ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា ប្រកាសប្រឡងជ្រើសរើសសិស្សនិស្សិតទៅសិក្សាអាហារូបករណ៍ថ្នាក់ឧត្ដមសិក្សានៅតំបន់ស្វយ័តជនជាតិក្វាំងស៊ី នៃសាធារណរដ្ឋប្រជាមាណិតចិនឆ្នាំសិក្សា២០២៤-២០២៥។ អាហារូបករណ៍ជាការផ្ដល់ជូនរបស់មន្ទីរអប់រំ តំបន់ស្វយ័ត និងក្រសួងអប់រំ យុវជន និងកីឡាកម្ពុជា។
អាហារូបករណ៍ផ្ដល់ជូនការសិក្សានៅសាកលវិទ្យាល័យចំនួន៨រួមមាន Guangxi University ០១កន្លែង, Guangxi Normal University ០១កន្លែង, Guangxi University for Nationalities ០១កន្លែង, Guilin University of Technology ០១កន្លែង, Nanning Normal University ០១កន្លែង , Youjiang Medical University for Nationalities ០១កន្លែង, Guilin Medical University ០១កន្លែង និង Yulin Normal University ០១កន្លែង សរុបចំនួន០៨កន្លែង។
លក្ខខណ្ឌនៃការចុះឈ្មោះ បេក្ខជនស្នើពាក្យថ្នាក់បរិញ្ញាបត្រជាន់ខ្ពស់ទាំងពីរភេទត្រូវមានសញ្ជាតិខ្មែរ មានអាយុមិនលើសពី៣៥ឆ្នាំ ត្រូវមានសញ្ញាបត្រថ្នាក់បរិញ្ញាបត្រ មានចំណេះដឹងភាសាចិន ឬអង់គ្លេសជ្រៅជ្រះ មានសុខភាពល្អទាំងកម្លាំងកាយសម្បទា និងស្មារតី និងមិនធ្លាប់ទទួលបានអាហារូបករណ៍របស់សាធារណរដ្ឋប្រជាមានិតចិនពីមុនមក។
សម្រាប់បេក្ខជនស្នើថ្នាក់បរិញ្ញាបត្រ បេក្ខជនទាំងពីរភេទត្រូវមានសញ្ជាតិខ្មែរ មានអាយុមិនលើសពី២២ឆ្នាំ មានសញ្ញាបត្រមធ្យមសិក្សាទុតិយភូមិ ឬសញ្ញាបត្រដែលមានតម្លៃសមមូល ត្រូវមានចំណេះដឹងភាសាចិន ឬអង់គ្លេសជ្រៅជ្រះ មានសុខភាពល្អទាំងកម្លាំងកាយសម្បទា និងស្មារតី និងមិនធ្លាប់ទទួលបានអាហារូបករណ៍របស់សាធារណរដ្ឋប្រជាមានិតចិនពីមុនមក។
ឯកសារចាំបាច់ដែលត្រូវបំពេញរួមមាន បង្កាន់ដៃទទួលពាក្យប្រឡង១ច្បាប់ ពាក្យសុំអាហារូបករណ៍១ច្បាប់ ជីវប្រវត្តិសង្ខេប១ច្បាប់ រូបថត៤គុណ៦ ចំនួន៤សន្លឹក (ផ្ទៃខាងក្រោយពណ៌ស ថតថ្មី) សញ្ញាបត្រមធ្យមសិក្សាទុតិយភូមិ(ច្បាប់ថតចម្លង) សម្រាប់បេក្ខជនថ្នាក់បរិញ្ញាបត្រ និងសញ្ញាបត្រថ្នាក់បរិញ្ញាបត្រ(ច្បាប់ចម្លង០១ច្បាប់) សម្រាប់ថ្នាក់បរិញ្ញាបត្រជាន់ខ្ពស់។ ជាមួយគ្នានេះ បេក្ខជនត្រូវភ្ជាប់នូវច្បាប់ដើម ដើម្បីពិនិត្យ និងផ្ទៀងផ្ទាត់លិខិតបញ្ជាក់ពីគ្រឹះស្ថានសិក្សា/អត្តសញ្ញាណបណ្ណនិស្សិត (ថតចម្លង១ច្បាប់) ចំពោះបេក្ខជនជានិស្សិត និងលិខិតបញ្ជាក់ពីអង្គការចំពោះបេក្ខជនជាមន្ត្រីរាជការ។
កាលបរិច្ឆេទនៃការប្រឡងនឹងប្រព្រឹត្តិនៅថ្ងៃទី២៨ ខែមេសា ឆ្នាំ២០២៤ ដោយការប្រឡងថ្នាក់បរិញ្ញាបត្រជាន់ខ្ពស់លើវិញ្ញាសា ភាសាអង់គ្លេស ១ម៉ោង៣០នាទី និងវប្បធម៌ទូទៅ ១ម៉ោង ៣០នាទី។ សម្រាប់ថ្នាក់បរិញ្ញាបត្រនឹងប្រឡងទៅលើវិញ្ញាសា គណិតវិទ្យា ១ម៉ោង ៣០នាទី និងភាសាអង់គ្លេស ១ម៉ោង ៣០នាទី។
ចាប់ទទួលពាក្យពីថ្ងៃផ្សាយដំណឹងរហូតដល់ថ្ងៃ១៩ ខែមេសា ឆ្នាំ២០២៤ វេលាម៉ោង៤:០០ រសៀល នៅការិយាល័យអាហារូបករណ៍ និងកម្មសិក្សា នៃនាយកដ្ឋានទំនាក់ទំនងវប្បធម៌ និងអាហារូបករណ៍ដែលមានអាសយដ្ឋាន អគារលេខ២៣ ផ្លូវលេខ៣៦០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ (ខាងកើតស្ថានីយទូរទស្សន៍អប្សរា ប្រហែល៥០ម៉ែត្រ)៕
