ភ្នំពេញ – ដើម្បីលើកស្ទួយទេពកោសល្យសិល្បៈ និងគំនិតច្នៃប្រឌិតរបស់សិស្សានុសិស្សថ្នាក់មធ្យមសិក្សាលើវិស័យសិល្បៈគំនូរ សំដៅរួមចំណែកអភិវឌ្ឍវិស័យវប្បធម៌ជាតិឱ្យបានរុងរឿងទៅអនាគត និងក្នុងគោលបំណងជ្រើសរើសយកស្នាដៃសិល្បៈគំនូរល្អឯក ដើម្បីចូលរួមតាំងពិព័រណ៍នៅប្រទេសជប៉ុន នៅថ្ងៃទី០២ ខែសីហា ឆ្នាំ២០២៣ ខាងមុខ សាកលវិទ្យាល័យកម្ពុជា មូលនិធិអន្តរជាតិដើម្បីសិល្បៈ និងវប្បធម៌ (IFAC) នៃទីក្រុងតូក្យូប្រទេសជប៉ុន ក្រោម​ការ​ឧបត្ថម្ភ​ពី បានប្រកាស​បើក «មហោស្រពសិល្បៈគំនូរសិស្សានុសិស្ស​ថ្នាក់មធ្យ​ម​សិក្សា​ឆ្នាំ​២០២៣»។

មូលបទមូលបទនៃការប្រកួតប្រជែងស្នាដៃសិល្បៈនេះ ប្រមូលផ្តុំទៅលើខ្លឹមសារសំខាន់ៗដូចជា៖ ១- ការលើកស្ទួយសប្បុរសធម៌ និងមនុស្សធម៌, ២- ការថែរក្សាសន្តិភាព និងការអភិវឌ្ឍ, ៣- សហប្រតិបត្តិការអន្តរជាតិ, ៤- ទស្សនៈថ្មីចំពោះពិភពលោក, ៥- ការថែរក្សា និងការពារបេតិកភ័ណ្ឌវប្បធម៌ជាតិ។

លក្ខខណ្ឌនៃការចូលរួម បេក្ខជនត្រូវតែជាសិស្សដែលកំពុងសិក្សានៅថ្នាក់មធ្យមសិក្សា មានអាយុចន្លោះពី១៥ឆ្នាំ ដល់ ១៨ឆ្នាំ, ស្នាដៃសិល្បៈគំនូរ ចាំបាច់ត្រូវមានទំហំ ១០០ ស.ម x ១០០ ស.ម។ ក្នុងនោះ បេក្ខជនជ័យលាភីត្រូវមានលិខិតឆ្លងដែនដោយខ្លួនឯងនិងមានសុពលភាពលើសពី៦ខែ។

បេក្ខជនទទួលបានរង្វាន់ជ័យលាភីលេខ១ ក្នុងការប្រកួតប្រជែងនេះនឹងបានទៅធ្វើទស្សនកិច្ចនៅប្រទេសជប៉ុនចំនួន ៣ថ្ងៃ ក្នុងមហោស្រពសិល្បៈ នៅទីក្រុងតូក្យូប្រទេសជប៉ុន។ រាល់ការចំណាយក្នុងពេលទស្សនកិច្ច ដូចជា ការស្នាក់នៅ ម្ហូបអាហារ មធ្យោបាយធ្វើដំណើររួមទាំងសំបុត្រយន្តហោះទៅមកគឺជាបន្ទុករបស់អ្នករៀបចំ។

សិស្សានុសិស្សថ្នាក់មធ្យមសិក្សាទាំងអស់ដែលមានឧបនិស្ស័យខាងគំនូរគ្រប់ប្រភេទអាចចុះឈ្មោះបំពេញទម្រង់បែបបទដោយភ្ជាប់មកជាមួយស្នាដៃគំនូរ ព្រមទាំងអត្ថន័យខ្លឹមសាររបស់ស្នាដៃដើម្បីប្រកួតប្រជែង។ កាលបរិច្ឆេទឈប់ទទួលពាក្យស្នើសុំត្រឹមថ្ងៃទី១៥ ខែមីនា ឆ្នាំ២០២៣ វេលាម៉ោង៥:០០ល្ងាច។ ការប្រកួតប្រជែងធ្វើឡើងនៅថ្ងៃទី១៨ ខែមីនា ឆ្នាំ២០២៣ វេលាម៉ោង ៧:៣០ ព្រឹក។ ប្រកាសលទ្ធផលនៅថ្ងៃទី២៤ ខែមីនា ឆ្នាំ២០២៣ វេលាម៉ោង ២:៣០នាទីរសៀល៕