ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ — ចំថ្ងៃទី២០ ខែឧសភា ដែលជាទិវាជាតិនៃការចងចាំ មជ្ឈមណ្ឌលធនធាន នៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) បានរៀបចំពិធីបើកពិព័រណ៍ស្តីអំពី “សំណងនៅចំពោះមុខអង្គជំនុំជម្រះវិសាមញ្ញក្នុងតុលាការកម្ពុជា” និងពិព័រណ៍សៀវភៅក្រោមប្រធានបទ “អក្សរសាស្ត្រ ប្រវត្តិសាស្ត្រដើម្បីការចងចាំ” នៅមជ្ឈមណ្ឌលធនធាន អ.វ.ត.ក.។
លោក ក្រាញ់ តូនី ប្រធានរដ្ឋបាលស្តីទី អ.វ.ត.ក. បានឱ្យដឹងថា ការរៀបចំពិព័រណ៍ទាំងពីរនេះ មិនត្រឹមតែជាការរំលឹកដល់ជនរងគ្រោះក្នុងរបបខ្មែរក្រហមប៉ុណ្ណោះទេ ប៉ុន្តែថែមទាំងជាការបន្តរក្សាកេរដំណែល នៃការចងចាំ ការអប់រំ និងការលើកកម្ពស់យុត្តិធម៌សម្រាប់យុវជនជំនាន់ក្រោយផងដែរ។
តាមរយៈការបង្ហាញគម្រោងសំណង និងការផ្សព្វផ្សាយឯកសារប្រវត្តិសាស្ត្រ សាធារណជននឹងយល់ដឹងកាន់តែច្បាស់អំពីតម្លៃ នៃសន្តិភាព ការផ្សះផ្សា និងការទទួលខុសត្រូវរួមក្នុងការអភិរក្សការចងចាំរបស់សង្គមកម្ពុជា
ពិព័រណ៍ស្តីអំពីសំណងនៅចំពោះមុខ អ.វ.ត.ក. បានដាក់តាំងបង្ហាញរូបថត ឯកសារ សក្ខីកម្ម និងផ្ទាំងព័ត៌មានអប់រំផ្សេងៗ ដែលបង្ហាញអំពីដំណើរការសំណង ចាប់ពីគោលការណ៍ រហូតដល់ការអនុវត្ត និងផលប៉ះពាល់ដល់ជនរងគ្រោះ និងសង្គមទាំងមូល។
ចំណែកពិព័រណ៍សៀវភៅក្រោមប្រធានបទ “អក្សរសាស្ត្រ ប្រវត្តិសាស្ត្រដើម្បីការចងចាំ” ផ្តោតលើការរំលឹកព្រឹត្តិការណ៍ក្នុងរបបខ្មែរក្រហម តាមរយៈសៀវភៅប្រវត្តិសាស្ត្រ ច្បាប់ និងឯកសារអប់រំផ្សេងៗ។ ពិព័រណ៍នេះមានការចូលរួមពីអ្នកនិពន្ធ បណ្ណាគារ បណ្ណាល័យ ស្ថាប័នអប់រំ និងអង្គការសង្គមស៊ីវិល ដោយមានស្តង់ដាក់លក់ និងចែកចាយសៀវភៅពាក់ព័ន្ធ។
ក្រៅពីនេះ កម្មវិធីក៏មានបទបង្ហាញ កិច្ចពិភាក្សា និងការចាក់បញ្ចាំងភាពយន្តឯកសារ ដើម្បីពង្រឹងការយល់ដឹងអំពីប្រវត្តិសាស្ត្រ និងយុត្តិធម៌អន្តរកាលផងដែរ។
កម្មវិធីពិព័រណ៍នេះនឹងប្រព្រឹត្តទៅរយៈពេល ៤ថ្ងៃ ចាប់ពីថ្ងៃទី២០ ដល់ថ្ងៃទី២៣ ខែឧសភា ឆ្នាំ២០២៦ ដោយរំពឹងថា នឹងមានការចូលរួមយ៉ាងទូលំទូលាយពីជនរងគ្រោះ យុវជន អ្នកស្រាវជ្រាវ និងសាធារណជន ដើម្បីរួមគ្នាឆ្លុះបញ្ចាំងអំពីសារៈសំខាន់ នៃការចងចាំ ការទទួលខុសត្រូវ និងការផ្សះផ្សានៅក្នុងសង្គមកម្ពុជា។
ពាក់ព័ន្ឋនឹងទិវាជាតិនៃការចងចាំ ២០ ឧសភានេះ ដែរ លោក ឆាំង យុ ប្រធានមជ្ឈមណ្ឌលឯកសារកម្ពុជាបានប្រាប់ AMS ថា អ្នករស់រានមានជីវិតពីសង្រ្គាម ឧក្រិដ្ឋកម្មប្រឆាំងមនុស្សជាតិ និងដំណាក់កាលផ្សេងទៀត នៃអំពើអមនុស្សធម៌ ឬការបង្អត់អាហារ និងសេរីភាពពីរបបប្រល័យពូជសាសន៍ខ្មែរក្រហមគឺជាវីរបុរស។ លោកបានសង្កត់ធ្ងន់ថា អ្នករស់រានមានជីវិតជាច្រើន បានឃើញផ្ទាល់ភ្នែក ឬថែមទាំងបានចូលរួមនៅក្នុងសកម្មភាពដ៏ឃោរឃៅយង់ឃ្នង ដែលបានរួមចំណែក ឬធ្វើឱ្យអំពើអមនុស្សធម៌ដែលខ្លួនផ្ទាល់ជាជនរងគ្រោះនោះ កាន់តែបន្តអូសបន្លាយទៅមុខ។
លោកមានប្រសាសន៍ថា « អ្នករស់រានមានជីវិតទាំងនោះគឺជាវីរបុរស ពីព្រោះអ្នកទាំងអស់បានលះបង់ទាំងសុខភាព សុវត្ថិភាព សេចក្តីសុខផ្ទាល់ខ្លួន និងអាយុជីវិត ដោយមិនមែនដើម្បីស្វែងរកផលប្រយោជន៍ រង្វាន់ ឬបុព្វសិទ្ធិណាមួយឡើយ ប៉ុន្តែគឺដើម្បីតម្រូវការចាំបាច់សម្រាប់ការរស់រានមានជីវិតរបស់ក្រុមគ្រួសារ សហគមន៍ និងជាតិសាសន៍របស់ខ្លួន»៕
