និយាយដល់ការសន្សំលុយ ប្រហែលជាសិស្ស និស្សិតបានដឹងជាច្រើនមកហើយ តាមរយៈការសន្សំលុយនៅក្នុងកូនជ្រូក សន្សំជាមួយអ្នកដែលទុកចិត្ត ដូចជា ម្ដាយ បងស្រីជាដើម ដើម្បីធានាថាលុយដែលសន្សំនោះនឹងមិនដកចាយវាយផ្ដេសផ្ដាស។ ទន្ទឹមគ្នានេះ ដើម្បីអាចសន្សំលុយមានប្រសិទ្ធភាព​ ព្រមទាំងអាចទទួលបានអត្រាការប្រាក់ខ្ពស់រយៈពេលវែង ដែលសិស្សនិងនិស្សិត គួរដឹងអំពីរបៀបសន្សំលុយ ដើម្បីអាចជួយឱ្យសម្រេចគោលដៅអនាគតរបស់ខ្លួន។

លោក ឡាំង មាំ នាយកនៃនាយកដ្ឋានឌីជីថល ធនាគារ មេយប៊ែង ខេមបូឌា មានប្រសាសន៍ថា ការសន្សំលុយ គឺចាំបាច់ត្រូវតែបង្កើតឱ្យទៅជាទម្លាប់។ លោកថា ការមានទម្លាប់ក្នុងការសន្សំលុយ នឹងជួយឱ្យការសន្សំមានប្រសិទ្ធភាព។ លោក ឡាំង មាំ បានប្រាប់ពីបទពិសោធន៍របស់លោក ដោយនៅពេលលោកចាប់ផ្ដើមចេញធ្វើការដំបូង លោកមានគំនិតសន្សំលុយ ប៉ុន្តែការសន្សំនោះទុកនៅជាមួយបងស្រីជួយមើលការខុសត្រូវ។ ក្រោយពេលលោក ចាប់ផ្ដើមប្ដូរកន្លែងការងារមកធ្វើការក្នុងវិស័យធនាគារ លោកក៏សម្រេចចិត្តសន្សំលុយ នៅក្នុងធនាគារដែលមានអជ្ញាបណ្ណត្រឹមត្រូវ និងទទួលបានអត្រាការប្រាក់ខ្ពស់។ ទាំងនេះ គឺជាជម្រើសរើសល្អមួយសម្រាប់លោក ក្នុងការសន្សំលុយ ដែលទទួលបានទំនុកចិត្ត គុណភាព និងទឹកប្រាក់កើនឡើង។

នាយកនៃនាយកដ្ឋានឌីជីថល ធនាគារ មេយប៊ែង ខេមបូឌា បញ្ជាក់បន្ថែមថា ការសន្សំលុយនៅក្នុងធនាគារ ជាជម្រើសមួយល្អសម្រាប់សិស្ស និស្សិត ក្នុងការពិចារណា និងសិក្សាបន្ថែមទៅលើសុវត្ថិភាព និងគុណប្រយោជន៍នាពេលអនាគត។ លោក ឡាំង មាំ បន្តថា ប្រសិនបើយើងសន្សំប្រាក់ក្នុងធនាគារមួយខែ ១០០ដុល្លារ បូករួម អត្រាការប្រាក់ ៥ភាគរយ នោះក្នុងរយៈពេលមួយឆ្នាំ យើងនឹងទទួលបានប្រាក់សរុបចំនួន ១ម៉ឺន៥ពាន់ដុល្លារ ពោលគឺចំណេញអត្រាការប្រាក់ប្រមាណ ៣ពាន់ដុល្លារ។

បើតាម លោក ឡាំង មាំ ការសន្សំលុយក្នុងធនាគារ ជួយលោកបានច្រើនដោយមិនបារម្ភចំពោះហានិភ័យកើតឡើង បើទោះជាលោកឈប់ធ្វើការ ក៏អាចមានថវិកាសម្រាប់ផ្គត់ផ្គង់ការសិក្សារបស់កូន ការពារស្ថេរភាពហិរញ្ញវត្ថុ និងជួយឱ្យមានទំនុកចិត្ត ព្រោះមានទ្រព្យបម្រុងទុក។

អ្នកស្រី នុត រត្ថា នាយិកាប្រតិបត្តិ ក្រុមហ៊ុន អប្សរា មេឌា សឺវីស (AMS) លើកឡើងដែរថា ដើម្បីអាចជួយឱ្យសិស្ស និស្សិតសន្សំលុយបាន ចាំបាច់ត្រូវមានវិន័យក្នុងការចាយវាយ។ អ្នកស្រីបន្តថា កាលណាមានចំណូលប្រចាំខែ ទោះតិច ឬច្រើន ត្រូវបែងចែកថ្លៃចំណាយ ទៅលើអាហារ ទឹក ភ្លើង ចាំបាច់ជាមុនសិន។ ចំណែក ការចាយវាយលើរបស់ដែលយើងស្រឡាញ់ប៉ុន្តែមិនចាំបាច់ ត្រូវតែចេះទប់ចិត្តឱ្យបាន ព្រោះសម័យអនឡាញមានការទាក់ទាញអារម្មណ៍ច្រើន រួមទាំងការបញ្ចុះតម្លៃលើផលិតផង។ អ្នកស្រីបន្តថា សម្រាប់ការទិញឥវ៉ាន់ ឬរបស់ប្រើប្រាស់អ្វីមួយ យុវជនត្រូវស្វែងរកផលិតផលដូចហាងដទៃទៀត ប៉ុន្តែតម្លៃទាបជាង ឬអាចតថ្លៃ ហើយច្រើនទិញនៅអាទិត្យទី៣ ដើម្បីដាក់វិន័យសម្រាប់ខ្លួនឯងនៅពេលមានលុយតិចតួច។

ក្រៅពីការចំណាយមិនចាំបាច់ យើងក៏អាចកាត់បន្ថយការកម្សាន្តណាដែលនាំឱ្យចំណាយច្រើន រួមទាំងទំនាក់ទំនង។ ជាពិសេស គួរភ្ជាប់ទំនាក់ទំនងជាមួយមនុស្សដែលពូកែសន្សំ និងមានផែនការហិរញ្ញវត្ថុច្បាស់លាស់។

សម្រាប់ លោក កុក ថា អគ្គនាយកនៃក្រុមហ៊ុន អេហ្វ អេច អេហ្វ ឃែភីថល ម.ក មានប្រសាសន៍ថា ដើម្បីចូលរួមចំណែកជួយដល់សិស្សនិស្សិត ដែលមានបំណងចង់បន្តការសិក្សា ប៉ុន្តែពុំមានលទ្ធភាពដោយសារជីវភាពគ្រួសារមានការខ្វះខាត ពួកគាត់អាចទទួលបានឱកាសស្នើរកម្ចីរសម្រាប់ចំណាយលើការសិក្សា សម្ភារៈសិក្សា មធ្យោបាយធ្វើដំណើរជាដើម។ លោក កុក ថា និយាយថា គ្រឹះស្ថានរបស់លោកលើកទឹកចិត្តឱ្យសិស្សនិស្សិតទទួលយកសេវាកម្ចីរសម្រាប់ការសិក្សាប៉ុណ្ណោះ ដោយមិនលើកទឹកចិត្តឱ្យប្រើក្នុងគោលបំណងសម្ភារៈនិយមនោះទេ។

គួរជម្រាបជូនថា ការអប់រំអំពីមូលដ្ឋានគ្រឹះហិរញ្ញវត្ថុ ផ្តល់ឱ្យសិស្សនិស្សិតនូវចំណេះដឹងសំខាន់ៗអំពីថវិកា ការសន្សំ និងការគ្រប់គ្រងហិរញ្ញវត្ថុផ្ទាល់ខ្លួនប្រកបដោយប្រសិទ្ធភាព។ ទន្ទឹមគ្នានេះ ស្វែងយល់អំពីមូលដ្ឋានគ្រឹះនៃការវិនិយោគ និងផែនការចូលនិវត្តន៍ ដើម្បីលើកទឹកចិត្តដល់ការរៀបចំហិរញ្ញវត្ថុរយៈពេលវែង៕