សិស្សកម្ពុជា​ជាង២រយនាក់ ចូលរួមប្រឡងគណិតវិទ្យាសិង្ហបុរី (SMC) ២០២៦ នៅខេត្តកំពត

សិស្សានុសិស្សកម្ពុជា ពីថ្នាក់បឋមសិក្សា ដល់ថ្នាក់វិទ្យាល័យប្រមាណជាង២រយនាក់ កាលពីចុងសប្តាហ៍នេះ (៤ តុលា)
បានចូលរួមប្រឡងគណិតវិទ្យាសិង្ហបុរី ២០២៦ (Singapore Math Challenge 2026) នៅសាលបូកគោ នៃសាលាខេត្តកំពត ក្រោម​ការរៀបចំដោយ ស.ស.យ.ក រាជធានីភ្នំពេញ សហការជាមួយ មជ្ឈមណ្ឌល ដឺ ប្រ៊េននីអេក ហ្វេកធើរី និងរដ្ឋបាលខេត្តកំពត ក្នុងការផ្តល់ឱកាសដល់សិស្សានុសិស្សតំបន់ឆ្នេរ បានសាកល្បងសមត្ថភាពគិតវិភាគ ដោះស្រាយបញ្ហា និងទទួលបានបទពិសោធពីការប្រកួតប្រជែងថ្នាក់អន្តរជាតិ។

លោក រិទ្ធិ ឆូរ៉ាន តំណាង ស.ស.យ.ក រាជធានីភ្នំពេញ មានប្រសាសន៍ថា កន្លងមក​គេធ្លាប់តែឃើញការប្រឡងគណិតវិទ្យាសិង្ហបុរី ត្រូវរៀបចំធ្វើនៅរាជធានីភ្នំពេញ ប៉ុន្តែលើកនេះ ស.ស.យ.ក រាជធានីភ្នំពេញ បាននាំយកមកធ្វើនៅខេត្តកំពត ដើម្បីសិក្សាស្វែងយល់ពីសមត្ថភាពរបស់សិស្សានុសិស្សនៅតំបន់ឆ្នេរ ដែលជាធនធានមានសក្ដានុពល មានសមត្ថភាព​ ប៉ុន្តែមិនទាន់មានឱកាសបញ្ចេញសមត្ថភាព។

លោក រិទ្ធិ ឆូរ៉ាន តំណាង ស.ស.យ.ក រាជធានីភ្នំពេញ

ជាមួយគ្នានេះ លោក ឆូរ៉ាន រំពឹងទុកថា​ តាមរយៈការប្រឡងតេស្តសមត្ថភាពគណិតវិទ្យាសិង្ហបុរី ២០២៦ សិស្សានុសិស្សមានភាគរយខ្ពស់ក្នុងការទទួលបានលទ្ធផលល្អ។

លោក សាន គីមស័ង​ នាយករង នៃមជ្ឈមណ្ឌល ដឺ ប្រ៊េននីអេក ហ្វេកធើរី លើកឡើងស្រដៀងនេះដែរថា ការនាំយកកម្មវិធីប្រឡងគណិតវិទ្យាសិង្ហបុរី ឆ្នាំ២០២៦ ធ្វើឡើងនៅក្នុងខេត្តកំពត ទី១. ដើម្បីជំរុញការស្រលាញ់គណិតវិទ្យា ក៏ដូចជាបើកឱកាសឱ្យសិស្សបានពង្រឹងសមត្ថភាពប្រឡងប្រកួតប្រជែងគណិតវិទ្យា ជាពិសេសគណិតវិទ្យាសិង្ហបុរី ដែលមានការទទួលស្គាល់ជុំវិញពិភពលោក, ទី២. បើកឱកាសឱ្យសិស្សនៅតាមបណ្តាខេត្តតំបន់ឆ្នេរ បានសាកល្បងតេស្តសមត្ថភាពគណិតវិទ្យាសិង្ហបុរី ដើម្បីវាស់ស្ទង់សមត្ថភាពជាមួយ​សិស្សពីបណ្ដាប្រទេសផ្សេងៗលើផ្នែកគណិតវិទ្យា។

លោក សាន គីមស័ង​ នាយករង នៃមជ្ឈមណ្ឌល ដឺ ប្រ៊េននីអេក ហ្វេកធើរី

នាយករង នៃមជ្ឈមណ្ឌល ដឺ ប្រ៊េននីអេក ហ្វេកធើរី បន្ថែមថា​ ចេញពីខេត្តកំពតនេះ លោកនឹងជំរុញឱ្យមានការប្រឡងគណិតវិទ្យាសិង្ហបុរី បន្ថែមទៀតនៅខេត្តផ្សេងៗ ដើម្បីផ្ដល់ឱកាសដល់សិស្សានុសិស្សគ្រប់បណ្ដាខេត្តអាចចូលរួមប្រឡងបានច្រើន ដូចនៅរាជធានីភ្នំពេញដែរ។

លោក គីមស័ង រំពឹងទុកថា តាមរយៈការបើកឱកាសឱ្យសិស្សបានចូលរួមប្រឡងគណិតវិទ្យាសិង្ហបុរីបែបនេះ នឹងជួយឱ្យសិស្សកម្ពុជា អាចដើរទន្ទឹមគ្នាជាមួយសិស្សមកពីបណ្ដាប្រទេសផ្សេងៗ ជាពិសេសសិស្សសិង្ហបុរី។ លោកថា កន្លងមក សិស្សកម្ពុជា ក៏ធ្លាប់ទទួលបានលទ្ធផលល្អ ដោយទទួលបានមេដាយមាស មេដាយប្រាក់ និងមេដាយសំរឹទ្ធិ ជាច្រើនរូបរួចមកហើយ ហើយក្នុងការប្រឡងលើកនេះ លោកសង្ឃឹមថា នឹងមានសិស្សកម្ពុជាជាប់ច្រើនដូចគ្នា។

លោក រិន វីរៈ អនុប្រធាន ស.ស.យ.ក ខេត្តកំពត បានបង្ហាញក្ដីរីករាយក្នុងការសម្របសម្រួលដល់សិស្សានុសិស្សដែលចូលរួមក្នុងការប្រឡងគណិតវិទ្យាសិង្ហបុរី ឆ្នាំ២០២៦ ក្នុងទឹកដីខេត្តកំពត។ លោកថា ការប្រឡងគណិតវិទ្យាសិង្ហបុរី ឆ្នាំ ២០២៦ នេះ ពិតជាមានសារៈសំខាន់ណាស់ ក្នុងការលើក​កម្ពស់វិស័យអប់រំ ជាពិសេសគឺការប្រឡងមុខវិជ្ជាគណិតវិទ្យា និងមួយទៀត ព្រឹត្តិការណ៍នេះ ក៏​ទាក់ទាញភ្ញៀវទេសចរមកសម្រាកលំហែកម្សាន្ត នៅខេត្តកំពតដែលជាគោលដៅទេសចរណ៍មួយដ៏សំខាន់ ពោលគឺឪពុកម្ដាយបានជូនកូនមកប្រឡងផង និងអាចជូនកូនដើរលេងកម្សាន្តក្នុងខេត្តកំពតផងដែរ។

លោក រិន វីរៈ អនុប្រធាន ស.ស.យ.ក ខេត្តកំពត

យុវតី ចិន្ដាប់ ដានីដែត សិស្សវិទ្យាល័យឯកជនឧត្តមវិជ្ជា ខេត្តកំពត និយាយថា រូបគេពិតជាមានអារម្មណ៍សប្បាយរីករាយដែលបានចូលរួមប្រឡងគណិតវិទ្យាសិង្ហបុរី ឆ្នាំ២០២៦ នៅខេត្តកំពត។ ដានីដែត បន្តថា តាមរយៈការចូលរួមប្រឡងគណិតវិទ្យាសិង្ហបុរី បានជួយឱ្យរូបគេទទួលបានបទពិសោធន៍ នៃការគិតលេខបានលឿនរហ័សជាងមុន និងយល់កាន់តែច្បាស់ពីតម្លៃនៃគណិតវិទ្យា។

យុវតី ចិន្ដាប់ ដានីដែត សិស្សវិទ្យាល័យឯកជនឧត្តមវិជ្ជា ខេត្តកំពត

ដោយឡែកយុវតី សេន សុពុទ្ធារី សិស្សថ្នាក់ទី៩ នៃវិទ្យាល័យចំណេះទូទៅ និងបច្ចេកទេស ព្រះបាទសម្តេចព្រះបរមនាថ នរោត្តម សីហមុនី ខេត្តកំពង់ឆ្នាំង ដែលបានចុះឈ្មោះប្រឡងគណិតវិទ្យាសិង្ហបុរី ឆ្នាំ២០២៦ នៅខេត្តកំពត និយាយថា ការដែលខ្លួន​ចុះឈ្មោះចូលរួមប្រឡងនេះ ព្រោះចង់អភិវឌ្ឍខ្លួនឯង និងចង់ទទួលបានបទពិសោធថ្មីៗ។ សុពុទ្ឋារី បានបង្ហាញពីបទពិសោធន៍ក្នុងការប្រឡងនេះថា វិញ្ញាសាប្រឡងគណិតវិទ្យាសិង្ហបុរី គឺមានភាពខុសប្លែកគ្នាពីការប្រឡងនៅសាលា ទោះលំហាត់លំបាកបន្តិចមែន តែរូបគេនៅតែខំប្រឹងធ្វើឱ្យអស់ពីសមត្ថភាព។

យុវតី សេន សុពុទ្ឋារី ជាសិស្សថ្នាក់ទី៩ នៃទ្យាល័យចំណេះទូទៅ និងបច្ចេកទេស ព្រះបាទសម្តេចព្រះបរមនាថ នរោត្តម សីហមុនី ខេត្តកំពង់ឆ្នាំង

យុវតី សេន សុពុទ្ឋារី បន្ថែមថា កន្លងមកខ្លួនធ្លាប់ឃើញការប្រឡងគណិតវិទ្យាសិង្ហបុរី ធ្វើនៅភ្នំពេញ ប៉ុន្តែនៅពេលរៀបចំការប្រឡងនៅខេត្តកំពតបែបនេះ គឺអាចផ្ដល់ឱកាសដល់សិស្សនៅខេត្តកំពត និងសិស្សនៅខេត្តផ្សេងៗទៀតមានឱកាសចូលរួមបានច្រើន។

អ្នកស្រី ចាប សុជាតា អាណាព្យាបាលសិស្សនៅខេត្តកំពត និយាយថា ការចុះឈ្មោះឱ្យកូនប្រឡងគណិតវិទ្យាសិង្ហបុរី នេះ ព្រោះអ្នកស្រីចង់ឱ្យកូនមានភាពក្លាហាន ចូលក្នុងសង្គម និងទទួលបានបទពិសោធពីការតេស្តសមត្ថភាពគណិតវិទ្យាបែបអន្តរជាតិ ដើម្បីងាយស្រួលក្នុងការបំពេញចំណុចខ្វះខាតបន្ថែម។ អ្នកស្រី សុជាតា បន្តថា ការរៀបចំការប្រឡងនៅខេត្តកំពតនេះពិតជាល្អ ព្រោះបានផ្ដល់ភាពងាយស្រួលដល់សិស្សនៅក្នុងតំបន់អាចមកប្រឡងវ៉ាស់ស្ទង់សមត្ថភាព។

ដោយឡែក អ្នកស្រី សុខ ស្រីមុំ ដែលជាអាណាព្យាបាល នៅរាជធានីភ្នំពេញ លើកឡើងដែរថា អ្នកស្រីបានជូនកូនមកប្រឡងគណិតវិទ្យាសិង្ហបុរី នៅខេត្តកំពត ព្រោះចង់ឱ្យកូនបានចូលរួមវ៉ាស់ស្ទង់សមត្ថភាពគណិតវិទ្យាផង និងជាឱកាសជូនកូនមកដើរលេងកម្សាន្តនៅតំបន់ទេសចរណ៍ក្នុងខេត្តកំពតផងដែរ។

អ្នកស្រី សុខ ស្រីមុំ អាណាព្យាបាល នៅភ្នំពេញ

លោក គឹម សុខា ប្រធានការិយាល័យប្រឡង នៃមន្ទីរអប់រំ យុវជន និងកីឡា ខេត្តកំពត មានប្រសាសន៍ថា​ ចំពោះសិស្សានុសិស្សដែលបានចុះឈ្មោះប្រឡងគណិតវិទ្យាសិង្ហបុរី ឆ្នាំ២០២៦ នេះ សុទ្ធសឹងតែមានសមត្ថភាពខ្លាំងពូកែផ្នែកគណិតវិទ្យា និងចង់វ៉ាស់ស្ទង់សមត្ថភាពគណិតវិទ្យាកម្រិតអន្តរជាតិ។ លោកថា នេះជាចំណុចមួយដែលបណ្ដុះឱ្យសិស្សានុសិស្សខិតខំប្រឹងប្រែងរៀនមុខវិជ្ជាវិទ្យាសាស្ត្រ ជាពិសេសមុខវិជ្ជាគណិតវិទ្យា៕




របាយការណ៍ថ្មី

មើលទាំងអស់ ➧

ព័ត៌មានទូទៅ

មើលទាំងអស់ ➧

អាហារូបករណ៍ថ្នាក់វេជ្ជបណ្ឌិតវេជ្ជសាស្ត្រនៅសាធារណរដ្ឋគុយបា ឆ្នាំសិក្សា២០២៥-២០២៦

ព័ត៌មានអាហារូបករណ៍, ព្រឹត្តិការណ៍

• 27/01/2025

ក្រសួងអប់រំ យុវជន និងកីឡា ប្រកាសជ្រើសរើសសាធារណជនប្រឡងប្រជែងយកអាហារូបករណ៍ ទៅសិក្សាថ្នាក់វេជ្ជបណ្ឌិតវេជ្ជសាស្ត្រនៅសាធារណរដ្ឋគុយបា សម្រាប់ឆ្នាំសិក្សា២០២៥-២០២៦។ ការប្រឡងជ្រើសរើសបេក្ខជនចំនួន ១នាក់...

អាហារូបករណ៍ម៉ាណាគី ទៅសិក្សា​នៅប្រទេស​ណូវែលហ្សេឡង់ឆ្នាំ២០២៦

ព័ត៌មានអាហារូបករណ៍, ព្រឹត្តិការណ៍

• 03/03/2026

ស្ថានទូតណូវែលហ្សេឡង់ប្រចាំកម្ពុជា កាលពីថ្ងៃទី១ ខែមីនា បានប្រកាសផ្តល់អាហារូបករណ៍ Manaaki New Zealand Scholarships សម្រាប់ឆ្នាំ២០២៦ ដល់ប្រជាជន​កម្ពុជា។

ឱកាសសិក្សាអាហារូបករណ៍ថ្នាក់ឧត្ដមសិក្សាពីអាហារូបករណ៍ Lindenwood University Scholarship 2026

ព័ត៌មានអាហារូបករណ៍, ព្រឹត្តិការណ៍

• 29/07/2025

កម្មវិធីអាហារូបករណ៍ Lindenwood University 2026 កំពុងបើកទទួលពាក្យអាហារូបករណ៍ថ្នាក់ឧត្ដមសិក្សានៅសាកលវិទ្យាល័យ Lindenwood សម្រាប់និស្សិតអន្តរជាតិ ក្នុងឆ្នាំសិក្សា២០២៦ នៅសហរដ្ឋអាមេរិក។

ឱកាសសិក្សាវគ្គខ្លីឌីជីថល និងភាពធននៃប្រព័ន្ធ TVET ពីកម្មវិធីអូស្រ្តាលី-អាស៊ាន

ព័ត៌មានអាហារូបករណ៍, ព្រឹត្តិការណ៍

• 04/09/2023

ឱកាសសិក្សាអាហារូបករណ៍វគ្គខ្លីឌីជីថល និងភាពធននៃប្រព័ន្ធTVET ពីកម្មវិធីអូស្រ្តាលី-អាស៊ាន ឬ Aus4ASEAN ។ ការសិក្សាផ្ដល់ជូនសម្រាប់ពលរដ្ឋក្នុងប្រទេសសមាជិកអាស៊ានដែលចូលរួម...

អាហារូបករណ៍ថ្នាក់បរិញ្ញាបត្រ និងថ្នាក់ក្រោយឧត្តម ទៅសិក្សា​នៅប្រទេសវៀតណាម

ព័ត៌មានអាហារូបករណ៍, ព្រឹត្តិការណ៍

• 06/05/2026

សម្រាប់សិស្សនិស្សិត​ដែលចង់បន្តការសិក្សាថ្នាក់បរិញ្ញាបត្រ ក៏​ដូចជាថ្នាក់ក្រោយ​ឧត្តមសិក្សានៅ​ក្រៅប្រទេស, ពេលនេះ ក្រសួងអប់រំ យុវជន និងកីឡា បានប្រកាស​​ជ្រើសរើស​និស្សិត​អាហារូបករណ៍ដល់​ទៅ ១២០​កន្លែង...

វិទ្យាស្ថានពហុបច្ចេកទេស​ខេត្តបន្ទាយមានជ័យ ផ្តល់អាហារូបករណ៍២៥០កន្លែង​សម្រាប់សិស្សធ្លាក់ ឬជាប់បាក់ឌុប

ព័ត៌មានអាហារូបករណ៍, ព្រឹត្តិការណ៍

• 10/12/2024

ជាឱកាស​សម្រាប់​សិស្សានុសិស្ស​ដែលទើបប្រឡង​បញ្ចប់សញ្ញាបត្រ​មធ្យមសិក្សា​ទុតិយភូមិ ឬបាក់ឌុប វិទ្យាស្ថាន​ពហុបច្ចេកទេស​ខេត្តបន្ទាយមានជ័យ​ ប្រកាស​ផ្តល់អាហារូបករណ៍​ចំនួន​២៥០កន្លែងសម្រាប់កម្រិត​សញ្ញាបត្រ​ជាន់ខ្ពស់​បច្ចេកទេស ឬបរិញ្ញាបត្ររង។

ឱកាសសិក្សា​ជំនាញកក់សំបុត្រយន្តហោះ ឥតគិតថ្លៃ

ព័ត៌មានអាហារូបករណ៍, ព្រឹត្តិការណ៍

• 17/02/2025

ដើម្បីចូលរួម​ពង្រឹងគុណភាពសេវាកម្ម និង​ការ​អភិវឌ្ឍ​សមត្ថភាព និង​ជំនាញថ្មី​ដល់យុវជន សិស្ស និស្សិត និង​អ្នក​បម្រើ​ការក្នុងឧស្សាហកម្ម​ទេសចរណ៍ ជាពិសេស​ជំនាញកក់សំបុត្រយន្តហោះ ក្រសួងទេសចរណ៍ បានប្រកាស​ដល់​អ្នក​បម្រើ​ការ​ក្នុងវិស័យ...

រដ្ឋមន្រ្តីអប់រំផ្តល់អាហារូបករណ៍ ១០០% នៅវិទ្យាស្ថានគរុកោសល្យ​បាត់ដំបង ជូនដល់​កូនៗ​របស់វីរៈកងទ័ពកម្ពុជា

ព័ត៌មានអាហារូបករណ៍, ព្រឹត្តិការណ៍

• 04/08/2025

វិទ្យាស្ថានគរុកោសល្យ​បាត់ដំបង បានប្រកាស​ជូនដំណឹង​ដល់​ក្រុមគ្រួសារវីរៈកងទ័ព​កម្ពុជា ដែល​បាន​ពលីជីវិត​ក្នុង​បុព្វ​ហេតុ​ការពារ​បុរណភាព​ទឹកដីថា វិទ្យាស្ថាន​បានសម្រេច​ផ្តល់ជូនអាហារូបករណ៍ ១០០%

ឱកាសអាហារូបករណ៍សម្រាប់និស្សិតកំពុងសិក្សាឆ្នាំទី១ ឬឆ្នាំទី២ នៅសាកលវិទ្យាល័យចំនួន៩របស់កម្ពុជា

ព័ត៌មានអាហារូបករណ៍, ព្រឹត្តិការណ៍

• 03/04/2026

ឱកាស​សម្រាប់និស្សិត​ដែល​កំពុង​សិក្សា​ឆ្នាំទី១ ឬឆ្នាំទី២ ថ្នាក់បរិញ្ញាបត្រ ក្នុងការ​ទទួលបាន​អាហារូបករណ៍ពេញលេញក្នុងការសិក្សា ពីកម្មវិធីអាហារូបករណ៍ Maybank។