ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដំណាក់កាលនីមួយៗនៃការដាក់ពាក្យអាហារូបករណ៍ Chevening ជាការសន្សំពិន្ទុដើម្បីឱ្យខ្លួនឯងមានអាទិភាពជាប់ជាបេក្ខភាពអាហារូបករណ៍ ជាពិសេសនៅក្នុងវគ្គសម្ភាសន៍។ ខាងក្រោមនេះ ជាគន្លឹះចំនួន៧ដែលអាចជួយឱ្យបេក្ខជន បេក្ខនារី ទទួលបានជោគជ័យនៅក្នុងវគ្គសម្ភាសន៍ ក៏ដូចជាអាចជាប់ជាបេក្ខភាពអាហារូបករណ៍។
១. គិតពីមូលហេតុអ្វីដែលអ្នកចង់ចូលរួមក្នុងសមាគម Chevening ៖ Fabricio Bonecini de Almeida ជាបេក្ខភាពអាហារូបករណ៍ Chevening 2020 បានលើកឡើងថា ការជួបជុំនិស្សិតបរទេសផ្សេងៗក្នុងសមាគម Chevening ធ្វើឱ្យគាត់មានឱកាសស្វែងរកការងារក្នុងក្ដីស្រមៃ ទទួលបានបទពិសោធន៍ថ្មីៗ ទស្សនៈផ្សេងៗពីមនុស្សជុំវិញពិភពលោកជាច្រើនដែលមានបទពិសោធន៍ខុសគ្នា បញ្ហាខុសគ្នា និងដំណោះស្រាយខុសគ្នាផងដែរ។ មានន័យថា នៅក្នុងសមាគម Chevening មានឱកាសជាច្រើនលើសពីការរៀនដោយឥតគិតថ្លៃ ប៉ុន្តែក៏ផ្ដល់បទពិសោធន៍ជីវិតជាច្រើនទៅកាន់បេក្ខជន ដូចនេះបេក្ខជនត្រៀមទៅវគ្គសម្ភាសន៍ត្រូវមានហេតុផលមួយថា ហេតុអ្វីបានជាខ្លួនឯងចង់ចូលរួមក្នុងឱកាសនេះ។
២. រៀបចំគម្រោងគោលដៅរយៈពេលខ្លី និងរយៈពេលវែង ៖ ការរៀបចំគម្រោងអនាគត និងបង្ហាញឱ្យគណៈកម្មការសម្ភាសន៍បានដឹង ជាជម្រើសល្អដែលអាចបង្ហាញពីក្ដីស្រមៃរបស់អ្នកក្នុងការបន្តការសិក្សាពីអាហារូបករណ៍ Chevening និងយកចំណេះដឹងក្នុងការសិក្សាទៅសម្រេចគោលដៅដែលខ្លួនមាន។
៣. ស្វែងរកមូលហេតុដែលត្រូវសិក្សានៅចក្រភពអង់គ្លេស ៖ បេក្ខជនត្រូវមានមូលហេតុច្បាស់លាស់ និងដឹងថា ចក្រភពអង់គ្លេសមិនមែនត្រឹមតែជាទីកន្លែងដែលប្រជុំទៅដោយសាកលវិទ្យាល័យល្បីៗនោះទេ ប៉ុន្តែការសិក្សានៅចក្រភពអង់គ្លេសដែល Chevening ផ្ដល់ឱ្យ គឺលើសពីទទួលបានការអប់រំ អភិវឌ្ឍការសិក្សា ការរស់នៅក្នុងប្រទេសមួយដែលពោពេញទៅដោយវប្បធម៌ ប្រពៃណី ការចែករំលែក និងការស្វែងរកថ្មីជាមួយនឹងនិស្សិតអន្តរជាតិដែលមកពីជុំវិញពិភពលោក។
៤. ការស្វែងរកមុខជំនាញ និងសាកលវិទ្យាល័យ ៖ Chevening ផ្ដល់ឱកាសទាំងអស់ទៅកាន់បេក្ខជនជ្រើសរើសកន្លែងសិក្សា ជំនាញសិក្សា ដូចនេះនៅក្នុងការសម្ភាសន៍ បេក្ខជនខ្លួនឯងត្រូវមានស្មារតី ឆន្ទៈ និងដឹងថា ខ្លួនឯងនឹងជ្រើសរើសជំនាញអ្វី នៅសាកលវិទ្យាល័យណា មានលក្ខខណ្ឌ និងភាពចាំបាច់អ្វីខ្លះដែលសាកលវិទ្យាល័យត្រូវការពីបេក្ខជន ហើយខ្លួនឯងមានគ្រប់គ្រាន់នូវលក្ខខណ្ឌហើយឬនៅ។
៥. និយាយអំពីសមិទ្ធិផលរបស់អ្នក ៖ នៅក្នុងការណែនាំខ្លួនពេលសម្ភាសន៍ អ្នកមិនមានពេលវេលាច្រើនក្នុងការរៀបរាប់អ្វីមួយឡើយ ដូចនេះការរៀបចំពេលវេលា និងលើកឧទាហរណ៍រួមបញ្ចូលនឹងសមិទ្ធិផលជាក់ស្ដែងរបស់អ្នកក្នុងការឆ្លើយសំណួរ គឺជាឱកាសដែលបេក្ខជនត្រូវមានជានិច្ច។
៦. តាំងចិត្តថាខ្លួនឯងសមនឹងទទួលបានឱកាសពី Chevening ៖ អាហារូបករណ៍ Chevening តែងតែផ្ដល់ឱ្យសម្រាប់បុគ្គលដែលមានសមត្ថភាព និងភាពជឿជាក់លើខ្លួនឯងប្រកបដោយសុជីវធម៌។ ជាមួយគ្នានេះ Chevening ផ្ដល់ឱ្យបេក្ខជនគ្រប់វ័យដែលមកពីមជ្ឈដ្ឋានផ្សេងៗ ដោយមិនគិតពី អាយុ បទពិសោធន៍ឡើយ ជាក់ស្ដែងឱ្យតែបុគ្គលនោះមានស្មារតីចែករំលែក ភាពអត់ធ្មត់ និងមានភាពជាអ្នកដឹកនាំ។
៧. ការអនុវត្តជំនាញស្ដាប់ ៖ ចំណេះដឹងភាសាអង់គ្លេស ជាអ្វីដែលបេក្ខជនស្នើអាហារូបករណ៍គ្រប់រូបត្រូវមាន ក្នុងនោះជំនាញក្នុងការស្ដាប់ ជាចំណុចសំខាន់បំផុតក្នុងវគ្គសម្ភាសន៍អាហារូបករណ៍។ បេក្ខជនត្រូវយកចិត្តទុកដាក់នៅពេលគណៈកម្មការសួរសំនួរ ហើយត្រូវប្រាដកចិត្តថា សំណួរដែលបានស្ដាប់លឺ និងចម្លើយជាអ្វីដែលសមាមាត្រគ្នា និងជាចម្លើយដែលអាហារូបករណ៍ចង់បាន។ ក្នុងករណីដែលស្ដាប់មិនសូវច្បាស់សំណួរផ្សេងៗ បេក្ខជនអាចសុំសំណួរម្ដងទៀតជៀសវាងស្ដាប់ខុស ឆ្លើយខុស។
គួរជំរាបថា គន្លឹះទាំង៧នេះ ជាការដកស្រង់ពីគេហទំព័រផ្លូវការរបស់ Chevening ដែលបានចេញផ្សាយកាលពីពេលកន្លងទៅ៕
