គណៈកម្មាធិកាអាហារូបករណ៍សិស្ស-និស្សិតក្រីក្រសម្ដេចអគ្គមហាសេនាបតីតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត ប្រកាសផ្ដល់អាហារូបករណ៍ថ្នាក់បរិញ្ញាបត្រ​ចំនួន​១០០កន្លែង​នៅសាកលវិទ្យាល័យ ពាណិជ្ជសាស្ត្រ អេស៊ីលីដា សម្រាប់ឆ្នាំសិក្សា២០២៤-២០២៥ តាមរយៈសម្ដេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុនី។

ជំនាញដែលអាហារូបករណ៍ផ្ដល់ជូនរួមមាន ៖ ធនាគារ និងហិរញ្ញវត្ថុ, ពាណិជ្ជកម្មអន្តរជាតិ, គ្រប់គ្រងហានិភ័យ និងធានារ៉ាប់រង, បច្ចេកវិទ្យាព័ត៌មានធុរកិច្ច, ភាសាអង់គ្លេសទំនាក់ទំនងធុរកិច្ច, គណនេយ្យ, ការបង្រៀនភាសាអង់គ្លេស, វិទ្យាសាស្ត្រ និងវិស្វកម្មកុំព្យូទ័រ, ភាសាអង់គ្លេសបំណិនបកប្រែ, បច្ចេកវិទ្យាហិរញ្ញវត្ថុ, គ្រប់គ្រងបណ្ដាញផ្គត់ផ្គង់ និងចលនូបត្ថម្ភ, គ្រប់គ្រងធុរកិច្ច និងសហគ្រាស, សេដ្ឋកិច្ចពាណិជ្ជកម្ម, នីតិសាស្ត្រ, ទីផ្សារ។

អាហារូបករណ៍ផ្ដល់ជូនវេនសិក្សាចំនួន៤ រួមមាន វេនព្រឹក ឬ ថ្ងៃត្រង់ ឬ រសៀល ឬ ល្ងាច ឬ សៅរ៍-អាទិត្យ នៅទីតាំងគ្រឹះស្ថានសិក្សាដែលមានអាស័យដ្ឋាន អគារលេខ១៣៩៧ មហាវិថីមិត្តភាពភ្នំពេញ-ហាណូយ ភូមិអន្លង់ក្ងាន ខណ្ឌសែនសុខ រាជធានីភ្នំពេញ។

លក្ខខណ្ឌសម្រាប់សិស្ស-និស្សិតដាក់ពាក្យស្នើសុំអាហារូបករណ៍ ៖ ជាបេក្ខជនទូទាំងប្រទេសដែលបានប្រឡងជាប់សញ្ញាបត្រមធ្យមសិក្សាទុតិយភូមិឆ្នាំសិក្សា២០២៣-២០២៤ ដែលទទួលបាននិទ្ទេស A មានឆន្ទៈពិតប្រាកដក្នុងការបន្តការសិក្សា ខិតខំរៀនសូត្រ គោរពតាមការណែនាំ និងព្រមទទួលយកលក្ខខណ្ឌដែលមានចែងរបស់គណៈកម្មាធិការអាហារូបករណ៍ និង សាកលវិទ្យាល័យ។ ជាមួយគ្នានេះ បេក្ខជនដែលស្នើពាក្យអាហារូបករណ៍ តម្រូវឱ្យដាក់ពាក្យស្នើសុំជាមួយគណៈកម្មាធិការអាហារូបករណ៍ ដោយបំពេញព័ត៌មានតាមរយៈ https://reg.amt.live/web/signup និងភ្ជាប់ជាមួយឯកសារចាំបាច់មួយចំនួនដូចជា ៖ រូបថត៤x៦, វិញ្ញាបនបត្រ​បណ្ដោះអាសន្នមធ្យមសិក្សាទុតិយភូមិ ១ច្បាប់, ច្បាប់ថតចម្លងអត្តសញ្ញាណប័ណ្ណសញ្ជាតិខ្មែរ ឬសេចក្ដីថតចម្លងសំបុត្របញ្ជាក់កំណើតមួយច្បាប់ និងច្បាប់ចម្លងសៀវភៅគ្រួសារ ឬសៀវភៅស្នាក់នៅមួយច្បាប់ (គួរបញ្ជាក់ថា ឯកសារភ្ជាប់ទាំងអស់សូម Covert ទៅជា File JPG)។

សម្រាប់ព័ត៌មានបន្ថែម អាចទំនាក់ទំនងទៅកាន់ការិយាល័យអាហារូបករណ៍ មានអាសយដ្ឋាន ផ្ទះលេខ៤ ផ្លូវ៥២២ សង្កាត់បឹងកក់១ ខណ្ឌទួលគោក រាជធានីភ្នំពេញ នៅរៀងរាល់ថ្ងៃច័ន្ទ-សុក្រ ម៉ោង៨ព្រឹក-៥ល្ងាច។ ចាប់ទទួលពាក្យពីថ្ងៃផ្សាយដំណឹងនេះរហូតដល់ថ្ងៃទី២៧ ខែធ្នូ ឆ្នាំ២០២៤៕