រាជរដ្ឋាភិបាល​កម្ពុជា កាលពីថ្ងៃពុធ បានបង្ហាញពី អនុក្រឹត្យស្តីពីការ​គ្រប់គ្រងទារកដ្ឋាន ដោយ​កំណត់​អំពីការ​គ្រប់គ្រង និង​លក្ខណវិនិច្ឆ័យ នៃការ​បង្កើត​ទារកដ្ឋាន​សម្រាប់​មើលថែទាំទារក និង​កុមារ​តូច ក្នុង​គោល​បំណង​ដើម្បីផ្តល់​ឱកាសដល់​ការលូតលាស់ និង​ការអភិវឌ្ឍ​គ្រប់ជ្រុងជ្រោយ ឆ្លើយតប​ទៅនឹង​តម្រូវ​ការ​ក្នុងការ​អភិវឌ្ឍមូលធន​មនុស្ស កាត់បន្ថយ​បន្ទុក និង​ផ្តល់​ពេលវេលា​ដល់មាតាបិតា ឬអ្នកអាណាព្យាបាល មាន​ឱកាស​ធ្វើ​ការងារ​រក​ប្រាក់ចំណូល និង​ប្រកបការងារផ្សេងៗ។

អនុក្រឹត្យនេះ មានវិសាលភាព​អនុវត្ត​ចំពោះ​ទារកដ្ឋានសហគមន៍ ទារកដ្ឋាន​សហគ្រាស និង​ទារកដ្ឋាន​ឯកជន ក្នុង​ព្រះរាជាណាចក្រ​កម្ពុជា។ ក្នុង​នោះ​ក្រសួងអប់រំ យុវជន និងកីឡា មានសមត្ថកិច្ច​គ្រប់គ្រង​ទារកដ្ឋានសហគមន៍ និង​ទារកដ្ឋាន​ឯកជន, ដោយ​ឡែក​ទារកដ្ឋានសហគ្រាស ត្រូវ​ស្ថិត​នៅ​ក្រោម​សមត្ថកច្ច​គ្រប់គ្រង​របស់ក្រសួងការងារ និង​បណ្តុះបណ្តាលវិជ្ជាជីវៈ។

តាម មាត្រា៨ ទារកដ្ឋានត្រូវមានទីតាំង​ស្ថិត​នៅ​ក្នុង​តំបន់​ដែល​មានបរិស្ថានល្អ ស្ងប់ស្ងាត់ សុវត្ថិភាព មានអនាម័យ មានខ្យល់ចេញចូល មានពន្លឺ​ព្រះអាទិត្យគ្រប់គ្រាន់ គ្មានសំឡេង​រំខាន និង​មានទឹកស្អាត​សម្រាប់ប្រើប្រាស់។ ទារកដ្ឋាន ក៏​ត្រូវ​មានអគារ​ដែលបែងចែក​ជា​បន្ទប់ផ្សេងៗ ត្រូវ​បំពាក់សម្ភារៈបរិក្ខាទារកដ្ឋាន និង​ត្រូវ​មានទីធ្លា​សម្រាប់ទារក និង​កុមារតូចលេង។ ទារកដ្ឋានត្រូវ​មានបន្ទប់ការងាររដ្ឋបាល បន្ទប់បំបៅ បន្ទប់ទឹកនិងបង្គន់ បន្ទប់ចម្អិន ឬកម្តៅ​អាហារ និងញ៉ាំអាហារ បន្ទប់សម្រាប់​ទារក និង​កុមារ​តូចគេង បន្ទប់សម្រាប់​ទារក និងកុមារតូចលេង បន្ទប់ ឬប្រអប់សង្រ្គោះបឋម។

ជាមួយគ្នា​ បើតាម មាត្រា៩ ទារកដ្ឋាន​ត្រូវ​មានផែនការយុទ្ធសាស្រ្តសម្រាប់អភិវឌ្ឍន៍រយៈពេល៣ឆ្នាំ ដែល​បញ្ជាក់អំពីចក្ខុវិស័យ បេសកកម្ម គោលបំណង គោលដៅ និងផែនការ​សកម្មភាព ដោយបង្ហាញ​អំពី​សកម្មភាព និងធនធាន​សម្រាប់គាំទ្រ និងអភិវឌ្ឍ។

ដោយឡែកបុគ្គលិកទារកដ្ឋាន ត្រូវ​មានគុណវុឌ្ឍិ និង​លក្ខណសម្បត្តិ​សក្តិសម ដើម្បីបម្រើការងារ​នៅ​ក្នុង​ទារកដ្ឋាន ហើយ​គុណវុឌ្ឍិ និង​លក្ខណសម្បត្តិនេះ ត្រូវ​កំណត់ដោយ​ប្រកាស​របស់ក្រសួងអប់រំ យុវជន និងកីឡា។

សម្រាប់ការមើលថែទារក និង​កុមារវិញ អនុក្រឹត្យ​បានកំណត់ឱ្យ​ប្រើប្រាស់បុគ្គលិក​ទារកដ្ឋានយ៉ាងតិច ៤នាក់ មើលថែទាំទារក និង​កុមារតូច ២៥នាក់។ ជាមួយ​គ្នា ទារកដ្ឋានក៏ត្រូវមានគោលការណ៍ណែនាំអំពី​ការ​ថែទាំ អប់រំ និង​ពិនិត្យសុខភាពទារក និង​កុមារតូច ដែលឆ្លុះបញ្ចាំង​អំពី​ការលើក​កម្ពស់​សុខុមាលភាព អាហារូបត្ថម្ភ ឱកាស និង​ការ​អភិវឌ្ឍ​សម្រាប់​ការ​រៀនសូត្រតាំងពីវ័យដំបូង ការ​ថែទាំប្រកប​ដោយ​ការ​ឆ្លើយតប និង​សុវត្ថិភាព។

តាម មាត្រា១៥ នៃអនុក្រឹត្យនេះ ទារកដ្ឋាន​ត្រូវ​មានកម្មវិធី​គាំពារ និងអភិវឌ្ឍ​ទារក និងកុមារតូច​សម្រាប់​នាំទារក និង​កុមារតូចលេង ឬធ្វើសកម្មភាព​នានា ដើម្បីគាំទ្រ​ការ​អភិវឌ្ឍ​គ្រប់ជ្រុងជ្រោយលើ ផ្នែករាងកាយ និង​សុខភាព, ផ្នែកវប្បធម៌ និង​សីលធម៌, ផ្នែកសង្គម និង​អារម្មណ៍, ផ្នែក​ការ​ពិចារណា និង​ការយល់ដឹង ព្រមទាំង​ផ្នែក​ភាសា។

តាមរយៈអនុក្រឹត្យ ស្តីពីការ​គ្រប់គ្រងទារកដ្ឋាននេះ រាជរដ្ឋភិបាល​បានផ្តល់សិទ្ធិ​ដល់ក្រសួងអប់រំ យុវជន និងកីឡា និងក្រសួង ស្ថាប័នពាក់ព័ន្ធ ចុះតាមដាន ត្រួតពិនិត្យ និង​វាយតម្លៃ ដើម្បីជួយ​ផ្នែក​បច្ចេកទេស​ដល់ទារកដ្ឋានសហគមន៍ ក៏​ដូចជា​ចុះតាមដាន ត្រួតពិនិត្យ វាយតម្លៃ ផ្តល់ការកែលម្អផ្នែកបច្ចេកទេស​ដល់ទារកដ្ឋានឯកជន។ ហើយ​ក្រសួងការងារ និង​បណ្តុះបណ្តាលវិជ្ជាជីវៈ ត្រូវ​ចុះតាមដាន ត្រួតពិនិត្យ និង​វាយតម្លៃ​ទារកដ្ឋានសហគ្រាស ស្របតាម​បទបញ្ញត្តិ​នៃច្បាប់ស្តីពី​ការងារ និង​លិខិតបទដ្ឋានគតិយុត្តជាធរមាន៕