ភ្នំពេញ – វិទ្យាស្ថានខ្មែរជំនាន់ថ្មីសម្រេចផ្ដល់អាហារូបករណ៍ថ្នាក់ឧត្ដមសិក្សាចំនួន២៣០កន្លែងសម្រាប់ឆ្នាំសិក្សា២០២២-២០២៣ ។ អាហារូបករណ៍ជាការផ្ដល់ជូនរវាងសហភាពសហព័ន្ធយុវជនកម្ពុជា រាជធានីភ្នំពេញ ក្រោមកិច្ចសហប្រតិបត្តិការជាមួយ វិទ្យាស្ថានខ្មែរជំនាន់ថ្មី ដើម្បីលើកកម្ពស់វិស័យអប់រំ និងបណ្ដុះបណ្ដាលធនធានមនុស្សនៃព្រះរាជាណាចក្រកម្ពុជា ។

ជំនាញដែលអាហារូបករណ៍ផ្ដល់សម្រាប់ថ្នាក់បរិញ្ញាបត្រជាន់ខ្ពស់មាន វិទ្យាសាស្ត្រអប់រំ រដ្ឋបាលសាធារណៈ នីតិឯកជន ហិរញ្ញវត្ថុ គ្រប់គ្រង ការបង្រៀនភាសាអង់គ្លេស មានរយៈពេលសិក្សា២ឆ្នាំ និងវេនសិក្សាចុងសប្ដាហ៍។ សម្រាប់ថ្នាក់បរិញ្ញាបត្ររង និងថ្នាក់បរិញ្ញាបត្រមាន គណនេយ្យ ធនាគារនិងហិរញ្ញាវត្ថុ ទីផ្សារ គ្រប់គ្រង សេដ្ឋកិច្ច ទេសចរណ៍ អក្សរសាស្ត្រអង់គ្លេស ភាសាអង់គ្លេសសម្រាប់បង្រៀន វិទ្យាសាស្ត្រកុំព្យូទ័រ បច្ចេកវិទ្យាព័ត៌មានពាណិជ្ជកម្ម នីតិសាស្ត្រ វិទ្យាសាស្ត្រនយោបាយ និងរដ្ឋបាលសាធារណៈ ដែលមានរយៈពេលសិក្សា ២ឆ្នាំ និង៤ឆ្នាំ និងវេនសិក្សាច័ន្ទ-សុក្រ និងសៅរ៍-អាទិត្យ ។

លក្ខខណ្ឌសម្រាប់បេក្ខជនក្នុងការដាក់ពាក្យ ត្រូវតែជាបេក្ខជនដែលមានជីវភាពខ្វះខាត, មានសញ្ញាបត្របរិញ្ញាបត្រ ឬឯកសារដែលមានតម្លៃស្មើសម្រាប់ការសិក្សាថ្នាក់បរិញ្ញាបត្រជាន់ខ្ពស់ ។ ត្រូវមានសញ្ញាបត្រមធ្យមសិក្សាទុតិយភូមិ ឬឯកសារដែលមានតម្លៃស្មើសម្រាប់ការសិក្សាថ្នាក់បរិញ្ញាបត្រ និងលិខិតបញ្ជាក់ធ្លាក់ ឬសញ្ញាបត្រមធ្យមសិក្សាទុតិយភូមិ ឬឯកសារដែលមានតម្លៃស្មើសម្រាប់ការសិក្សាថ្នាក់បរិញ្ញាបត្ររង ។ លើសពីនេះបេក្ខជន-បេក្ខនារីនឹងត្រូវឆ្លងកាត់ការប្រកួតប្រជែងជ្រើសរើស ដែលរៀបចំដោយក្រុមការងារកម្មវិធីសាបព្រោះគ្រាប់ពូជនៃសហភាពសហព័ន្ធយុវជនកម្ពុជា រាជធានីភ្នំពេញ ។

បេក្ខជន-បេក្ខនារីដែលមានចំណាប់អារម្មណ៍ក្នុងការដាក់ពាក្យ សូមភ្ជាប់ជាមួយឯកសារសំខាន់រួមមាន ពាក្យសុំអាហារូបរកណ៍១ច្បាប់ បង្កាន់ដៃទទួលពាក្យស្នើសុំអាហារូបករណ៍១ច្បាប់ ជីវប្រវត្តិសង្ខេបដែលមានបិតរូបថតថ្មី(៤x៦)១ច្បាប់ សញ្ញាបត្រ(ដូចបានរៀបរាប់ខាងលើ)១ច្បាប់ ថតចម្លងអត្តសញ្ញាណប័ណ្ណ ឬសេចក្ដីចម្លងសំបុត្រកំណើត/សំបុត្របញ្ជាក់កំណើត ១ច្បាប់ រូបថតថ្មីទំហំ(៤x៦) ថតពីមុខ មិនមានវ៉ែនតា និងមានផ្ទៃខាងក្រោយពណ៌ស ៣សន្លឹក ។

បេក្ខជនអាចទាញយកសំណុំឯកសារស្នើសុំអាហារូបករណ៍របស់ ស.ស.យ.ក រាជធានីភ្នំពេញតាមរយៈតំណភ្ជាប់៖ https://bit.ly/3C1gNul សម្រាប់បំពេញ ក្រោយបំពេញត្រូវ Update ឯកសារទៅតាមតមណភ្ជាប់ https://forms.gle/MQXD8Md57FkCm4dw9 ។

សម្រាប់ព័ត៌មានលម្អិត និងលម្អិតសូមទំនាក់ទំនងទៅកាន់ទូរស័ព្ទលេខ ០៧០ ៩០៩ ៩០៩ ។ ទទួលពាក្យពីថ្ងៃផ្សាយដំណឹងនេះរហូតដល់ថ្ងៃទី០៣ ខែកុម្ភះ ឆ្នាំ២០២៣ ៕