ទិវាភពផែនដី គឺជាព្រឹត្តិការណ៍ដែលពិភពលោក​តែង​ប្រារព្ធធ្វើ​នៅរៀងរាល់ខែមេសា ក្នុងវត្ថុបំណងការពារបរិស្ថាន និងលើកទឹកចិត្តមនុស្សឱ្យគិតគូរអំពីសកម្មភាពប្រចាំថ្ងៃដើម្បីកុំឱ្យប្រព្រឹត្តទង្វើដែលប៉ះពាល់ខ្លាំងដល់ធម្មជាតិ ឬរួមគ្នាកាត់បន្ថយប្លាស្ទិកតាមដែលអាចធ្វើបាន និងចូលរួមគិតអំពីរស់នៅប្រកបដោយនិរន្តរភាព ឬគិតអនាគតសម្រាប់មនុស្សជំនាន់ក្រោយ។ ហើយនៅក្នុងឆ្នាំ២០២៤នេះ គេផ្តោតអំពី ភពផែនដី និងប្លាស្ទិក ( Planet vs. Plastics) ដែលជាទិវាមួយក្នុងការបញ្ជ្រាបអំពីការប្រើប្រាស់ប្លាស្ទិកផ្តល់ផលប៉ះពាល់ទៅកាន់បរិស្ថាន ការថែរក្សាធនធានធម្មជាតិ រក្សាព្រៃឈើ និងដំណោះស្រាយដើម្បីការពារភពផែនដី។

ទិវាភពផែនដីជាឱកាសដើម្បីបង្ហាញភាពជាគំរូ ក៏ដូចជាការប្តេជ្ញាចិត្តរបស់តួអង្គនីមួយៗដើម្បីការពារបរិស្ថាន លើកកម្ពស់ការរស់នៅប្រកបដោយនិរន្តរភាព រួមទាំងធានាឱ្យបាននូវអនាគតដែលល្អសម្រាប់អ្នកជំនាន់បន្ទាប់។ បន្ថែមពីនោះ ទិវាភពផែនដី ជាការឆ្លុះបញ្ចាំងអំពីភាពអន្តរាយ នៃបរិស្ថាន ផ្តល់ផលប៉ះពាល់មកកាន់ខ្លួនឯង និងមនុស្សជុំវិញខ្លួន។ ហើយជារៀងរាល់ឆ្នាំ ទិវាភពផែនដីតែងមានប្រធានបទជាក់លាក់មួយ ដើម្បីផ្តោតការយកចិត្តទុកដាក់ជាលក្ខណៈសកលចំពោះបញ្ហាបរិស្ថាន។ តើគេធ្វើសកម្មភាពអ្វីខ្លះនៅថ្ងៃទិវាផែនដី?

ចំពោះសកម្មភាពដែលត្រូវធ្វើនៅថ្ងៃនោះ គឺមានចម្រុះដូចជា៖

ដាំដើមឈើ ៖ ការរៀបចំព្រឹត្តិការណ៍ដាំដើមឈើឡើងវិញនៅក្នុងសហគមន៍ណាមួយ វាបានបង្កើនកន្លែងមួយដែលពោរពេញទៅដោយបរិយាកាសបៃតង និងប្រៀបដូចជាការកែច្នៃធ្វើឆ្លើយតបអំពីការកាប់បំផ្លាញព្រៃឈើទាំងឡាយកន្លងមក។

សម្អាតបរិស្ថាន ៖ កាលដែលមានផែនការយុទ្ធសាស្ត្រយុទ្ធនាការដើម្បីសម្អាតបរិស្ថាន ដោយសកម្មភាពដូចជា ការប្រមូលសំរាម ប្រមូលសំណល់ប្លាស្ទិកចេញពីឆ្នេរសមុទ្រ ទន្លេ បឹងបួរ និងតំបន់ធម្មជាតិ ឬតំបន់ទេសចរណ៍ជាដើម។

បង្កើតកម្មវិធី ឬសិក្ខាសាលា ៖ កាលដែលធ្វើជាអ្នកផ្តួចផ្តើមកម្មវិធីសិក្ខាសិលា ឬក៏ធ្វើជាអ្នកចូលរួមកម្មវិធីណាដែលផ្តោតលើការនិយាយអំពីបរិស្ថាន និងការអនុវត្តរបៀបរស់នៅប្រកបដោយនិរន្តរភាពជាដើម គឺជាការរួមចំណែកយ៉ាងសំខាន់ដល់ភពផែនដី។

 កាត់បន្ថយប្លាស្ទិក ប្រើប្រាស់ឡើងវិញ និងកែច្នៃ ៖ ចំណុចនេះអាចប្រើបានចំពោះមនុស្សទូទៅ តាមរយៈការប្រកាន់ភ្ជាប់នូវរបៀបរស់មួយដែលកាត់បន្ថយការប្រើប្រាស់ប្លាស្ទិក ឬក៏ប្រើឡើងវិញ ឬប្រើតែក្នុងករណីចាំបាច់បំផុតជាដើម ទាំងនេះសុទ្ធសឹងតែជាការចូលរួមដល់ការលើកកម្ពស់ចំណេះដឹងអំពីបរិស្ថាន និងការរស់នៅប្រកបដោយនិរន្តរភាព ដ៏ដូចជាការពារភពផែនដី៕