កម្មវិធីអាហារូបករណ៍ TAISI-Science Tokyo ប្រកាសជ្រើសរើសសិស្ស-និស្សិត ចូលសិក្សាថ្នាក់បរិញ្ញាបត្រជាន់ខ្ពស់នៅសាកលវិទ្យាល័យល្បីៗ នៃប្រទេសជប៉ុនសម្រាប់ឆ្នាំសិក្សា២០២៥។ អាហារូបករណ៍នឹងជ្រើសរើសបេក្ខជនចំនួន៧០នាក់សម្រាប់សិក្សានៅក្នុងកម្មវិធីនេះ។

ជំនាញដែលអាហារូបករណ៍ផ្ដល់ជូនសិក្សារួមមាន ផ្នែកវិស្វកម្មយានយន្ត និងដឹកជញ្ជូនកម្រិតខ្ពស់ (A2TE) ផ្នែកវិស្វកម្មថាមពល និងធនធានប្រកបដោយនិរន្តរភាព (SERE) និង ផ្នែក Artificial Intelligence and Internet of Things (AIoT)។

បេក្ខជនដែលមានបំណងក្នុងការដាក់ពាក្យ ត្រូវមានបទពិសោធន៍សិក្សាថ្នាក់បរិញ្ញាបត្រផ្នែកវិស្វកម្ម ឬវិទ្យាសាស្ត្រក្នុងមុខវិទ្យាទាក់ទងដូចជា រថយន្ត មេកានិច អគ្គិសនី ការត្រួតពិនិត្យលោហធាតុ អេឡិចត្រូនិច គីមីវិទ្យា រូបវិទ្យា បរិស្ថាន ឧស្សាហកម្ម កសិឧស្សាហកម្ម កុំព្យូទ័រ ឬផ្នែកដែលពាក់ព័ន្ធ។ ជាមួយគ្នានេះ បេក្ខជនត្រូវមានពិន្ទុ GPA ថ្នាក់បរិញ្ញាបត្រយ៉ាងតិច ២.៧៥/៤.០០ ឬសមមូល ឬមានបទពិសោធន៍ការងារយ៉ាងតិច២ឆ្នាំ។

លក្ខខណ្ឌក្នុងការដាក់ពាក្យ ៖ បេក្ខជនត្រូវភ្ជាប់ឯកសារកម្មវិធី (ក្នុងទម្រង់ File pdf, doc, docx, ppt, pptx, xls, xlxs, zip, rar ដែលមានទំហំអតិបរមា ៥MB) រូបថតទើបថតថ្មី (ក្នុងរយៈពេល៦ខែចុងក្រោយ) ប្រតិចារិកផ្លូវការ (ថ្នាក់បរិញ្ញាបត្រដែលមានពិន្ទុ) សេចក្ដីថ្លែងការណ៍ នៃគោលបំណង (ដែលសង្ខេបគោលបំណងសិក្សាថ្នាក់បរិញ្ញាបត្រជាន់ខ្ពស់  ឬថ្លែងការណ៍សម្រាប់ការលើកទឹកចិត្តក្នុងការសិក្សា ឬសេចក្តីថ្លែងការណ៍នៃចំណាប់អារម្មណ៍ស្រាវជ្រាវ)។ ជាមួយគ្នានេះ បេក្ខជនត្រូវភ្ជាប់ជាមួយលិខិតណែនាំ (មានទម្រង់គំរូ) លិខិតណែនាំពីសាស្ត្រាចារ្យ ឬប្រធាននាយកដ្ឋាន ឬថ្នាក់លើរបស់បេក្ខជនស្នើពាក្យអាហារូបករណ៍ ។ សម្រាប់សញ្ញាបត្របញ្ជាក់ភាសាអង់គ្លេស បេក្ខជនត្រូវភ្ជាប់រួមមាន TOEFL(PBT) ៤៧៥, TOEFL(IBT) ៥៣, TOEFL(CBT) ១៥៣, IELTS ៤.៥, TOEIC៥៥០, TU-GET(PBT)៥០០, CU-TEP ៦០, KU-EPT ៥០, SIIT-EPT ៦៥, TETET ៤.៥, KMITL-TEP​ B1។ ចំពោះបេក្ខជនដែលបានបញ្ចប់ថ្នាក់បរិញ្ញាបត្រក្នុងថ្នាក់ភាសាអង់គ្លេស និងមកពីប្រទេសដែលប្រើប្រាស់ភាសាអង់គ្លេសមិនត្រូវបានតម្រូវឯសារភាសាអង់គ្លេសឡើយ។

បេក្ខជនជ័យលាភីអាហារូបករណ៍ នឹងត្រូវទទួលបាន អាហារូបករណ៍សិក្សាពេញលេញ ប្រាក់ឧបត្ថម្ភប្រចាំខែ ឱកាសចូលរួមកម្មវិធីសិក្សាផ្សេងៗ និងការផ្លាស់ប្ដូរការសិក្សានៅប្រទេសជប៉ុន។

បេក្ខជនដែលមានចំណាប់អារម្មណ៍ក្នុងការដាក់ពាក្យសូមចូលទៅកាន់ https://zebra.nstda.or.th/nstdascholarship_v2/index.php/site/login?scholartype=taist ។ សម្រាប់ព័ត៌មានបន្ថែម អាចចូលទៅកាន់ https://www.nstda.or.th/taist_tokyo_tech/ ឬអាចទំនាក់ទំនងទៅកាន់ taist@nstda.or.th ។

ចាប់ទទួលពាក្យពីថ្ងៃផ្សាយដំណឹងរហូតដល់ថ្ងៃទី២៨ ខែកុម្ភៈ ឆ្នាំ២០២៥៕