ម្ចាស់ជ័យលាភីលេខ១ ក្នុង​កម្មវិធី​ប្រកួតប្រជែង​រូបថត​កាយរិទ្ធិថ្នាក់ជាតិលើក២ គឺយុវជន ពេជ្រ វន្ថា បានលើកឡើងថា ​ការថតរូប គឺជា​សិល្បៈ​នៃវិទ្យាសាស្រ្ត ដែលក៏​ជាចំណែកមួយ​ធ្វើ​ឱ្យ​ប្រទេស​ជាតិយើង​មានកេរ្តិ៍ឈ្មោះ និង​មានភាពល្បីល្បាញ​នៅ​លើសាកលលោកបាន។

មកពីអង្គភាពខេត្តឧត្ដរមានជ័យ និង​មានស្រុកកំណើត​នៅ ឃុំតាអុង ស្រុកចំការលើ ខេត្តកំពង់ចាម យុវជន ពេជ្រ វន្ថា ក៏​បានបញ្ជាក់ដែរថា ការថតរូបពិតជាមានសារៈសំខាន់ណាស់ចំពោះសង្គមយើងសព្វថ្ងៃ ពីព្រោះមានអ្នកថតរូបជាច្រើនបានចាប់យកជំនាញថតរូបនេះសម្រាប់ធ្វើជាមុខរបរចិញ្ចឹមជីវិត ឬថតកំសាន្ត ស្រាវជ្រាវ និងសម្រាប់ទុកជាឯកសារក៏មាន។ ហើយ​កត្តាដែលជំរុញឱ្យរូបគេ ចូលរួមកម្មវិធីប្រកួតថតរូបកាយរឹទ្ធិ ព្រោះតែខ្លួន​ធ្លាប់មានក្តីស្រមៃចង់ក្លាយជាអ្នកថតរូបអាជីពដែលមានជំនាញច្បាស់លាស់។ ទន្ទឹមគ្នានេះ រូបគេក៏ចង់ផ្លាស់ប្តូរបទពិសោធន៍ថតរូប និងសិក្សាឱ្យកាន់តែស៊ីជម្រៅនៃបចេ្ចកទេសថតរូប រួមមាន បចេ្ចកទេសថត, ការចាប់ប្លង់, ការកំណត់ function camera, ការកែពណ៌ និងការប្រើប្រាស់ពន្លឺជាដើម។

យុវជន ពេជ្រ វន្ថា បញ្ជាក់បន្ថែមថា រូបគេក៏ចង់បង្ហាញពីស្នាដៃថតរូបរបស់ខ្លួនឱ្យកាន់តែទូលំទូលាយលើឆាកអន្តរជាតិ។ ជាពិសេស ចង់ឱ្យអ្នកថតរូបគ្រប់រូបយល់ឱ្យកាន់តែច្បាស់នៃច្បាប់ និងកម្មសិទ្ធិបញ្ញា ក្នុងការថតរូបអ្វីមួយ ឬមុននឹងចែករំលែករូបភាពទាំងអស់នោះ។

ចំពោះលក្ខណៈពិសេសដែលធ្វើ​ឱ្យ​រូបថតរបស់គេជាប់ជ័យលាភី យុវជន ពេជ្រ វន្ថា បានបញ្ជាក់ថា ក៏ដោយសារតែស្នាដៃរបស់ខ្លួនមានបង្កប់អត្ថន័យក្នុងរូបភាពឱ្យអ្នកមើលមានអារម្មណ៍ថា រូបភាពមានសំឡេង។ លើសពីនេះ  បច្ចេកទេសឱ្យតួក្នុងរូបថត (Model) ក៏ដូចជា អ្នកដែលចូលរួមថតជាមួយគ្មានអារម្មណ៍ធុញទ្រាន់។ ម៉្យាងវិញទៀត ការចេះសង្កេតអំពីពេលវេលានៃពន្លឺព្រះអាទិត្យ និងការប្រើប្រាស់ពន្លឺ ភាពច្បាស់លាស់ក្នុងប្រធានបទ ការអត់ធ្មត់ និងការតាំងចិត្តជដើម។

វន្ថា ឱ្យដឹងថា រូបថតដែល​ខ្លួន​យក​ទៅប្រកួត គឺបានលើកយកការថតរូបជនមានពិការភាព ដែលបង្កប់អត្ថន័យអប់រំក្នុងការទទួលបានឱកាសបន្តការសិក្សា មានស្នាមញញឹម និងក្ដីសង្ឃឹមក្នុងជីវិត។ វន្ថា បន្តទៀតថា ការថតរូបឱ្យសម្រេចបាននេះ ក៏ដោយសារ រូបគេធ្លាប់ចូលរួមក្នុងការងារស្ម័គ្រចិត្តមួយដែលមានឱកាសបាននៅក្បែរជនមានពិការភាព និងយល់ច្បាស់អំពីការប្រាស្រ័យទាក់ទងគ្នា ដូចនេះ រូបគេអាចធ្វើឱ្យពួកគាត់ (ជនមានពិការភាព) ញញឹមបាន ហើយរូបគេបានថតរូបពួកគាត់ (ជនមានពិការភាព) យ៉ាងស្អាត និងមានអត្ថន័យ។

ជាការយល់ឃើញរបស់ វន្ថា កម្មវិធីប្រកួតប្រជែងរូបថតកាយរឹទ្ធិថ្នាក់ជាតិលើកទី២នេះ បានផ្ដល់ចំណេះដឹងដល់រូបគេឱ្យកាន់តែយល់ច្បាស់អំពីការថតរូបពាក់កណ្តាលប្រធានបទ។ ក្នុងនោះ បេក្ខជនមានជំនាញថតរូបក៏ពិតមែន ប៉ុន្តែអាចយល់ច្បាស់បន្ថែមអំពីការបង្កប់អត្ថន័យក្នុងរូបភាពនីមួយៗ។

ម្ចាស់ជ័យលាភីលេខ១ ក្នុងកម្មវិធីប្រកួតប្រជែងរូបថតកាយរឹទ្ធិថ្នាក់ជាតិលើកទី២ រូបនេះ ក៏បានលើកទឹកចិត្តដល់យុវជនទាំងអស់ឱ្យឧស្សាហ៍ចូលរួមធ្វើការងារស្ម័គ្រចិត្ត នៅក្នុងសហគមន៍ដែលខ្លួនរស់នៅ ពីព្រោះការងារទាំងអស់នោះ បានបង្ហាត់បង្រៀនឱ្យយុវជនទទួលបាននូវបទពិសោធន៍ជាច្រើន ក្នុងនោះក៏​មានការដោះស្រាយបញ្ហានៅចំពោះមុខយ៉ាងទូលំទូលាយ៕