ភ្នំពេញ – យុវតី កៅ ម៉េងហ័ង គឺជាសិស្សថ្នាក់ទី១២ នៃវិទ្យាល័យហ៊ុនសែនពាមជីកង និងជាស្ថាបនិកនៃគម្រោង Ladies in Tech ដែលជាគម្រោងមួយជួយជំរុញ​ឱ្យស្ត្រី និងក្មេងស្រីចូលរួមក្នុងវិស័យបច្ចេកវិទ្យា ។ ម៉េងហ័ង និយាយថា អ្វី​ដែលជំរុញ​ឱ្យ​ខ្លួន​បង្កើត​គម្រោង Ladies in Tech គឺ​ដោយសារតែចង់បង្ហាញថា ក្មេងស្រី​ក៏​អាច​ចូលរួម​ក្នុងវិស័យ​បច្ចេកវិទ្យា មិន​ដូច​ផ្នត់​គំនិត​សង្គម​ដែលថា បច្ចេកវិទ្យា​គឺសម្រាប់​សិស្ស​ប្រុស​នោះ​ទេ។

តាមពិតទៅ ម៉េងហ័ង មានចំណូលចិត្តលើបច្ចេកវិទ្យា ចាប់តាំងពីរៀននៅថ្នាក់ទី៣ម៉្លេះ ព្រោះចង់ប៉ះ ចង់ដឹង នៅពេលឃើញគេប្រើប្រាស់កុំព្យូទ័រ ហើយក្រោយមកបានចូលរួមក្នុងវិស័យបច្ចេកវិទ្យាទើបស្គាល់ខ្លួនឯងថា ពិតជាស្រឡាញ់ចូលចិត្តបច្ចេកវិទ្យានេះមែន។ ទន្ទឹមគ្នានេះ ម៉េងហ័ង ក៏​មើល​ឃើញថា បច្ចេកវិទ្យាបានចូលរួមជួយផ្លាស់ប្ដូរជីវិត ផ្ដល់ចំណេះដឹងថ្មីៗ និងចូលរួមជួយសង្គមតាមរយៈការបង្កើតកម្មវិធីទូរស័ព្ទដៃផងដែរ។

“យើងចូលចិត្តបច្ចេកវិទ្យា គួបផ្សំនឹងបច្ចេកវិទ្យាចូលរួមជួយសង្គមបានច្រើន ទើបធ្វើឱ្យខ្ញុំកាន់តែស្រឡាញ់បច្ចេកវិទ្យាកាន់តែខ្លាំង មកដល់សព្វថ្ងៃ”

យុវតី កៅ ម៉េងហ័ង ស្ថានិក Ladies in Tech។

យុវតីមកពីខេត្តកំពង់ចាមរូបនេះ បន្ថែមថា ចាប់ពីឆ្នាំ២០២០មកដល់ឆ្នាំ​២០២២ ពោល​គឺរយៈពេល​៣ឆ្នាំជាប់គ្នា រូប​គេ​បាន​ចូលរួម​ជាមួយ​កម្មវិធី Technovation Girls Cambodia ដោយ​ទទួលបានចំណេះដឹងបច្ចេកវិទ្យា ការប្រើប្រាស់បច្ចេកវិទ្យាបង្កើតកម្មវិធីទូរស័ព្ទដៃ ដោះស្រាយបញ្ហាក្នុងសហគមន៍ជាដើម។ ម៉េងហ័ង បន្តថា កម្មវិធីនេះជួយឱ្យរូបគេមានភាពក្លាហានជាងមុន ការធ្វើបទបង្ហាញចេះពន្យល់ ចេះសហការក្រុម និងមានជំនាញសហគ្រិនភាព។ ចំពោះលទ្ធផលក្រោយការចូលរួមកម្មវិធីនេះ នៅឆ្នាំទី១ រូបគេជាប់ជ័យលាភីថ្នាក់ជាតិ, ឆ្នាំទី២ ជាប់ជ័យលាភីប្រជាប្រិយ និងឆ្នាំទី៣ ជាប់ពានរង្វាន់ថ្នាក់ជាតិ និងឈានទៅដល់ថ្នាក់អន្តរជាតិវគ្គពាក់កណ្ដាលផ្ដាច់ព័ត្រ។

យុវតី កៅ ម៉េងហ័ង ស្ថានិក Ladies in Tech

“ខ្ញុំសូមអរគុណដល់ក្រសួងអប់រំដែលបាននាំយកកម្មវិធី Technovation នេះមកសាលារៀនរបស់ខ្ញុំ ដើម្បីឱ្យខ្ញុំមានឱកាសរៀនពីបច្ចេកវិទ្យា និងមានចំណេះដឹងប្រើប្រាស់បច្ចេកវិទ្យាមកដោះស្រាយបញ្ហាក្នុងសហគមន៍ខ្ញុំ”

ជាមួយ​គ្នា​នេះដែរ កាលពី​ឆ្នាំ២០២១ យុវតី កៅ ម៉េងហ័ង ក៏បានចូលរួមកម្មវិធី The 11th E-Icon World Contest ក្នុង​ការ​ចូលរួមដោះស្រាយបញ្ហាពិភពលោក SDG13 ទាក់ទងនឹងបម្រែបម្រួលអាកាសធាតុ។ ក្នុង​កម្មវិធីអន្តរជាតិនោះ ក្រុមរបស់ ម៉េងហ័ង ដែលមានសមាជិកចាសិស្សខ្មែរ និង​សិស្សកូរ៉េ ក៏បានបង្កើតកម្មវិធីទូរស័ព្ទដៃមួយមានឈ្មោះថា green earth ក្នុង​ជួយកាត់បន្ថយបម្រែបម្រួលអាកាសធាតុ ហើយ​ក៏​បានជាប់ជ័យលាភីថ្នាក់អន្តរជាតិ។

ដោយឡែក​កាលពីឆ្នាំ២០២២ ម៉េងហ័រង ក៏​បានចូលរួមកម្មវិធី Tech Girls ដែលជាកម្មវិធីផ្លាស់ប្ដូរការសិក្សារយៈពេល៣សប្ដាហ៍ទៅសហរដ្ឋអាមេរិក ដើម្បីសិក្សាពីចំណេះដឹងបច្ចេកវិទ្យាបន្ថែមទៀត ជំនាញភាពជាអ្នកដឹកនាំ និងធ្វើទស្សនៈកិច្ចសិក្សាតាមសាលកវិទ្យាល័យក្នុងទីក្រុង Washington DC។ កម្មវិធីនោះ ម៉េងហ័ង បានរៀនពីការទំនាក់ទំនងមកពីប្រទេសផ្សេងៗជុំវិញពិភពលោក វប្បធម៌ចម្រុះជាតិសាសន៍ និងរបៀបរស់នៅផ្សេងគ្នា។ លើសពីនេះ ចំណេះដឹងដែលរៀនបានពីសហរដ្ឋអាមេរិក ជំរុញឱ្យ ម៉េងហ័ង បង្កើនភាពក្លាហាន និងរស់នៅដោយឯករាជ្យបានផងដែរ។

ក្រោយទទួលបានចំណេះដឹងផ្នែកបច្ចេកវិទ្យា និងបានចូលរួមកម្មវិធីបច្ចេកវិទ្យាជាច្រើន បានជំរុញ​ឱ្យ​ ម៉េងហ័ង ចង់សាកល្បងកម្មវិធីថ្មីបន្ថែមទៀត និងមានក្ដីស្រមៃចង់ចូលរួមនៅក្នុងអង្គការធំៗ ហើយទីបំផុត​រូបគេក៏ត្រូវបានជ្រើសរើសឱ្យចូលរួមកម្មវិធី Generation Future  2022 មានរយៈពេល៦ខែហើយ ដែលបានបើកឱកាសឱ្យរូបគេបង្កើតគម្រោងមួយដែលមានឈ្មោះថា Ladies in Tech (ស្រី្តក្នុងបច្ចេកវិទ្យា) ដើម្បីផ្ដល់ឱកាសឱ្យក្មេងស្រីបានចូលរួមក្នុងវិស័យបច្ចេកវិទ្យា។

យុវតី កៅ ម៉េងហ័ង ស្ថានិក Ladies in Tech

“ខ្ញុំពិតជាសប្បាយចិត្តដែលទទួលបានឱកាសមួយនេះ ទទួលបានការដឹកនាំពីគ្រូបង្វឹក និងទទួលបានការគាំទ្រច្រើន ទើបខ្ញុំអាចធ្វើគម្រោងបានយ៉ាងជោគជ័យនៅឆ្នាំ២០២២ ហើយបច្ចុប្បន្នអ្នកស្រុក អ្នកភូមិគាត់បានឃើញច្បាស់ថា ទោះបីយើងជាក្មេងស្រីក៏យើងអាចចូលរួមក្នុងវិស័យបច្ចេកវិទ្យាបានដែរ”

ស្ថានិក Ladies in Tech រូបនេះ បន្ថែមថា បច្ចេកវិទ្យាមានសារៈសំខាន់ខ្លាំងសម្រាប់យុវជន ព្រោះបានដើរតួនាទីសំខាន់នៅក្នុងការដោះស្រាយបញ្ហាមនុស្ស។ ទន្ទឹមគ្នានេះ សព្វថ្ងៃបច្ចេកវិទ្យាត្រូវបានយកទៅប្រើប្រាស់ជាច្រើនដូចជា ការបង្កើត App, Platform System, បញ្ញាសប្បនិមិត្ត (AI), រ៉ូបូត (Robotic) ដើម្បីបម្រើឱ្យការរស់នៅរបស់មនុស្សមានភាពជឿនលឿនជាងមុន។ ប្រសិនបើយុវជនមិនមានចំណេះដឹងផ្នែកបច្ចេកវិទ្យាទេ ពិតជាពិបាកក្នុងការសម្របខ្លួនទាំងក្នុងការសិក្សា និងការងារក្នុងពេលបច្ចុប្បន្ន និងទៅអនាគត។

យុវតី កៅ ម៉េងហ័ង លើកទឹកចិត្តដល់​ក្មេងស្រីដែល​ចាប់អារម្មណ៍លើផ្នែកបច្ចេកវិទ្យា ត្រូវចេះផ្ដល់ឱកាសឱ្យខ្លួនឯងសាកល្បងចូលរួមកម្មវិធីបច្ចេកវិទ្យាឱ្យបានច្រើន ដើម្បីអភិវឌ្ឍសមត្ថភាព និងធ្វើតាមក្ដីស្រមៃរបស់ខ្លួន។ ទន្ទឹមគ្នានេះ គ្រាន់តែសាកល្បងសិនចំពោះអ្វីដែលយើងចូលចិត្តធ្វើ ដោយមិនខ្វល់ពីលទ្ធផល ព្រោះគ្មានអ្វីដែលមិនអាចទៅរួចនោះទេ ប្រសិនបើគេធ្វើបានយើងក៏អាចធ្វើបាន៕