ក្នុងវេទិកាអប់រំរវាងកម្ពុជា និងអូស្ត្រាលី កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ជាងបីទសវត្សរ៍មកនេះ បញ្ញវន្តកម្ពុជាលើសពី ១ពាន់នាក់បានបន្តការសិក្សាកម្រិតបរិញ្ញាបត្រ និងបរិញ្ញាបត្រជាន់ខ្ពស់នៅគ្រឹះស្ថានឧត្តមសិក្សានានានៅប្រទេសអូស្ត្រាលី។

ឯកឧត្តមបណ្ឌិតសភាចារ្យបន្ថែមថា មានសាលាអូស្ត្រាលីមួយចំនួនត្រូវបានបង្កើតឡើង និងកំពុងដំណើរការយ៉ាងសកម្មនៅក្នុងប្រទេសកម្ពុជា ដែលផ្តល់នូវការអប់រំស្តង់ដាអូស្ត្រាលីប្រកបដោយគុណភាព ហើយ​ជាមួយ​គ្នា​ឯកឧត្តមរដ្ឋមន្ត្រីក្រសួងអប់រំ ក៏បានលើកទឹកចិត្តតំណាងគ្រឹះស្ថានឧត្តមសិក្សាកម្ពុជា និងអូស្ត្រាលីឱ្យបន្តស្វែងរកឱកាសថ្មីៗដើម្បីចូលរួមក្នុងការពិភាក្សាឈានទៅបង្កើតកិច្ចសហប្រតិបត្តិការបន្ថែមទៀតក្នុងវិស័យសំខាន់ៗដូចជា ការកសាងសមត្ថភាព, ការពង្រឹងគ្រឹះស្ថាន, ការអភិវឌ្ឍជំនាញត្រៀមខ្លួនសម្រាប់ឧស្សាហកម្ម, ការអប់រំឌីជីថល, ការអប់រំ STEM, បញ្ញាសិប្បនិមិ្មត(AI), កម្មវិធីផ្លាស់ប្តូរការសិក្សា និងគំនិតផ្តួចផ្តើមស្រាវជ្រាវរួមគ្នាជាដើម។

ឯកឧត្តមបណ្ឌិតសភាចារ្យ ហង់ជួន ណារ៉ុន ក៏បានគូសបញ្ជាក់ពីទំនុកចិត្តលើជំនាញ និងបទពិសោធក្នុងវិស័យអប់រំដ៏មានគុណភាពរបស់អូស្ត្រាលី ហើយ​ឯកឧត្តមបណ្ឌិតសភាចារ្យ ក៏រំពឹងដែរថា វេទិកាអប់រំរវាងកម្ពុជា និងអូស្ត្រាលី នឹងបើកនូវទំព័រថ្មីនៃកិច្ចសហប្រតិបត្តិការជាច្រើនលើវិស័យអប់រំរវាងប្រទេសទាំងពីរ ដោយជំរុញការច្នៃប្រឌិត នាំមកនូវផលប្រយោជន៍ និងពង្រឹងការយល់ដឹងពីគ្នាទៅវិញទៅមក រួមចំណែកដល់ការអភិវឌ្ឍប្រកបដោយចីរភាព វិបុលភាព ឆ្លើយតបនឹងយុទ្ធសាស្ត្រអភិវឌ្ឍធនធានមនុស្សរបស់រាជរដ្ឋាភិបាលកម្ពុជា ឆ្ពោះទៅសម្រេចចក្ខុវិស័យកម្ពុជាឆ្នាំ២០៣០ និង ២០៥០។

ជាមួយគ្នានេះ ឯកឧត្តម Derek Yip ឯកអគ្គរដ្ឋទូតអូស្ត្រាលីប្រចាំព្រះរាជាណាចក្រកម្ពុជា លើកឡើងថា វេទិកាអប់រំរវាងកម្ពុជា និងអូស្ត្រាលី បង្កើតឡើងក្នុងគោលបំណងដើម្បីជំរុញការផ្សារភ្ជាប់ទំនាក់ទំនង ស្វែងរកកាលានុវត្តភាពក្នុងការរួមបញ្ចូលដំណោះស្រាយសិក្សាប្រកបដោយភាពច្នៃប្រឌិតនៅកម្ពុជា និងជំរុញភាពជាដៃគូរវាងស្ថាប័ន/គ្រឹះស្ថានសិក្សានានារបស់កម្ពុជា និងអូស្ត្រាលី ឈានទៅបង្កើតកម្មវិធីសិក្សារួមគ្នា Dual Degree ឬ វគ្គសិក្សាអនឡាញ ដែលជួយដល់ការអភិវឌ្ឍជំនាញ និងលើកទឹកចិត្តដល់អ្នកចូលរួមទាំងអស់ឱ្យទាញយកអត្ថប្រយោជន៍យ៉ាងសម្បូរបែប។

បើតាមរបាយការណ៍របស់ក្រសួងការបរទេស និងពាណិជ្ជកម្មអូស្ត្រាលី ចាប់តាំងពីឆ្នាំ១៩៩៤ មក ប្រជាជនកម្ពុជាជាង៨៥០នាក់ បានទៅសិក្សានៅប្រទេសអូស្ត្រាលី តាមរយៈកម្មវិធីអាហារូបករណ៍ Australia Awards ។ ក្នុងឆ្នាំ២០១៩ ប្រជាជនកម្ពុជាប្រហែល ៣ពាន់នាក់បានចុះឈ្មោះចូលរៀននៅក្នុងស្ថាប័នអប់រំអូស្ត្រាលី ដែលធ្វើឱ្យប្រទេសអូស្ដ្រាលីក្លាយជាគោលដៅសិក្សាដែលពេញនិយមបំផុតសម្រាប់និស្សិតកម្ពុជា។

គិតចាប់ពីខែមករា ដល់ខែកញ្ញា ឆ្នាំ២០២៣ មានសិស្ស-និស្សិតកម្ពុជាចំនួន ៣៣២៣នាក់ បានទៅសិក្សានៅប្រទេសអូស្ដ្រាលី ដែលចំនួននេះកើនឡើង២០% បើប្រៀបធៀបទៅនឹងឆ្នាំ២០២២។ សិស្សកម្ពុជា ដែលទៅសិក្សានៅប្រទេសអូស្ដ្រាលី បាននឹងកំពុងសិក្សានៅសាកលវិទ្យាល័យ វិទ្យាល័យ និងកម្មវិធីសិក្សាជាច្រើនទៀត៕