អវត្តមានសិស្ស​មក​កាន់សាលា​រៀន​ក្នុង​ឱកាសនៃពិធីបុណ្យ​ចូលឆ្នាំប្រពៃណីចិន-វៀតណាម មិនសូវមានច្រើនទៀត​នោះទេ ក្រោយពីអ្នកអាណាព្យាបាល ក៏​ដូចជាសិស្សានុសិស្ស មានការយល់ដឹងកាន់តែច្រើន​ ពិសេស​គឺការរឹតបន្តឹង ក៏​ដូចជា​ការ​ជូនដំណឹង​របស់​គណៈ​គ្រប់គ្រងសាលា។

លោក ឆុំ សុភក្តិ នាយក​វិទ្យាល័យព្រែកលៀប មានប្រសាសន៍ថា ក្នុងឱកាសនៃថ្ងៃពិធីបុណ្យចូលឆ្នាំប្រពៃណីចិននេះ គឺមិនមានការប្លែកគ្នាពីថ្ងៃធម្មតានោះទេ ដោយសាលានៅតែបើកដំណើរការរៀន និងបង្រៀនជាធម្មតា។ រីឯចំនួនសិស្សដែលមករៀននៅថ្ងៃបុណ្យចូលឆ្នាំចិននេះមានប្រមាណជាង៨០% នៃចំនួនសិស្សសរុប។

លោក ឆុំ សុភក្តិ បញ្ជាក់បន្ថែមថា មុនថ្ងៃចូលឆ្នាំចិន សាលាបានធ្វើការណែនាំដល់សិស្សានុសិស្ស ដោយបានផ្សព្វផ្សាយតាមរយៈលោកគ្រូអ្នកគ្រូ ប្រព័ន្ធផ្សព្វផ្សាយរបស់សាលា និងបោះព័ត៌មានចូលក្នុងក្រុមតេឡេក្រាមបន្ថែម ដើម្បីជាការជូនដំណឹងអំពីការដំណើរការរៀន និងបង្រៀនជាធម្មតានៅថ្ងៃចូលឆ្នាំចិនដោយមិនមានការឈប់សម្រាកនោះទេ។

នាយក​វិទ្យាល័យព្រែកលៀប យល់ថា នៅថ្ងៃចូលឆ្នាំចិន សិស្សានុសិស្ស ក៏ដូចជាលោកគ្រូអ្នកគ្រូ មិនគួរឈប់សម្រាកនោះទេ ក៏ព្រោះតែ ទី១ នៅក្នុងប្រតិទិនឈប់សម្រាកដែលចេញផ្សាយដោយរាជរដ្ឋាភិបាលគឺមិនមានការឈប់សម្រាកថ្ងៃចូលឆ្នាំចិននោះទេ, ទី២ ពិធីបុណ្យចូលឆ្នាំចិន គឺមិនមែនជាបុណ្យប្រពៃណីរបស់ខ្មែរនោះទេ, ទី៣. ក្រសួង មន្ទីរ និងអ្នកពាក់ព័ន្ធនានាជានិច្ចការតែងតែគិតគូរ និងបានបង្ហាញការយកចិត្តទុកដាក់ខ្ពស់ដល់ការសិក្សារបស់សិស្ស ដោយតែងតែមានជាការណែនាំដល់គ្រឹះស្ថានសិក្សាក្នុងការទប់ស្កាត់ការឈប់សម្រាកនៅថ្ងៃបុណ្យ ឬពិធីនានាដែលមិនមាននៅក្នុងប្រតិទិនឈប់សម្រាករបស់រាជរដ្ឋាភិបាល។

លោក ជក់ សុភា គ្រូបង្រៀនអក្សរសាស្រ្តខ្មែរ នៅសាលារៀនជំនាន់ថ្មី វិទ្យាល័យព្រែកលៀប មានប្រសាសន៍ថា នៅថ្ងៃបុណ្យចូលឆ្នាំចិន សម្រាប់សិស្សានុសិស្សមិនមែនជាថ្ងៃមួយដែលត្រូវឈប់សម្រាកនោះទេ ព្រោះប្រពៃណីចូលឆ្នាំខ្មែរនៅខែមេសា ទើបមានការឈប់សម្រាកកំណត់ក្នុងប្រតិទិន។ លោក សុភា បន្តថា គ្រូបង្រៀនគឺមានភារកិច្ចបង្រៀន និងលើកទឹកចិត្តឱ្យសិស្សមករៀនធម្មតា នៅថ្ងៃបុណ្យចូលឆ្នាំចិន។ ប៉ុន្តែសិស្សានុសិស្សក៏មានសិទ្ធិក្នុងការសុំច្បាប់ឈប់​សម្រាកតាមរយៈអាណាព្យាបាលជាអ្នកសុំច្បាប់។ លោកថា ថ្ងៃបុណ្យចូលឆ្នាំចិន សិស្សរបស់លោក សុំច្បាប់ចំនួន២នាក់ ដោយសារជាប់ខ្សែស្រឡាយចិន។

លោក ជក់ សុភា លើកឡើងទៀតថា សិស្សនុសិស្សក៏គួរប្រើប្រាស់ពេលវេលារៀនសូត្រឱ្យបានច្រើន ព្រោះនៅខែកុម្ភៈក៏ជិតដល់ពេលប្រឡងឆមាសទី១ដែរ។ លោក ជក់ សុភា ក៏ចង់ឱ្យប្អូនៗ ឬលោកគ្រូ អ្នកគ្រូ​ បំពេញភារកិច្ច ក៏ដូចជាការរៀន និងបង្រៀនឱ្យបានកាន់តែច្រើនកាន់តែល្អ ហើយសិស្សានុសិស្សក៏នឹងបានឈប់សម្រាករហូតដល់ទៅកន្លះខែ នៅពេលវិស្សមកាលតូចនៅខែមេសា។

ជាមួយគ្នានេះ កញ្ញា ញ៉ែម ស្រីលីន ជាគ្រូបង្រៀននៅសាលាចំណេះទូទៅវ៉ូជុង កម្ពុជា និយាយថា នៅសាលាដែលនាងបង្រៀនមិនសូវមានសិស្សឈប់ច្រើននោះទេ ​អំឡុងថ្ងៃបុណ្យចូលឆ្នាំចិន។

យ៉ាងណាមិញ កញ្ញា ញ៉ែម ស្រីលីន យល់ថា ការកំណត់វិន័យឈប់សម្រាក ថ្ងៃបុណ្យចូលឆ្នាំចិន គឺអាស្រ័យតាមសាលារៀននីមួយៗ ប្រសិនបើសាលារៀនមានគណៈគ្រប់គ្រង គ្រូបង្រៀន សិស្ស ជាប់ខ្សែស្រឡាយចិនច្រើន នោះសាលាអាចអនុញ្ញាតិឱ្យគ្រូឈប់ ឬសិស្សឈប់ តែចំពោះសាលា​ដែលមិនមានគណៈគ្រប់គ្រង គ្រូបង្រៀន សិស្ស ជាប់ខ្សែស្រឡាយចិន គឺអាចមិនអនុញ្ញាតិឱ្យគ្រូឈប់ ឬសិស្សឈប់ ក្នុងករណីមិនចាំបាច់ឡើយ។

សូមបញ្ជាក់ថា ពិធីបុណ្យចូលឆ្នាំថ្មីប្រពៃណីចិន និងវៀតណាម ប្រព្រឹត្តទៅចាប់ពីថ្ងៃទី២៨ ដល់ថ្ងៃទី៣០ ខែមករា ឆ្នាំ២០២៥៕