ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សាលាបណ្តុះបណ្តាលជំនាញបច្ចេកទេស និងវិជ្ជាជីវៈ (TVET) កំពុងត្រៀមក្នុងការដាក់បញ្ចូលកម្មវិធីជួសជុលរថយន្តអគ្គិសនី (EV Car) ទៅក្នុងកម្មវិធីសិក្សារបស់ខ្លួនសម្រាប់វគ្គសិក្សានៅឆ្នាំក្រោយនេះ បន្ទាប់ពីមើលឃើញនូវការកើនឡើងជាបន្តបន្ទាប់ នៃការប្រើប្រាស់យានយន្តអគ្គិសនីនៅកម្ពុជា។
ឯកឧត្តម ជិន ដារា នាយកវិទ្យាស្ថានបច្ចេកទេសឧស្សាហកម្ម (ITI) មានប្រសាសន៍ថា ដោយមើលឃើញពីការកើនឡើង និងនិន្នាការនៃការប្រើប្រាស់យានយន្តអគ្គិសនីនៅកម្ពុជា វិទ្យាស្ថាន ITI នឹងដាក់បញ្ជូលកម្មវិធីសិក្សាបន្ថែមជំនាញជួសជុលរថយន្តអគ្គិសនី (EV) ក្នុងកម្មវិធីសិក្សា TVET ហើយបច្ចុប្បន្ន កម្មវិធីនេះ ក៏ស្ថិតក្នុងកម្មវិធីសិក្សាថ្មីក្នុងកម្មវិធីសិក្សាផ្ទៃក្នុងរបស់វិទ្យាស្ថានរួចហើយ និងកំពុងរង់ចាំអ្នកជំនាញខាងក្រុមហ៊ុនឯកទេសចូលរួមបន្ថែម ដើម្បីឱ្យកម្មវិធីសិក្សាកាន់តែល្អ។
បើតាម ឯកឧត្តម ជិន ដារា វិទ្យាស្ថានបច្ចេកទេសឧស្សាហកម្ម (ITI) នឹងត្រៀមបើកបង្រៀន និងទទួលសិស្សចូលសិក្សាជំនាញជួសជុលយានយន្តអគ្គិសនី នៅវគ្គសិក្សាថ្មីឆ្នាំ២០២៤-២០២៥។ ឯកឧត្តមបន្ថែមថា ការចាប់ផ្ដើមវគ្គសិក្សាថ្មីនេះ នឹងមានផ្ដល់ជូនការសិក្សាក្នុងកម្រិតចាប់ពីសញ្ញាបត្របច្ចេកទេសវិជ្ជាជីវៈ១(៤ខែ) រហូតដល់ សញ្ញាបត្របច្ចេកទេសជាន់ខ្ពស់ ឬហៅថា បរិញ្ញាបត្ររង(២ឆ្នាំ) ។
តាមរបាយការណ៍របស់ក្រសួងសាធារណការ និងដឹកជញ្ជូន គិតត្រឹមខែសីហា ឆ្នាំ២០២៤ ការចុះបញ្ជីយានយន្តអគ្គិសនីនៅកម្ពុជាមានចំនួន ៣ ៦៧៦គ្រឿង ។ ក្នុងនោះដើម្បីសម្រួលដល់ការធ្វើចរាចរណ៍របស់យានយន្តអគ្គិសនី កម្ពុជាក៏ដាក់ឱ្យមានទីតាំងបញ្ចូលថាមពលអគ្គិសនីនៅទូទាំងប្រទេសចំនួន ២១កន្លែង ខណៈដែលមានទូបញ្ចូលថាមពលយានយន្តអគ្គិសនីលឿនខ្លាំងសរុបចំនួន ២៧ទូ។
ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ការប្រើប្រាស់រថយន្តអគ្គិសនី ឬ EV Car គឺជាចលនាមួយដែលមិនអាចទប់ស្កាត់បានទេ ដោយសារតែបច្ចុប្បន្ន រថយន្តដែលប្រើប្រាស់បច្ចេកវិទ្យាថាមពលអគ្គិសនី គឺកាន់តែច្រើនទៅៗ ហើយគុណភាពនៃការប្រើប្រាស់រថយន្តនេះ ក៏កាន់តែធុន និងបើកបរកាន់តែបានឆ្ងាយ ។ ជាមួយគ្នានេះ ជាការជួយដល់រាជរដ្ឋាភិបាលក្នុងការសម្រេចបាននូវគោលនយោបាយជាតិ ស្ដីពីការអភិវឌ្ឍវិស័យយានយន្តអគ្គិសនី ២០២៤-២០៣០ ក្រសួងការងារនឹងធ្វើការបណ្តុះបណ្តាលធនធានមនុស្ស ឱ្យចេះជួសជុល ឱ្យចេះថែទាំ ហើយនឹងចេះគ្រប់គ្រងទៅលើគ្រឿងយន្ត ក៏ដូចជាម៉ាស៊ីនដែលប្រើប្រាស់ដោយអគ្គិសនីនេះ។
បើតាម ឯកឧត្តម ហេង សួរ ក្នុងរយៈពេល១ ទៅ២ឆ្នាំទៀត គឺទីផ្សារយានយន្តអគ្គិសនី (EV) នឹងកើនច្រើនឡើង ដូច្នេះអ្នកដែលមានជំនាញ ខាងផ្នែក EV បើទោះបីជាបម្រើការងារនៅយានដ្ឋាន ឬក៏បើកយានដ្ឋានខ្លួនឯង គឺនឹងមានអតិថិជនដែលមានរថយន្ត EV កាន់តែច្រើន។
យោងតាមគោលនយោបាយជាតិ ស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០ កម្ពុជាបានបង្ហាញពីការប្តេជ្ញាចិត្ត ដោយបង្កើនការប្រើប្រាស់យានយន្តអគ្គិសនីដែលបានកំណត់ការប្រើប្រាស់ទោចក្រយានយន្តអគ្គិសនីឱ្យបាន ៧០% និងរថយន្តអគ្គិសនីឱ្យបាន ៤០% នៅត្រឹមឆ្នាំ២០៥០ ក្នុងគោលដៅសម្រេចបានអព្យាក្រឹតកាបូន។
ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ថា វិស័យយានយន្តអគ្គិសនីត្រូវបានកំណត់ជាវិស័យមួយក្នុងចំណោមវិស័យដែលមានសក្តានុពលខ្ពស់ ក្នុងការចូលរួមមិនត្រឹមតែជួយដល់ការលើកកម្ពស់បរិស្ថាន និងធ្វើឱ្យប្រសើរឡើងនូវសុខុមាលភាពសាធារណៈប៉ុណ្ណោះទេ ប៉ុន្តែថែមទាំងជំរុញសន្ទុះនៃការធ្វើពិពិធកម្មមូលដ្ឋានសេដ្ឋកិច្ច និងពង្រឹងសន្តិសុខថាមពលផងដែរ៕
