ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការកំណត់គោលដៅ គឺជាកត្តាសំខាន់មួយដើម្បីជួយមនុស្សគ្រប់រូបឱ្យសម្រេចបានលទ្ធផលដែលខ្លួនចង់សម្រេចបាន។ ទន្ទឹមគ្នានេះ កំណត់គោលដៅឱ្យកាន់តែខ្ពស់ ក៏អាចជួយជំរុញទឹកចិត្តយើងឱ្យខិតខំប្រឹងប្រែងកាន់តែខ្លាំងជាងមុន ដើម្បីទៅដល់គោលដៅដែលបានកំណត់នោះ។
ដោយសារការកំណត់គោលដៅខ្ពស់នេះហើយ បានជំរុញឱ្យ យុវតី ហេ ជីងយៀក ទទួលបានជ័យលាភីមេដាយមាសក្នុងកម្មវិធីប្រឡងគណិតវិទ្យាអន្តរជាតិសិង្ហបុរី-អាស៊ី (SIMOC) ឆ្នាំ២០២៤ ក្នុងចំណោមសិស្សជាង២ពាន់នាក់មកពី៣០ប្រទេសជុំវិញពិភពលោក។
យុវតី ហេ ជីងយៀក បច្ចុប្បន្នជាសិស្សថ្នាក់ទី៨ មកពីសាលារៀន Northbridge International School និងជាម្ចាស់ជ័យលាភីមេដាយមាសគណិតវិទ្យា SIMOC បានប្រាប់ឱ្យដឹងថា កត្តាដែលជំរុញឱ្យរូបគេចូលរួមប្រឡងគណិតវិទ្យា SIMOC គឺដោយសារចង់សាកល្បងសមត្ថភាពរបស់ខ្លួនឈានដល់កម្រិតណាបើប្រៀបធៀបជាមួយសិស្សពូកែគណិតវិទ្យាមកពីប្រទេសផ្សេងៗទៀត។ ទន្ទឹមគ្នានេះ ជីងយៀក ក៏ធ្លាប់ប្រឡងគណិតវិទ្យាកម្រិតថ្នាក់ជាតិច្រើនមកហើយ ហេតុនេះទើបចង់ដឹងសមត្ថភាពខ្លួនក្នុងការចេញទៅប្រកួតក្រៅប្រទេស ដោយមានការលើកទឹកចិត្តឱ្យចូលរួមប្រឡងពីគ្រួសារ។
យុវតី ហេ ជីងយៀក បញ្ជាក់ថា រូបគេបានរំពឹងទុករួចជាស្រេចហើយថា ការចូលរួមប្រឡងគណិតវិទ្យា SIMOC នេះ នឹងយកជ័យលាភីមេដាយមាសឱ្យបាន។ ហើយរូបគេ មានអារម្មណ៍សប្បាយចិត្ត នៅពេលទទួលបានមេដាយមាសផ្នែកគណិតវិទ្យាដូចការរំពឹងទុក។
ម្ចាស់ជ័យលាភីមេដាយមាសគណិតវិទ្យា SIMOC រូបនេះ បញ្ជាក់បន្ថែមថា គន្លឹះដែលជួយឱ្យរូបគេទទួលបានមេដាយមាសផ្នែកគណិតវិទ្យា គឺទី១. កំណត់គោលដៅឱ្យខ្ពស់ មានន័យថា គ្រប់ការប្រឡងទាំងអស់រូបគេតែងតែដាក់គោលដៅឱ្យខ្ពស់ ដោយរាល់ពេលប្រឡងយ៉ាងហោចណាស់ក៏គិតថា ត្រូវយកមេដាយមាស បើទោះបីពេលខ្លះយើងធ្វើមិនបានដូចការរំពឹងទុកក៏ពិតមែន ប៉ុន្តែអាចជាកត្តាជំរុញទឹកចិត្តដ៏សំខាន់ក្នុងការខំប្រឹងឱ្យទៅដល់គោលដៅ និងទទួលបានលទ្ធផលល្អណាមួយមិនខាន ទី២. ស្រាវជ្រាវរកលំហាត់ចាស់ៗរបស់កម្មវិធីយកមកធ្វើឱ្យបានច្រើន និងឧស្សាហ៍ធ្វើលំហាត់គណិតវិទ្យាអូឡាំពិកឱ្យច្រើនដងរហូតចេះរបៀបធ្វើ និងចងចាំរបៀបធ្វើ។
យុវតី ហេ ជីងយៀក ក៏បានលើកទឹកចិត្តឱ្យសិស្សានុសិស្សទាំងអស់អាចសាកល្បងចូលរួមប្រឡងគណិតវិទ្យា SIMOC នៅឆ្នាំក្រោយៗទៀត ព្រោះកម្មវិធីប្រឡងគណិតវិទ្យា SIMOC មានភាពខុសប្លែកគ្នាពីកម្មវិធីប្រកួតផ្សេងៗ មិនត្រឹមតែមានការប្រឡងគណិតប៉ុណ្ណោះទេ ប៉ុន្តែក៏មានការប្រកួតជាក្រុម មានការលេងហ្គេមខួរក្បាលជាដើម ដែលផ្ដល់ឱកាសឱ្យសិស្សានុសិស្សស្គាល់គ្នានិងរាប់អានគ្នាជាមួយសិស្សមកពីប្រទេសផ្សេងៗ និងដើម្បីជួយគ្នាពង្រឹងការសហការជាក្រុម។
គួរជម្រាបជូនថា យុវតី ហេ ជីងយៀក ធ្លាប់ចូលរួមប្រកួតគណិតវិទ្យា Kangaroo 2022 ទទួលបានមេដាយមាស, គណិតវិទ្យាអូឡាំពិកអន្តរជាតិ Copernicus 2022 មេដាយប្រាក់, គណិតវិទ្យាអង្គរអូឡាំពិក 2022 មេដាយមាស, គណិតវិទ្យា Kangaroo 2023 មេដាយមាស, គណិតវិទ្យា SASMO 2023 មេដាយប្រាក់, គណិតវិទ្យាអូឡាំពិកអន្តរជាតិ Copernicus 2023 មេដាយប្រាក់, គណិតវិទ្យា SIMOC 2023 មេដាយមាស, គណិតវិទ្យា FISO 2023 មេដាយមាស, គណិតវិទ្យា AMO 2023 មេដាយមាស, គណិតវិទ្យា SMGF 2024 មេដាយប្រាក់, គណិតវិទ្យា SASMO 2024 មេដាយមាស និងDr CT 2024 មេដាយមាស៕
