ការថែទាំខ្លួន និងកសាងភាពធន់សម្រាប់ខ្លួន​ឯង គឺជាជំនាញចាំបាច់សម្រាប់ការកសាងទំនុកចិត្ត។ ជំនាញទាំងពីរនេះ អាចជួយមនុស្សឱ្យមានសមត្ថភាពទប់ទល់នឹងភាពតានតឹង យកឈ្នះលើបញ្ហាប្រឈមនានា និងរក្សាទស្សនវិស័យវិជ្ជមាន។ ការសិក្សាបង្ហាញថា ដើម្បីថែរក្សាខ្លួន​ឯង និងកសាងភាពធន់ អ្នកអាចអនុវត្តសកម្មភាពចំនួន ៥ ក្នុងការរស់នៅប្រចាំថ្ងៃ។

១. កំណត់អ្វីដែលអ្នកចង់បាន ៖ ជំហានដំបូងក្នុងការថែរក្សាខ្លួន​ឯង គឺត្រូវកំណត់ពីតម្រូវការ និងគោលដៅអាទិភាព​ ដែលអ្នកចង់សម្រេចបាន។ ចំណុចនេះមានន័យថា ត្រូវទទួលស្គាល់អ្វី ដែលធ្វើឱ្យអ្នកមានអារម្មណ៍សប្បាយរីករាយ មានសុខភាពល្អ និងមានភាពស្កប់ស្កល់ ហើយអ្វីដែលធ្វើឱ្យអ្នកបាត់បង់ថាមពល មានអារម្មណ៍មិនល្អ និងគ្មានកម្លាំងជំរុញ។ ការស្គាល់ពីតម្រូវការខ្លួនឯង ផ្នែករាងកាយ អារម្មណ៍ ទំនាក់ទំនងសង្គម ផ្លូវចិត្ត ជីវិតផ្ទាល់ខ្លួន និងការងារ អាចធ្វើឱ្យអ្នកងាយស្រួលរៀបចំផែនការអនុវត្ត ហើយអាចសម្រេចផែនការនោះបានដោយជោគជ័យ។ 

២.  អភិវឌ្ឍទម្លាប់ ៖ ទមា្លប់អាចជួយអ្នកឱ្យថែទាំខ្លួនឯង និងមានភាពធន់ តាមរយៈការអនុវត្តបានត្រឹមត្រូវ មានវិន័យ និងភាពទៀងទាត់។ ទមា្លប់ល្អ អាចជួយអ្នកឱ្យជៀសផុតការពន្យារពេល ការបែកអារម្មណ៍ និងពិបាកសម្រេចចិត្ត។ អ្នកអាចបង្កើតទម្លាប់មួយដែលសាកសមនឹងរបៀបរស់នៅ ចំណូលចិត្ត និងគោលដៅរបស់អ្នក ហើយត្រូវប្រាកដថា ទម្លាប់នោះជាផ្នែកនៃការលើកកម្ពស់សុខុមាលភាពរបស់អ្នក។ ជាក់ស្ដែង អ្នកអាចចាប់ផ្ដើម សរសេរកំណត់ហេតុ ធ្វើលំហាត់ប្រាណ សម្មាធិ ញ៉ាំអាហារសុខភាព អានសៀវភៅ ឬស្ដាប់តន្ត្រី និងមានទំនាក់ទំនងវិជ្ជមានក្នុងសង្គមជាដើម។

៣. គ្រប់គ្រងភាពតានតឹង ៖ ការតានតឹងអំឡុងពេលបំពេញការងារ និងជីវិតប្រចាំថ្ងៃ គឺជារឿង ដែលជៀសមិនរួច វាអាចប៉ះពាល់ដល់ទំនុកចិត្ត និងសុខភាពរបស់អ្នក ប្រសិនបើអ្នកគ្រប់គ្រងវាមិនបានល្អ។ ដូច្នេះ អ្នកចាំបាច់ត្រូវមានបច្ចេកទេសគ្រប់គ្រងស្ត្រស ដើម្បីធ្វើឱ្យចិត្តអ្នកស្ងប់ ខួរក្បាលគិតបានច្បាស់ ហើយរាងកាយមានកម្លាំងដោះស្រាយបញ្ហាផ្សេងៗ។ អ្នកអាចអនុវត្តបច្ចេកទេសដូចជា ដកដង្ហើមវែងៗ សម្រាកសាច់ដុំ សម្មាធិ និងនិយាយពាក្យវិជ្ជមានមកខ្លួនឯង។

៤. រៀនពីឧបសគ្គ ៖ ឧបសគ្គ គឺជាផ្នែកមួយនៃជីវិតរបស់យើងគ្រប់គ្នា ប៉ុន្តែទិដ្ឋភាពនេះ មិនបានកំណត់ពីសមត្ថភាព ឬទំនុកចិត្តរបស់អ្នកនោះទេ។ ជំនួសឱ្យការមើលឃើញថា ការឆ្លងកាត់ឧបសគ្គមិនបានគឺជាភាពបរាជ័យ អ្នកអាចចាត់ទុកថា នេះជាឱកាស ដើម្បីរៀនសូត្រ ពង្រឹងសមត្ថភាព និងកែលម្អខ្លួនឱ្យប្រសើរឡើង។ ចំណុចនេះមានន័យថា អ្នកអាចអភិវឌ្ឍសមត្ថភាព បង្កើតដំណោះស្រាយថ្មីៗ និងស្គាល់កាន់តែច្បាស់អំពីចំណុចខ្លាំង និងចំណុចខ្សោយខ្លួនឯង។

៥. រក្សាទំនាក់ទំនងវិជ្ជមាន ៖ ទំនាក់ទំនង គឺជាប្រភពសំខាន់នៃការថែរក្សាខ្លួន​ឯង និងការកសាងភាពធន់។ មិត្តភក្ដិរបស់អ្នក អាចជាអ្នកគាំទ្រ ផ្ដល់មតិស្ថាបនា លើកទឹកចិត្ត និងសហការ។ ការរក្សាបានទំនាក់ទំនងវិជ្ជមាន នឹងជួយឱ្យអ្នកមានអារម្មណ៍ថា មានតម្លៃ យល់ចិត្ត និងការពេញចិត្តពីមនុស្សជុំវិញ។ ដើម្បីរក្សាទំនាក់ទំនងវិជ្ជមាន ប្រកបដោយគុណភាពជាមួយគ្រួសារ មិត្តភក្ដិ មិត្តរួមការងារ និងអ្នកណែនាំ អ្នកអាចបង្ហាញសេចក្ដីដឹងគុណ ការកោតសរសើរ និងក្ដីស្រឡាញ់៕