ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កិច្ចសន្ទនាទស្សនាវដ្តីពិភពលោកសហសម័យកម្ពុជា (CWC) ក្នុងឆ្នាំ២០២៦នេះ បានរៀបចំឡើងក្រោមប្រធានបទ “កម្ពុជាសហសម័យក្នុងទេសភាពសកលដែលកំពុងផ្លាស់ប្តូរ”។ កិច្ចសន្ទនានេះ បានរួមចំណែកជំរុញឱ្យយុវជនកម្ពុជា-ចិន ផ្លាស់ប្តូរការយល់ដឹងជាសកល និងបង្កើនសមត្ថភាពជាអ្នកដឹកនាំជំនាន់ក្រោយប្រកបដោយសក្ដានុពលនាពេលអនាគត។
ក្នុងឱកាសថ្លែងសុន្ទរកថាបិទ កាលពីថ្ងៃអង្គារ ទី១៩ ខែឧសភា ឆ្នាំ២០២៦ ឯកឧត្តម សុខ សូកេន រដ្ឋមន្ត្រីក្រសួងអធិការកិច្ច និងជាអនុប្រធានក្រុមប្រឹក្សាភិបាលផ្ទះយុវជន ដើម្បីមិត្តភាពកម្ពុជា-ចិន (YHCCF) មានប្រសាសន៍ថា កិច្ចពិភាក្សានេះ ជាចលករដ៏សំខាន់ក្នុងការតភ្ជាប់ថ្នាក់ដឹកនាំវ័យក្មេង ជំរុញការផ្លាស់ប្ដូរយុវជន វប្បធម៌ និងការស្រាវជ្រាវ ដើម្បីពង្រឹងមិត្តភាព និងកិច្ចសហប្រតិបត្តិការជាក់ស្ដែងរវាងប្រជាជន និងប្រជាជននៃប្រទេសកម្ពុជា-ចិន។
រដ្ឋមន្ត្រីក្រសួងអធិការកិច្ច ក៏បានផ្ដល់នូវទស្សនទានជាយុទ្ធសាស្ត្រ ដោយផ្ដោតលើការប្រកាន់ខ្ជាប់សណ្ដាប់ធ្នាប់អន្តរជាតិផ្អែកលើច្បាប់ ការបន្តវិនិយោគលើសក្ដានុពលយុវជន ការអប់រំ និងការស្រាវជ្រាវ ការបង្កើនការផ្លាស់ប្ដូរវប្បធម៌ និងការតភ្ជាប់ប្រជាជន និងប្រជាជន ព្រមទាំងការពង្រឹងប្រព័ន្ធពហុភាគីនិយម កិច្ចសហប្រតិបត្តិការតំបន់ និងការរស់នៅជាមួយគ្នាដោយសន្តិសហវិជ្ជមាន។
ឯកឧត្តម សុខ សូកេន ជឿជាក់ថា វេទិកានេះ នឹងបន្តរីកលូតលាស់ជាគ្រឹះដ៏រឹងមាំក្នុងការជំរុញការផ្លាស់ប្ដូរចំណេះដឹង បណ្ដុះស្មារតីទទួលខុសត្រូវរួម និងពង្រឹងមិត្តភាពកម្ពុជា-ចិន ឱ្យកាន់តែស្ថិតស្ថេរនិងមានផ្លែផ្កាគួរជាទីមោទនៈតទៅអនាគត។
នៅក្នុងកិច្ចពិភាក្សាដែលមានការចូលរួមពីអ្នកសិក្សាស្រាវជ្រាវ និងអ្នកជំនាញ បានជជែកពីគន្លងអភិវឌ្ឍន៍របស់ប្រទេសកម្ពុជា ក្របខ័ណ្ឌកិច្ចសហប្រតិបត្តិការក្នុងតំបន់ ការចូលរួមរបស់យុវជន និងផលប៉ះពាល់នៃការផ្លាស់ប្តូរសកលលើប្រទេសកម្ពុជា និងសកល។ លើសពីនេះ សារៈសំខាន់នៃភាពអាចសម្របខ្លួនជាយុទ្ធសាស្ត្រ កិច្ចសហការស្ថាប័នកាន់តែរឹងមាំ និងកិច្ចសន្ទនាសិក្សា និងគោលនយោបាយកាន់តែប្រសើរឡើងក្នុងការដោះស្រាយបញ្ហាប្រឈមក្នុងតំបន់ និងអន្តរជាតិដែលកំពុងលេចចេញជារូបរាង ក៏ត្រូវបានពិភាក្សាផងដែរ។
កញ្ញា ម៉េង សុខឃីម ជាសិស្សមកពីសាលា CamAsean លើកឡើងថា កិច្ចសន្ទនាទស្សនាវដ្ដីសហសម័យកម្ពុជា ២០២៦ គឺជាកម្មវិធីដ៏ល្អមួយដែលយុវជនគ្រប់រូបអាចចូលរួមស្វែងយល់ពីវិស័យការទូត ឬទំនាក់ទំនងអន្តរជាតិ និងគោលនយោបាយផ្សេងៗក្នុងការដោះស្រាយបញ្ហាប្រឈមក្នុងតំបន់ និងអន្តរជាតិដែលកំពុងកើតឡើង។
គួរជំរាបជូនថា កិច្ចសន្ទនាទស្សនាវដ្ដីសហសម័យកម្ពុជា ២០២៦ ត្រូវរៀបចំដោយអង្គការផ្ទះយុវជន ដើម្បីមិត្តភាពកម្ពុជា-ចិន (YHCCF) សហការជាមួយមជ្ឈមណ្ឌលអភិវឌ្ឍន៍កម្ពុជា (CD-Center) និងទស្សនាវដ្តីពិភពលោកសហសម័យ ព្រមទាំងមានការចូលរួមពីមន្ត្រីរដ្ឋាភិបាល អ្នកសិក្សាស្រាវជ្រាវ អ្នកជំនាញផ្នែកប្រព័ន្ធផ្សព្វផ្សាយ អ្នកអនុវត្តការអភិវឌ្ឍន៍ និងតំណាងយុវជន ដើម្បីផ្លាស់ប្តូរទស្សនៈស្តីពីតួនាទីវិវត្តរបស់កម្ពុជាក្នុងទិដ្ឋភាពតំបន់ និងពិភពលោក៕
