សមាគមនិស្សិត​ខ្មែរ​ប្រចាំ​សហព័ន្ធរុស្ស៊ី​បានជូនដំណឹងថា ក្នុងឆ្នាំ​សិក្សា​២០២៣នេះ រដ្ឋាភិបាល​ នៃសហព័ន្ធរុស្ស៊ី នឹងផ្តល់អាហារូបករណ៍​ចំនួន ៤០កន្លែង​ដល់សិស្ស និស្សិត និង​មន្រ្តីរាជការ​កម្ពុជា ដើម្បីទៅ​បន្ត​ការ​សិក្សា​ថ្នាក់បរិញ្ញាបត្រ បរិញ្ញាបត្រ​ជាន់ខ្ពស់ បណ្ឌិត និង​ថ្នាក់​ឯកទេស (Specialist) នៅ​សហព័ន្ធរុស្ស៊ី សម្រាប់ឆ្នាំសិក្សា​២០២៣-២០២៤។

អាហារូបករណ៍ និង​មុខជំនាញ​សិក្សា​រួមមាន ៖

១កន្លែង សម្រាប់ក្រសួងវប្បធម៌ និង​វិចិត្រ​សិល្បៈ នៃព្រះរាជាណាចក្រ​កម្ពុជា លើជំនាញ សិល្បៈ វប្បធម៌ តន្រ្តី ចម្រៀង ភាពយន្ត។ល។

៦កន្លែង សម្រាប់ការ​សិក្សា​ជំនាញ​នុយក្លេអ៊ែរស៊ីវិល និង​ជំនាញពាក់ព័ន្ធដូចជា Physics, Astronomy, Chemistry, Nuclear, Power and Technology, Technology Material។

និង ៣៣កន្លែង សម្រាប់ការសិក្សា​ជំនាញទូទៅ​ដូចជា ពេទ្យ វិស្វកម្មអគ្គិសនី វិស្វកម្ម​យន្តហោះ វិស្វកម្មមេកានិច សំណង់ស៊ីវិល ស្ថាបត្យកម្ម ទំនាក់ទំនង​អន្តរជាតិ នយោបាយ សេដ្ឋកិច្ច គ្រប់គ្រង IT ច្បាប់ បរិស្ថាន កសិកម្ម។ល។

ឯកសារ​ដែល​បេក្ខជន​ត្រូវ​បំពេញ​រួមមាន ៖ លិខិត​ឆ្លងដែន (មានសុពលភាព ១ឆ្នាំ ៦ខែ គិត​ត្រឹម​ថ្ងៃដាក់ពាក្យ), លិខិតពិនិត្យសុខភាពទូទៅ និង​លិខិត​បញ្ជាក់ថា គ្មានជំងឺអេដស៍ ជំងឺថ្លើម ជំងឺស្វាយ និង​ជំងឺរបេង ដែលចេញ​ដោយ​នាយកដ្ឋាន​សុខភាព​សិក្សា នៃក្រសួងអប់រំ យុវជន និង​កីឡា, សញ្ញាបត្រមធ្យមសិក្សា​ទុតិយភូមិ​ ឬសញ្ញាបត្រ​ដែលមាន​តម្លៃស្មើ សម្រាប់​បេក្ខជន​ស្នើ​សុំ​បន្ត​ការ​សិក្សា​ថ្នាក់បរិញ្ញាបត្រ ឬថ្នាក់​ឯកទេស, សញ្ញាបត្រ​បរិញ្ញាបត្របរិញ្ញាបត្រ និងព្រឹត្តិបត្រ​ពិន្ទុ​ការ​សិក្សា សម្រាប់បេក្ខជនស្នើ​សុំ​បន្ត​ការ​សិក្សា​ថ្នាក់​បរិញ្ញាបត្រ​ជាន់ខ្ពស់, សញ្ញាបត្របរិញ្ញាបត្រជាន់ខ្ពស់ និងព្រឹត្តិបត្រ​ពិន្ទុ​ការ​សិក្សា សម្រាប់​បេក្ខជន ស្នើសុំ​បន្ត​ការ​សិក្សា​ថ្នាក់បណ្ឌិត និង ឯកសារ​ជំនួយផ្សេងៗ (ប័ណ្ណសរសើរ មេដាយប្រឡង សញ្ញាបត្រ​ភាសាបរទេស លិខិតថ្លែង​អំគុណ។ល។) ប្រសិនបើមាន។

បញ្ជាក់ ៖ ការ​បកប្រែ​សញ្ញាបត្រ ព្រឹត្តិបត្រ​ពិន្ទុ និង​ឯកសារ​ពាក់ព័ន្ធ​ផ្សេងៗ​ត្រូវ​ធ្វើ​ឡើង​នៅ​ក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រ​កម្ពុជា។

ការចុះឈ្មោះ​ស្នើ​សុំ​អាហារូបករណ៍​ធ្វើ​ឡើង​តាម​រយៈ​គេហទំព័រ ៖ https://education-in-russia.com ។

កាលបរិច្ឆេទ នៃការ​ដាក់ពាក្យ​គឺចាប់ផ្តើម​ពីថ្ងៃទី២០ ខែមករា ឆ្នាំ​២០២៣ និង​ឈប់​ទទួល​ពាក្យ​ថ្ងៃទី២០ ខែកុម្ភៈ ឆ្នាំ​២០២៣។

សម្រាប់ព័ត៌មានលម្អិត សូមទំនាក់ទំនង​ផ្ទាល់ជាមួយ​មជ្ឈមណ្ឌល​វិទ្យាសាស្រ្ត និង​វប្បធម៌​រុស្ស៊ី អាសយដ្ឋាន ៖ ផ្ទះលេខ១០៣ មហាវិថីព្រះនរោត្តម ឬតាមគេហទំព័រ Facebook : rcckcam ៕