ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សាលាហេបភីច័ន្ទតារា (Happy Chandara School) បានរៀបចំទិវា «ស្អាត និងបៃតង» នៅបរិវេណសាលា ស្ថិតក្នុងខណ្ឌច្បារអំពៅ រាជធានីភ្នំពេញ កាលពីថ្ងៃទី៦ មិថុនា ចុងសប្តាហ៍កន្លងទៅនេះ ដើម្បីលើកកម្ពស់ការយល់ដឹងអំពីការការពារបរិស្ថាន និងជំរុញការចូលរួមរបស់យុវជន ជាពិសេសក្មេងស្រី ក្នុងការឆ្លើយតបនឹងការប្រែប្រួលអាកាសធាតុ។
កម្មវិធីនេះត្រូវបានរៀបចំឡើងស្របនឹងទិវាបរិស្ថានពិភពលោក និងគោលដៅអភិវឌ្ឍន៍ប្រកបដោយចីរភាពទី១៣ របស់អង្គការសហប្រជាជាតិ ស្តីពីសកម្មភាពអាកាសធាតុ ក្រោមប្រធានបទ «ការអំពាវនាវជាសកលសម្រាប់សកម្មភាពអាកាសធាតុ»។
តាមសាលាហេបភីច័ន្ទតារា កម្មវិធីនេះមានគោលបំណងបង្កើនការយល់ដឹងអំពីបញ្ហាបរិស្ថាន លើកទឹកចិត្តឱ្យយុវជនអនុវត្តទម្លាប់រស់នៅប្រកបដោយចីរភាព ដូចជាគោលការណ៍ «5Rs» កាត់បន្ថយការប្រើប្រាស់ ការប្រើប្រាស់ឡើងវិញ និងការកែច្នៃសំណល់ ព្រមទាំងអភិវឌ្ឍជំនាញភាពជាអ្នកដឹកនាំ និងការធ្វើការងារជាក្រុម។
ក្នុងកម្មវិធីនេះ អ្នកចូលរួមបានធ្វើសកម្មភាពដើររើសសំរាមនៅភូមិព្រែកថ្មី និងទស្សនកិច្ចទៅកាន់កសិដ្ឋានសាលាដើម្បីសិក្សាអំពីការធ្វើជីកំប៉ុស។ បន្ទាប់មក មានវេទិកាពិភាក្សាស្តីពីសកម្មភាពអាកាសធាតុ និងការចាក់បញ្ចាំងភាពយន្តឯកសារពាក់ព័ន្ធនឹងបរិស្ថាន។
នៅពេលរសៀល អ្នកចូលរួមបានទស្សនាស្តង់តាំងពិព័រណ៍ និងសកម្មភាពអប់រំជាច្រើន ព្រមទាំងចូលរួមសិក្ខាសាលាអនុវត្តជាក់ស្តែង ដូចជា ការកែច្នៃប្លាស្ទិក និងក្រណាត់ប្រើរួច ការកែច្នៃក្រដាស ការផលិតទឹកលាងសម្លៀកបំពាក់ពីវត្ថុធាតុធម្មជាតិ និងការចម្អិនអាហារបួសជាដើម។
សូមជម្រាបថា កម្មវិធីនេះមានអ្នកចូលរួមប្រមាណ ៤១០នាក់ ក្នុងនោះមានយុវជនប្រមាណ ៣៤០នាក់។ ក្រៅពីសិស្ស និងអ្នកស្ម័គ្រចិត្តរបស់សាលាហេបភីច័ន្ទតារា ក៏មានការចូលរួមពីសិស្សមកពីអនុវិទ្យាល័យព្រែកថ្មី អនុវិទ្យាល័យឫស្សីស្រុក អង្គការ Pour un Sourire d’Enfant (PSE) និងវិទ្យាស្ថានបច្ចេកវិទ្យាកម្ពុជា (ITC) ផងដែរ។
ព្រឹត្តិការណ៍នេះក៏មានការចូលរួមពីអាជ្ញាធរមូលដ្ឋាន និងដៃគូជំនាញផ្នែកបរិស្ថានជាច្រើន រួមមាន One Earth One Ocean, Kärcher, Niset Plastic និង Gomi Recycle។
សាលាហេបភីច័ន្ទតារា រំពឹងថា សកម្មភាព «ស្អាត និងបៃតង» នឹងជួយជំរុញការយល់ដឹង និងការចូលរួមរបស់យុវជនក្នុងការថែរក្សាបរិស្ថាន ព្រមទាំងរួមចំណែកកសាងសហគមន៍ដែលមានភាពស្អាត បៃតង និងប្រកបដោយចីរភាពសម្រាប់មនុស្សជំនាន់ក្រោយ។
បច្ចុប្បន្ន សាលាហេបភីច័ន្ទតារា កំពុងផ្តល់ការអប់រំដល់ក្មេងស្រីជាង ១,៧០០ នាក់ ហើយទទួលសិស្សថ្មីប្រមាណ ១០០ នាក់ជារៀងរាល់ឆ្នាំ។ ក្រៅពីការអប់រំកម្រិតមូលដ្ឋាន សិស្សទាំងនោះក៏ទទួលបានការគាំទ្របន្តរហូតដល់ថ្នាក់ឧត្តមសិក្សា ការបណ្តុះបណ្តាលវិជ្ជាជីវៈ និងការស្វែងរកការងារធ្វើ បន្ទាប់ពីបញ្ចប់ការសិក្សាផងដែរ៕
