ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានសម្តែងក្តីរំពឹងថា ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៧ ដែលនឹងប្រព្រឹត្តទៅនៅថ្ងៃទី១៥-១៦ ខែមិថុនា នឹងទាក់ទាញអ្នកចូលរួមប្រមាណជាង៦ម៉ឺននាក់នៅទូទាំងប្រទេស។
ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា សម្រាប់ទិវាជាតិបណ្តុះបណ្តាលបច្ចេកទេស និងវិជ្ជាជីវៈ ដែលនឹងប្រព្រឹត្តទៅនៅចុងសប្តាហ៍នេះ មានអង្គភាពថ្នាក់ជាតិចូលរួមចំនួន ១០៤អង្គភាព ដែលស្មើនឹង ១២៥ស្តង់ និងសម្រាប់ថ្នាក់ក្រោមជាតិចំនួន ២៨០អង្គភាព ទាំង២៤ខេត្ត ហើយលោករំពឹងថា នឹងទាក់ទាញអ្នកចូលរួមសរុបប្រមាណជាង៦ម៉ឺននាក់។
បើតាម ឯកឧត្តម កត្តា អ៊ន ពីមួយឆ្នាំទៅមួយឆ្នាំ ចំនួនអ្នកចូលរួមក្នុងទិវាទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈនេះ បានកើនឡើងជាបន្តបន្ទាប់ ដូចជា ឆ្នាំ២០១៨ មានអង្គភាព ចូលរួម៧៣ និងមានអ្នកចូលរួមចំនួន២៧ ៤៥៣នាក់ឆ្នាំ២០២១៩ មានអង្គភាពចូលរួម៧៥និងមានអ្នកចូលរួម៣២១២៥នាក់ ឆ្នាំ២០២០ប្រារព្ធតាមអនឡាញ ដោយសារជំងឺកូវីដ មានអ្នកចូលមើល៧២០០០នាក់, ឆ្នាំ២០២១ ក៏ធ្វើតាមអនឡាញដែរ ដោយមានអ្នកចូលមើល១២៤០០០នាក់ ឆ្នាំ២០២២ មានអង្គភាពចូលរួម១៨៥និងមានអ្នកចូលរួម៤២ ៦៩២នាក់ និងឆ្នាំ២០២៣មានអង្គភាពចូលរួម៣៧១និងមានអ្នកចូលរួម៥៤ ០៧០នាក់។
សូមជំរាបថា ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ ត្រូវបានរៀបចំឡើងក្នុងគោលបំណងលើកកម្ពស់គុណភាព គុណតម្លៃ និងកិត្តិនាមនៃការអប់រំបណ្តុះបណ្តាលបច្ចេកទេស និងវិជ្ជាជីវៈ តាមរយៈការផ្សព្វផ្សាយ ជំរុញ លើក ទឹកចិត្តទៅដល់សិស្សានុសិស្ស និស្សិត យុវជន មាតាបិតាអាណាព្យាបាល កម្មករនិយោជិត និយោជក និងផ្នែកឯកជន ព្រមទាំងសាធារណជនទូទៅ ឱ្យបានយល់ដឹងកាន់តែច្បាស់ និងទូលំទូលាយអំពីសារៈសំខាន់នៃ ការអប់រំបណ្តុះបណ្តាលបច្ចេកទេសនិងវិជ្ជាជីវៈ ព្រមទាំងចូលរួមយ៉ាងសកម្មក្នុងការអភិវឌ្ឍកម្លាំងពលកម្មជំនាញប្រកបដោយគុណភាព ដើម្បីឆ្លើយតបទៅនឹងតម្រូវការទីផ្សារការងារទាំងក្នុង និងក្រៅប្រទេស។ សម្រាប់ឆ្នាំ២០២៤នេះ ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ ត្រូវធ្វើឡើងក្រោមប្រធានបទ «TVET រៀនឱ្យចប់ ឱ្យចេះ ឱ្យមានការងារ»។
នៅក្នុងទិវាជាតិដែលនឹងរៀបចំធ្វើនៅមជ្ឈមណ្ឌលសន្និបាត និងពិព័រណ៌កោះពេជ្រ រយៈពេល២ថ្ងៃនាចុងសប្តាហ៍នេះ នឹងមានការដាក់តាំងបង្ហាញស្នាដៃសិស្ស និស្សិត របស់គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ, ការតាំងបង្ហាញសមិទ្ធផលនានារបស់ក្រសួងស្ថាប័ន ក្រុមហ៊ុនឯកជន អង្គការ សមាគម ការទទួលបានព័ត៌មានសិក្សាអំពីកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ១,៥លាននាក់ ព័ត៌មានអាហាររូបករណ៍ ដោយក្នុងនោះសិស្សនិស្សិត ឬសាធារណៈជនដែលចូលរួម អាចចុះឈ្មោះចូលរៀនភ្លាមៗបានដោយផ្ទាល់ និងអាច ដាក់ពាក្យស្វែងរកការងារភ្លាមៗជាមួយក្រុមហ៊ុនធំៗជាច្រើននៅក្នុងថ្ងៃនោះផងដែរ។
បន្ថែមពីនេះ ក៏មានរៀបចំកម្មវិធីប្រឡងធ្វើតេស្តវាយតម្លៃទទួលស្គាល់ការសិក្សាពីមុន និងសមត្ថភាពបច្ចុប្បន្ន , កម្មវិធីប្រកួតប្រជែងជ្រើសរើសសមិទ្ធផលស្នាដៃប្រកបដោយគំនិតច្នៃប្រឌិត និងនវានុវត្តន៍ថ្មី របស់សិស្ស និស្សិត មហាជន វិស័យឯកជន និងវិស័យពាក់ព័ន្ធ ដែលជាប្រយោជន៍ដល់ការស្រាវជ្រាវ និងបម្រើដល់វិស័យនានានៅក្នុងសង្គមផងដែរ ដោយបេក្ខជន បេក្ខនារី ដែលប្រឡងជាប់នឹងទទួលបានសញ្ញាបត្របញ្ជាក់សមត្ថភាព ហើយស្នាដៃដែលទទួលបានការគាំទ្រច្រើនជាងគេ នឹងទទួលបានរង្វាន់លើកទឹកចិត្ត ។ ហើយលើសពីនេះ ក្នុងកម្មវិធីទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៧ ក៏មានការចែករំលែកបទពិសោធន៍ពី វាគ្មិនជាតិ និងអន្តរជាតិ ព្រមទាំងមានកម្មវិធីកម្សាន្តសប្បាយជាច្រើនទៀត៕
