ការចិញ្ចឹមកូន ដោយទម្រើស ថ្នម និងផ្ដល់អ្វីៗគ្រប់យ៉ាងតាមការទាមទាររបស់គេ នឹងធ្វើឱ្យកុមារ វិវត្តន៍ខ្លួនកា្លយជាមនុស្សធំ ដែលគ្មានជំនឿចិត្ត និងឯករាជ្យភាពលើខ្លួនឯង, នេះបើតាមការបញ្ជាក់របស់អ្នកជំនាញចិត្តអប់រំកុមារ លោកស្រី សរ ម៉ុនថា។

បើតាម អ្នកស្រី សរ ម៉ុនថា ដែលជាអ្នកជំនាញចិញ្ចឹមអប់រំកុមារ មានប្រសាសន៍ថា អាណាព្យាបាល​ ដែលចិញ្ចឹមកូនទម្រើស អាចស្ដែងតាមរយៈសកម្មភាព សំខាន់ៗចំនួន ៤ រួមមាន ៖

១. តាមចិត្តកូនគ្រប់យ៉ាង ៖ នៅក្នុងន័យថា អ្នកស្រីចង់បង្ហាញថា ឪពុកម្ដាយ គឺយល់ព្រមតាមការទាមទាររបស់កុមារគ្រប់យ៉ាង ខណៈពេលខ្លះ មិនត្រឹមតែស្របតាមគ្រប់យ៉ាងនោះទេ ថែមទាំងធ្វើកិច្ចការ ដែលកុមារត្រូវធ្វើ ជំនួសពួកគេថែមទៀត បើទោះបីជាកុមារ អាចធ្វើកិច្ចការទាំងនោះខ្លួនឯងក៏ដោយ។ ​សកម្មភាពទាំងនោះ មានដូចជា ការពាក់ស្បែកជើង ការពាក់ខោអាវ ការធ្វើការងារផ្ទះ ឬក៏ឱ្យកូនធ្វើការសម្រេចចិត្តមិនថា រឿងតូច ធំ គឺយើងជាអ្នកសម្រេចចិត្តជំនួសគាត់ទាំងអស់។

២. មិនហ៊ានឱ្យកូនសាកល្បងរឿងថ្មីៗ ៖ ដោយសារតែបារម្ភពីសុវត្ថិភាពកូន ខ្លាចកូន រត់ដួល ជួបមិត្តភក្ដិមិនល្អ ឆ្លងជំងឺពីក្មេងៗដទៃ ឬរៀនចេះពាក្យមិនល្អ ពីមិត្តភក្ដិជាដើម ធ្វើឱ្យពួកម្ដាយរារាំងកូន មិនឱ្យសាកល្បងធ្វើរឿងថ្មីៗ ឆ្លងកាត់បទពិសោធន៍ថ្មីៗ បណ្ដាលឱ្យពួកគេខកខានឱកាស រៀនសូត្រពីបរិយាកាសខាងក្រៅ និងជំនាញសង្គម។

៣. កូនធ្វើខុស ក៏មិនណែនាំ ៖ ត្រង់ចំណុចនេះ មានន័យថា លោកស្រី សរ ម៉ុនថា លើកឡើងថា នៅពេលដែលស្រលាញ់កូនខ្លាំងពេក ឪពុកម្ដាយមួយចំនួន មិនណែនាំកូនរបស់គាត់នោះទេ បើទោះបីកូនរបស់គាត់មានអាបក្បកិរិយាមិនសមរម្យ ឬធ្វើខុសក៏ដោយ។ ឧទាហរណ៍ជាក់ស្ដែង បើទោះបីជាកុមារ មានទម្លាប់យករបស់គេមិនប្រាប់ មិនគោរពចាស់ទុំ គ្មានសីលធម៌ក្នុងការរស់នៅ ឬនិយាយកុហក ក៏ឪពុកម្ដាយ មិនណែនាំ នៅថ្ងៃអនាគត កុមារនឹងគិតថា ទង្វើទាំងនេះ គឺជាទង្វើធម្មតា និងជារឿងធម្មតា។

៤. បង្កាកូនមិនឱ្យ ពីការបង្កកំហុស ៖ នៅពេលដែល ឪពុកម្ដាយ ស្រលាញ់កូនខ្លាំងពេល គេមិនត្រឹមតែមិនអនុញ្ញាតឱ្យធ្វើរឿងថ្មីៗនោះទេ ថែមទាំងបង្កា ឬរកវិធីសាស្ត្រគ្រប់បែបយ៉ាង​ ដើម្បីរារាំង កុមារមិនឱ្យធ្វើ ឬបង្កកំហុសផងដែរ។ យ៉ាងណាក៏ដោយ បើតាមអ្នកស្រី សរ ម៉ុនថា ការដែលស្រលាញ់កូនខ្លាំង និងរារាំងពួកគេ ពីការបង្កកំហុសបែបនេះ នឹងក្លាយជាគុណវិបត្តិទៅវិញ ព្រោះកុមារ នឹងមិនមានឱកាស បានលូតលាស់ បញ្ញា និងស្មារតីរបស់ពួកគេ បានឆាប់រហ័សនោះទេ៕