចប់​ការ​សិក្សា​។​
​3. ​ជ្រើសរើស​ជំនាញ​ ​និង​សាកលវិទ្យាល័យ​៖ ​ជ្រើសរើស​វគ្គ​សិក្សា​ថ្នាក់​បរិញ្ញាបត្រ​ជាន់​ខ្ពស់​ដែល​សមស្រប​ចំនួន​ ​៣​ ​នៅក្នុង​សាកលវិទ្យាល័យ​ចក្រភព​អង់គ្លេស​។

​របៀប​ដាក់ពាក្យ​

​បេក្ខជន​ដែល​ចាប់អារម្មណ៍​ទាំងអស់​ ​អាច​រៀបចំ​ប្រវត្តិ​រូប ​និង​អត្ថបទ​សំណេរ ​រួច​ចុះឈ្មោះ​ [​ដាក់ពាក្យ​តាម​ប្រព័ន្ធ​អនឡាញ​ផ្លូវការ​របស់​ ​Chevening​ ​] ​។ ​នៅពេល​ចាប់ផ្តើម​បំពេញ​ពាក្យ​ ​ប្រព័ន្ធ​នឹង​ផ្តល់​ “​លេខ​កូដ​សម្ងាត់​ផ្ទាល់ខ្លួន​ (​Unique​ ​Access​ ​Code​)​”​ ​ដែល​បេក្ខជន​ត្រូវ​រក្សាទុក​ឱ្យ​បាន​ល្អ ​ដើម្បី​ប្រើប្រាស់​ចូល​ទៅកាន់​ប្រព័ន្ធ​នៅ​គ្រប់​ដំណាក់កាល​ទាំងអស់​។

​សម្រាប់​ព័ត៌មាន​បន្ថែម​ ​សូម​ចូល​ទៅកាន់​ ​៖​ ​https​:​/​/​www​.​chevening​.​org​/​scholarship​/​cambodia​/ ​៕