ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ គ្រោងនឹងបង្កើតវិទ្យាស្ថានគរុកោសល្យកំពង់ចាម ដោយបញ្ចូលគ្នារវាងមជ្ឈមណ្ឌលគរុកោសល្យភូមិភាគ និងសាលាគរុកោសល្យ និងវិក្រិតការខេត្តកំពង់ចាម។ គម្រោងនេះ ត្រូវរំពឹងថា នឹងជួយលើកកម្ពស់គុណវុឌ្ឍិគ្រូបង្រៀននៅក្នុងតំបន់ឱ្យកាន់តែល្អប្រសើរ។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា គម្រោងនេះ គឺស្របទៅតាមកំណែទម្រង់របស់ក្រសួងអប់រំ ដោយក្រសួងបានធ្វើការរួមបញ្ចូលគ្រឹះស្ថានពីរបញ្ចូលគ្នាប្រែក្លាយទៅជាវិទ្យាស្ថានគរុកោសល្យកំពង់ចាម ក្នុងគោលដៅដើម្បីអាចធានាបាននូវការបណ្ដុះបណ្ដាលគ្រូកម្រិតបឋមសិក្សា និងកម្រិតអនុវិទ្យាល័យស្របទៅតាមក្របខ័ណ្ឌកម្មវិធីសិក្សាថ្មី ១២+៤ ឬបរិញ្ញាបត្រ+១។
លោកជំទាវ បន្តថា ក្រៅពីការលើកកម្ពស់គុណវុឌ្ឍិគ្រូបង្រៀនដែលត្រៀមខ្លួនក្លាយទៅជាគ្រូបង្រៀនហើយនោះ វិទ្យាស្ថានគរុកោសល្យ ក៏ត្រូវតែមានតួនាទីមួយទៀត គឺការលើកកម្ពស់សមត្ថភាពគ្រូបង្រៀនដែលកំពុងតែបំពេញការងារ ការត្រៀមលក្ខណៈដំឡើងគុណវុឌ្ឍិគ្រូ ១២+២ ឱ្យមានបរិញ្ញាបត្រនៅក្នុងពេលអនាគត ក៏ដូចជាការបំពេញតួនាទីនៅក្នុងការផ្តល់វគ្គអភិវឌ្ឍន៍វិជ្ជាជីវៈជាប្រចាំ។
ជាក់ស្តែង នៅក្នុងគោលនយោបាយរបស់ក្រសួង បានតម្រូវឱ្យគ្រូបង្រៀនម្នាក់ត្រូវរៀនឱ្យបាន ១០០ម៉ោងបន្ថែមទៀត ដើម្បីមានវិធីសាស្ត្របង្រៀន ក៏ដូចជាដឹងអំពីបច្ចុប្បន្នភាពសំខាន់ៗក្នុងការកែលំអការរៀន និងបង្រៀននៅតាមសាលារៀន ពោលគឺជួយឱ្យគុណភាពអប់រំនៅតាមសាលារៀនមានភាពប្រសើរឡើង ស្របតាមការកំណត់របស់ក្រសួងអប់រំ ដែលបានកំណត់ថា គ្រូបង្រៀនទាំងអស់ចាប់ពីកម្រិតបឋមសិក្សាទៅ ត្រូវមានគុណវុឌ្ឍិយ៉ាងហោចណាស់ចាប់ពីកម្រិតបរិញ្ញាបត្រឡើងទៅ។
លោកជំទាវ ឃួន វិច្ឆិកា មានប្រសាសន៍ថា «ពីមុនសាលាគរុកោសល្យ និងវិក្រិតការខេត្តកំពង់ចាម គឺទទួលបន្ទុកនៅក្នុងការបណ្ដុះបណ្ដាលគ្រូកម្រិតបឋមសិក្សា ១២+២ រីឯមជ្ឈមណ្ឌលភូមិភាគ មានតួនាទីបណ្ដុះបណ្ដាលគ្រូកម្រិតវិទ្យាល័យ ១២+២ ដូចគ្នា ប៉ុន្តែចាប់ពីឆ្នាំ២០២៦ នេះតទៅ ក្រសួងអប់រំនឹងមិនអនុវត្តកម្មវិធី ១២+២ ទៀតនោះទេ លើកលែងតែមត្តេយ្យសាលាដែលនៅអនុវត្តកម្មវិធី១២+២ នេះ»។
លោកជំទាវអ្នកនាំពាក្យអះអាងថា គម្រោងបង្កើតវិទ្យាស្ថានគរុកោសល្យកំពង់ចាម គឺជាគម្រោងទី៣ ហើយ ដោយកន្លងមក JICA ក៏បានគាំទ្រនៅក្នុងការប្រែក្លាយមជ្ឈមណ្ឌល និងគរុកោសល្យនៅខេត្តបាត់ដំបងឱ្យក្លាយទៅជាវិទ្យាស្ថានគរុកោសល្យបាត់ដំបង ក៏ដូចជានៅទីក្រុងភ្នំពេញ ដូច្នេះ គិតមកទល់ពេលនេះ មានចំនួន ៣ វិទ្យាស្ថានរួចហើយដែលក្រសួងបានប្រែក្លាយ គឺ នៅរាជធានីភ្នំពេញ ខេត្តបាត់ដំបង និងខេត្តកំពង់ចាម។
សូមជម្រាបថា កាលពីពេលថ្មីៗនេះ រដ្ឋាភិបាលជប៉ុន តាមរយៈរដ្ឋមន្ត្រីក្រសួងការបរទេសកម្ពុជា បានសម្រេចផ្តល់ហិរញ្ញប្បទានឥតសំណងចំនួន ១.១៨៩.០០០.០០០ យ៉េន ឬស្មើប្រមាណ ៨ លានដុល្លារអាម៉េរិក ដល់កម្ពុជា លើគម្រោងបង្កើតវិទ្យាស្ថានគរុកោសល្យ នៅខេត្តកំពង់ចាម។ បើតាមក្រសួងការបរទេសកម្ពុជា ការផ្តល់ហិរញ្ញប្បទានឥតសំណងរបស់ជប៉ុននេះ បញ្ជាក់ឱ្យឃើញពីភាពជាដៃគូយ៉ាងរឹងមាំ និងការប្តេជ្ញាចិត្តរបស់ជប៉ុន ក្នុងការចូលរួមចំណែកដល់ការអភិវឌ្ឍធនធានមនុស្ស និងវិស័យអប់រំនៅកម្ពុជា៕
អត្ថបទ ៖ ឌិន ថារី
