ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
និន្នាការសង្គមថ្មីៗនេះ (Trend) ច្រើនលើកឡើងពីបញ្ហាគម្លាតជំនាន់នៅលើបណ្ដាញសង្គម ទាក់ទងនឹង របៀបគិត របៀបធ្វើការ ដែលធ្វើឱ្យពួកគេពិបាកចុះសម្រុងគ្នានៅកន្លែងការងារ។ ករណីនេះ អ្នកជំនាញអប់រំ យល់ថា សុជីវធម៌នៃការរស់នៅ ទើបជាកត្តាជំរុញឱ្យការធ្វើការចុះសម្រុងគ្នា មិនមែនដោយសារគម្លាតជំនាន់ Gen Y និង Gen Z នោះឡើយ។
មនុស្សជំនាន់ Y ឬ GenY គឺសំដៅលើក្រុមមនុស្សដែលកើតនៅចន្លោះឆ្នាំ១៩៨១ ដល់ ១៩៩៦ និងមនុស្សជំនាន់ Z ឬ Gen Z ជាក្រុមមនុស្សកើតនៅចន្លោះឆ្នាំ១៩៩៧ ដល់ ២០១២។
លោក គីម ដារ៉ា ស្ថាបនិកសាលាបង្វឹក Startup Community មានប្រសាសន៍ថា កត្តាដែលនាំឱ្យ Gen Y និង Gen Z ធ្វើការមិនចុះសម្រុងគ្នានៅកន្លែងធ្វើការ គឺដោយសាររបត់វប្បធម៌ នៃការយល់ឃើញខុសគ្នា ដែលនាំឱ្យទម្រង់ នៃការគិតមិនសូវត្រូវគ្នា ប៉ុន្តែក៏នៅតែអាចធ្វើការជាមួយគ្នាបាន។ លោក គីម ដារ៉ា បន្តថា ទោះជា Gen Y ដូចគ្នា ឬ Gen Z ដូចគ្នា ក៏អាចធ្វើការមិនចុះសម្រុងគ្នាដែរ បើគ្មានសុជីវធម៌ នៃការរស់នៅ ឬអត់ទទួលស្គាល់ភាពខុសគ្នា នៃរបៀបគិត ឬរបៀបធ្វើការ។
ស្ថាបនិកសាលាបង្វឹក Startup Community បន្ថែមថា ទាំង Gen Y និង Gen Z បើសិនជាមានសុជីវធម៌រស់នៅល្អដូចគ្នា វប្បធម៌ដូចគ្នា នោះនឹងធ្វើការចុះសម្រុងគ្នា បើទោះជាជនជាតិផ្សេងគ្នាក៏ដោយ ក៏អាចធ្វើការចុះសម្រុងគ្នាបានដែរ។ «កាលណាយើងអត់គោរពគ្នា យើងអត់មានសុជីវធម៌ យើងអត់គោរពភាពខុសគ្នា យើងធ្វើការមិនចុះសម្រុងគ្នាទេ»។
លោកលើជាឧទាហរណ៍ថា អ្នកអាយុច្រើន គួរហៅគេ បង, គោរពតាមឋានៈ, ចេះប្រើពាក្យគួរសម ជំរាបសួរ អរគុណ សុំទោស គឺអាចធ្វើការជាមួយគ្នាដោយគ្មានការប្រកាន់ ព្រោះសុជីវធម៌រៀនគ្រប់ជំនាន់ ប៉ុន្តែបញ្ហានៅកន្លែងធ្វើការ កើតឡើងដោយសារការខ្វះសុជីវធម៌។
លោក គីម ដារ៉ា ទទួលស្គាល់ថា ចំណុចពិសេសរបស់ Gen Z គឺកើតមកអំឡុងពេលបច្ចេកវិទ្យារីកចម្រើន យល់ដឹងបានលឿន ចេះភាសាបរទេសច្រើន ស្គាល់របស់ថ្មីៗទាន់ពិភពលោកបានលឿនជាងមនុស្សជំនាន់ Y ប៉ុន្តែអ្វីដែល Gen Z ត្រូវអភិវឌ្ឍបន្ថែម គឺការគ្រប់គ្រងអារម្មណ៍ គ្រប់គ្រងការគិត ការសេពគប់ត្រូវ និងត្រូវមានសុជីវធម៌ សីលធម៌បន្ថែមទៀត ដើម្បីភាពជោគជ័យធំរបស់ខ្លួននាពេលអនាគត។
ជាមួយគ្នានេះ លោក ហ៊ុយ បញ្ញាចេស្ដា ស្ថាបនិក The SEED ដែលក៏ត្រូវចាត់ទុកថា ជាយុវជន Gen Z មួយរូបដែរ លើកឡើងថា អ្នកធ្វើការ តែងឆ្លងកាត់រវាងអ្នកមានបទពិសោធ និងគ្មានបទពិសោធ ហើយក្នុងការធ្វើការតែងមានការប៉ះទង្គិចគ្នាទៅវិញទៅមក ការនិយាយមិនយល់គ្នា មិនគោរពគ្នាទៅវិញទៅមកជាដើម ប៉ុន្តែនៅលើបណ្ដាញសង្គម Gen Z ហាក់មានភាពល្បីល្បាញខ្លាំង នៅពេលមានបញ្ហាអ្វីមួយលើកមកវែកញែក។
ក្នុងនាមជា Gen Z មួយរូប និងជាអ្នកគ្រប់គ្រងបុគ្គលិក Gen Z ដែរ លោក បញ្ញាចេស្ដា យល់ថា មិនមែនដោយសារកត្តាជំនាន់ខុសគ្នាធ្វើឱ្យប៉ះទង្គិចគ្នានៅកន្លែងធ្វើការទេ ប៉ុន្តែវាពាក់ព័ន្ធនឹងកត្តាបុគ្គល បទពិសោធ និងអត្តចរិតទៅវិញទេ។
គួរជំរាបជូនថា Gen Z ធំឡើងជាមួយនឹងប្រព័ន្ធផ្សព្វផ្សាយ បច្ចេកវិទ្យាដ៏វៃឆ្លាត និងជំនាញខាងប្រើប្រាស់អ៊ីនធឺណិតច្រើនជាង Gen Y ។ អ្នកស្រាវជ្រាវ ក៏បានសង្កេតឃើញពីបំណងប្រាថ្នារបស់ក្រុមមនុស្ស Gen Z គឺចង់បានការអប់រំ និងស្ថិរភាពហិរញ្ញវត្ថុផ្ទាល់ខ្លួន ដោយប្រើប្រាស់សមត្ថភាពខ្លួនឯង ឧស្សាហ៍ព្យាយាម និងមានការអប់រំល្អផងដែរ៕
