មនុស្សជំនាន់ Z ​ត្រូវ​បាន​គេ​កំណត់​ថា​ជា​ជំនាន់​មនុស្ស​ក្មេង​ជាង​គេ​បំផុត នៃជំនាន់​មនុស្ស​ទាំង​៥ ដោយ​ពួកគេ​អាច​កើត​ចន្លោះ​ឆ្នាំ១៩៩៧ និង​ឆ្នាំ២០១២ ។ យ៉ាងណាបើតាមការចេញផ្សាយរបស់ Linked in គម្លាតជំនាន់ បានបង្កើតជាជម្លោះនៅកន្លែងការងារ ដោយប្រមាណ ៧០% នៃបុគ្គលិកវ័យចំណាស់បានច្រានចោលសមត្ថភាពរបស់បុគ្គលិកវ័យក្មេង ហើយប្រមាណ ៥០% នៃបុគ្គលិកវ័យក្មេងវិញ ក៏បានច្រានចោលសមត្ថភាពបុគ្គលិកវ័យចាស់ដែរ ហើយ​បង្កើតជាការមិនទុកចិត្ត និងការយល់ច្រឡំ ដែល​នាំឱ្យមានជម្លោះក្នុងកន្លែងការងារ។

ការស្ទង់មតិរបស់ CEO បានបង្ហាញថា ៥៥% នៃអ្នកដឹកនាំជឿថា ការខ្វះទំនុកចិត្តនៅកន្លែងធ្វើការ គឺជាការគំរាមកំហែងដ៏ធំបំផុតចំពោះក្រុមហ៊ុនរបស់ពួកគេ ដោយ​និយាយឱ្យសាមញ្ញទៅ ប្រសិនបើអ្នកចង់ឱ្យអាជីវកម្មរបស់អ្នកទទួលបានជោគជ័យយូរអង្វែង ចាំបាច់ត្រូវបង្កើតទំនុកចិត្តក្នុងចំណោមមិត្តរួមការងារគ្រប់ជំនាន់។

ខាងក្រោមនេះ ជាគន្លឹះមួយចំនួនជួយឱ្យមនុស្សជំនាន់ Z ចាប់ផ្តើមបង្កើតការជឿទុកចិត្ត និងការសហការគ្នាក្នុងចំណោមបុគ្គលិកជំនាន់ផ្សេងៗបានល្អ ៖

១. បង្កើតការបណ្តុះបណ្តាល និងការណែនាំមនុស្សជំនាន់ផ្សេងៗ ៖ ការសិក្សាមួយរបស់ Frontiers in Psychology បានរកឃើញថា ទោះបីជាមនុស្សជំនាន់មុនរំភើបចិត្ត ឬចង់រៀនអំពីបច្ចេកវិទ្យាក៏ដោយ ក៏ប៉ុន្តែពួកគេ​នៅតែខ្មាស់អៀន ដោយសារតែខ្វះការណែនាំ។ ដូច្នេះ មនុស្សជំនាន់ Z គួរប្រើទេពកោសល្យរបស់ខ្លួន ណែនាំដល់បុគ្គលិកវ័យចំណាស់ ឬជំនាន់មុន​អំពីបច្ចេកវិទ្យា។

២. ការបង្ហាញចំណេះដឹង ៖ បង្កើតតម្លាភាពនៅកន្លែងធ្វើការ ដោយ​បង្ហាញជំនាញពិសេស ឬចំណេះដឹង ដែលបុគ្គលិកម្នាក់ៗមាន។ ទន្ទឹមគ្នានេះ គួរលើកទឹកចិត្តឱ្យមានការចែករំលែកនូវអ្វីដែលជាជំនាញល្អបំផុតរបស់ពួកគេ។ នៅពេលសុំឱ្យនរណាម្នាក់និយាយអំពីចំណង់ចំណូលចិត្តរបស់ពួកគេ ឬជំនាញល្អបំផុតនៅកន្លែងធ្វើការ វាបង្កើនការគោរពក្នុងចំណោមក្រុមរបស់ពួកគេ។ ដូច្នេះ គួរអប់រំបុគ្គលិកអំពីអ្វីដែលត្រូវងាកមករកគ្នាទៅវិញទៅមក និងធ្វើឱ្យពួកគេកាន់តែរំភើបក្នុងការមកធ្វើការ។

៣. អនុវត្តបទពិសោធន៍ទំនាក់ទំនងប្រកបដោយភាពច្នៃប្រឌិត ៖ ការងារនឹងក្លាយជាការកម្សាន្តទៅវិញ នៅពេលដែលអ្នកទទួលស្គាល់ភាពខុសគ្នារបស់មនុស្សទៅតាមជំនាន់នីមួយៗ។ មនុស្សនៅគ្រប់ជំនាន់ទាំងអស់យល់ស្របថា ការបំពេញការងារជាក្រុមប្រកបដោយកិច្ចសហការ និងសាមគ្គីភាព ជួយពង្រឹងវប្បធម៌នៅកន្លែងការងារមានភាពល្អប្រសើរ ព្រមទាំងធ្វើឱ្យពេលវេលា និងការខិតខំប្រឹងប្រែងកាន់តែមានតម្លៃខ្លាំងឡើង។ ដូច្នេះ ត្រូវមានយុទ្ធសាស្ត្រច្បាស់លាស់អំពីកម្មវិធីដែលអ្នកជ្រើសរើស ព្រោះ មនុស្ស​ជំនាន់ Y (កើតចន្លោះ១៩៨១-១៩៩៤) និង ជំនាន់ Z អាចនឹងចំណាយកម្លាំងច្រើនដើម្បីធ្វើវា ដែលនាំឱ្យមានបញ្ហាជាច្រើន។ ខណៈ Baby Boomers (កើតចន្លោះឆ្នាំ ១៩៤៦-១៩៦៤) និង ជំនាន់ X (កើតចន្លោះឆ្នាំ ១៩៦៥-១៩៧៦) មានទំនោរបំពេញការងារតាមរចនាសម្ព័ន្ធជំនាន់ពួកគេ។ មនុស្សចង់ធ្វើការជាមួយ​បុគ្គលដែលគេមានអារម្មណ៍រីករាយនឹងនៅក្បែរ ម្ល៉ោះហើយ គួរជ្រើសរើសសកម្មភាពណាដែលជំរុញឱ្យមានការបង្កើតមិត្តភាពរវាងមនុស្សគ្រប់ជំនាន់។ ការស្រង់មតិពីនិយោជិកចំនួន ៩១ភាគរយបានលើកឡើងថា ពួកគេរីករាយនឹងធ្វើការជាមួយមនុស្សដែលគេមានអារម្មណ៍ថាស្និទ្ធស្នាលជាមួយ៕