យុវតី កៅ ម៉េងហ័ង បច្ចុប្បន្នជាសហស្ថាបនិក នៃគម្រោងស្ទែមយូនីធី និងគម្រោង Ladies in Tech ហើយក៏ជានិស្សិតឆ្នាំទី១ ផ្នែកវិទ្យាសាស្ត្រទិន្នន័យ និងបញ្ញាសិប្បនិម្មិត្ត នៅសាកលវិទ្យាល័យខេមតិច។ យុវតីរូបនេះ បានខិតខំអភិវឌ្ឍសមត្ថភាពរបស់ខ្លួនជាប្រចាំ ព្រោះចង់ក្លាយជាគំរូភាពសម្រាប់ស្រ្តី និងក្មេងស្រីដែលស្រឡាញ់វិស័យបច្ចេកវិទ្យាឱ្យមានភាពក្លាហានសម្រេចក្ដីស្រមៃរបស់ខ្លួន។

យុវតី កៅ ម៉េងហ័ង ឱ្យដឹងថា រូបគេចង់ឱ្យមនុស្សក្នុងសង្គមយល់ថា មុខជំនាញស្ទែម ឬបច្ចេកវិទ្យា គឺអាចរៀនបានសម្រាប់ទាំងក្មេងប្រុស និងក្មេងស្រី។ ជាពិសេស កាន់តែជំរុញទឹកចិត្តស្រ្តី និងក្មេងស្រីឱ្យចូលរួមនៅក្នុងវិស័យបច្ចេកវិទ្យា ពីព្រោះរាល់ថ្ងៃនេះ យើងកំពុងតែរស់នៅក្នុងពិភពលោកមួយដែលពោរពេញទៅដោយការរីកចម្រើនលើវិស័យបច្ចេកវិទ្យា។ ដូច្នេះ វាពិតជាសំខាន់ក្នុងការផ្ដល់ឱកាសដល់ក្មេងស្រីទាំងអស់អាចស្វែងយល់ ក៏ដូចជាយល់ដឹងបន្ថែមលើវិស័យមួយនេះ ហើយអាចប្រើប្រាស់បច្ចេកវិទ្យា សម្រាប់ដោះស្រាយបញ្ហារស់នៅរបស់ប្រចាំថ្ងៃ។

ស្ថាបនិកគម្រោង Ladies in Tech បញ្ជាក់បន្ថែមថា រាល់ថ្ងៃនេះ រូបគេក៏កំពុងខំប្រឹងជំរុញឱ្យក្មេងស្រីដទៃទៀតចាប់យកបច្ចេកវិទ្យាតាមរយៈការរៀបចំគម្រោងផ្សេងៗ ដោយសារតែចង់ឃើញស្រ្តី និងក្មេងស្រីចូលរួមបានកាន់តែច្រើននៅក្នុងវិស័យបច្ចេកវិទ្យា។ លើសពីនេះ យុវតី ម៉េងហ័ង ពិតជាចង់ឃើញមនុស្សក្នុងសង្គមចាប់ផ្ដើមផ្លាស់ប្ដូរផ្នត់គំនិតថា ស្រ្តីវិលចង្ក្រានមិនជុំ, ស្រី្តមិនគួររៀនមុខវិជ្ជាស្ទែម ឬបច្ចេកវិទ្យានោះទេ។ នេះមានន័យថា បច្ចុប្បន្ន ស្រ្តី និងបុរស សុទ្ធតែអាចរួមចំណែកក្នុងវិស័យស្ទែម ឬបច្ចេកវិទ្យា។

ខ្ញុំមានចក្ខុវិស័យ ចង់ឃើញក្មេងស្រីជាច្រើន ជាពិសេសក្មេងស្រីនៅតាមទីជនបទចូលរួមក្នុងវិស័យបច្ចេកវិទ្យាឱ្យបានច្រើនជាងមុន

យុវតី កៅ ម៉េងហ័ង បច្ចុប្បន្នជាសហស្ថាបនិកនៃគម្រោងស្ទែមយូនីធី និងគម្រោង Ladies in Tech

យុវតី កៅ ម៉េងហ័ង បញ្ជាក់ថា ស្រី្តមានតួនាទីសំខាន់ខ្លាំងក្នុងសង្គមជាតិ ពីព្រោះក្នុងការសម្រេចកិច្ចការអ្វីមួយបាន គឺមិនអាចខ្វះការចូលរួមរបស់ស្រ្តីបានឡើយ មិនថាតែការងារផ្នែកស្ទែម បច្ចេកវិទ្យា។ ហើយបច្ចុប្បន្ន កម្ពុជាក៏កំពុងលើកកម្ពស់សិទ្ធិស្រ្តីឱ្យមានភាពស្មើគ្នារវាងបុរស ហើយស្រ្តីក៏មានសមត្ថភាព មានការគិតពិចារណា ចំណេះដឹង ទេពកោសល្យ គំនិតច្នៃប្រឌិត និងចូលរួមធ្វើការងារកាន់តែប្រសើរឡើង ដើម្បីធ្វើឱ្យសង្គមជាតិកាន់តែរីកចម្រើន សេដ្ឋកិច្ចជាតិកាន់តែរីកចម្រើន ដូចពាក្យលើកឡើងថា “ស្រ្តីគឺជាឆ្អឹងខ្នងនៃសេដ្ឋកិច្ចជាតិ”។

នៅក្នុងឱកាសអបអរទិវាអន្តរជាតិនារី យុវតី កៅ ម៉េងហ័ង បានបង្ហាញភាពសប្បាយរីករាយក្នុងចិត្តក្នុងនាមជាក្មេងស្រីម្នាក់ដែលបានចូលរួមក្នុងវិស័យស្ទែម និងបច្ចេកវិទ្យាឌីជីថល។ ម៉េងហ័ង សូមលើកទឹកចិត្តឱ្យស្រ្តី និងក្មេងស្រី ហ៊ានប្រឈមមុខ ហ៊ានសាកល្បង និងផ្ដល់ឱកាសឱ្យខ្លួនឯងបានរៀន និងធ្វើកិច្ចការងារទាក់ទងវិស័យបច្ចេកវិទ្យា ព្រោះបុរសអាចធ្វើបាន ស្ដ្រីក៏អាចធ្វើបាន៕