ភាពកាន់តែរឹងមាំ ក្រោយប៉ះទង្គិចផ្លូវចិត្ត (PTG) សំដៅទៅលើការផ្លាស់ប្ដូរជាវិជ្ជមាន របស់មនុស្សម្នាក់ បន្ទាប់ពីឆ្លងកាត់ការតស៊ូ ឬហែលឆ្លងក្នុងវិបត្តិ ឬប៉ះទង្គិចដ៏ធ្ងន់ធ្ងរណាមួយ។

ប្រសិនបើអ្នកធ្លាប់ឆ្លងកាត់ព្រឹត្តិការណ៍អ្វីមួយ ដែលបង្កភាពតក់ស្លុត វាអាចបណ្ដាលឱ្យមានការប៉ះទង្គិចផ្លូវចិត្ត និងការឈឺចាប់ធ្ងន់ធ្ងរ ហើយអ្នកអាចនឹងមានអារម្មណ៍ថា អ្វីៗគ្រប់យ៉ាងក្នុងជីវិតអ្នកមិនដូចមុនទៀតទេ។

វាអាចនឹងពិបាកក្នុងការស្រមៃថា នឹងមានរឿងល្អ ដែលអាចកើតចេញពីបទពិសោធន៍នៃការប៉ះទង្គិចផ្លូវចិត្ត ឬការឈឺចាប់ ដោយសារព្រឹត្តិការណ៍អ្វីមួយ។ ទោះជាយ៉ាងណាក៏ដោយ បើតាមការស្រាវជ្រាវតាមបែបវិទ្យាសាស្ត្រ រឿងនេះគឺអាចទៅរួច ដែលបទពិសោធន៍នោះនឹងផ្លាស់ប្ដូរអ្នកឱ្យរឹងមាំ និងមានភាពធន់ជាងមុន។

ទ្រឹស្តីនៃការរីកចម្រើន បន្ទាប់ពីប៉ះទង្គិចផ្លូវចិត្ត

ទ្រឹស្តីដែលសិក្សាអំពីការរីកចម្រើន បន្ទាប់ពីប៉ះទង្គិចផ្លូវចិត្ត ត្រូវបានសិក្សាជាលើកដំបូង ដោយ បណ្ឌិត Richard Tedeschi និងបណ្ឌិត Lawrence Calhoun នៅឆ្នាំ១៩៩៦។

Tedeschi និង Calhoun បានបោះពុម្ពផ្សាយទ្រឹស្តីនេះ ក្នុងស្នាដៃមួយ ដែលមានចំណងជើងថា “សារពើភ័ណ្ឌនៃការលូតលាស់ក្រោយប៉ះទង្គិចផ្លូវចិត្ត ៖ ការវាស់វែងពីកេរ្តិ៍ដំណែលវិជ្ជមាន នៃការប៉ះទង្គិចផ្លូវចិត្ត” ដែលក្នុងនោះ អ្នកជំនាញទាំងពីរបានពន្យល់ថា នរណាម្នាក់ ដែលបានជួបប្រទះនឹងព្រឹត្តិការណ៍ នៃការប៉ះទង្គិចផ្លូវចិត្ត អាចទទួលបានបទពិសោធន៍នៃការផ្លាស់ប្ដូរវិជ្ជមាន ក្នុងរូបភាពមួយចំនួន ដូចជា កម្លាំង និងភាពធន់ផ្ទាល់ខ្លួន, ការពេញចិត្តចំពោះជីវិត, ទំនាក់ទំនងល្អជាមួយអ្នកដទៃ, លទ្ធផលថ្មីៗក្នុងជីវិត និងការផ្លាស់ប្ដូរផ្នែកស្មារតី។

ក្នុងស្នាដៃអ្នកទាំងពីរ បានកត់សម្គាល់ថា អ្នកដែលមានបទពិ​សោធន៍ ឆ្លងកាត់ព្រឹត្តិការណ៍ដែលគួរឱ្យតក់ស្លុត ទំនងជាមានការផ្លាស់ប្ដូរជាវិជ្ជមានច្រើនក្នុងខ្លួនពួកគេ ជាងមនុស្សដែលមិនធ្លាប់ឆ្លងកាត់បទពិសោធន៍អ្វីសោះ។

របៀបដែលមនុស្សម្នាក់អាចជួបបទពិសោធន៍នៃការផ្លាស់ប្ដូរជាវិជ្ជមាន ក្រោយប៉ះទង្គិចផ្លូវចិត្ត

យោងតាមទ្រឹស្ដី ការផ្លាស់ប្ដូរវិជ្ជមាន ក្រោយប៉ះទង្គិចផ្លូវចិត្តទាំងនេះ គឺជាហេតុផល នៅពីក្រោយការផ្លាស់ប្ដូរជាវិជ្ជមាន ក្រោយប៉ះទង្គិចផ្លូវចិត្ត។

ការអប់រំ ៖ ដើម្បីសម្រេចបាននូវការរីកចម្រើន ឬការផ្លាស់ប្ដូរជាវិជ្ជមាន បន្ទាប់ពីឆ្លងកាត់បទពិសោធន៍តក់ស្លុត ឬការប៉ះទង្គិចផ្លូវចិត្ត អ្នកប្រហែលជាត្រូវគិតឡើងវិញ អំពីស្ថានភាពរបស់អ្នក និងប្រឈមជាមួយនឹងជំនឿ និងការសន្មត់ផ្ទាល់ខ្លួនរបស់អ្នក​ លើការគិតមួយចំនួន ដូចជា តើមានអ្វីកើតឡើង? តើខ្ញុំគួរធ្វើអ្វីខ្លះពេលនេះ? តើអនាគតនឹងទៅជាយ៉ាងណា? បន្ទាប់ពីប្រឈម និងយកឈ្នះ ការគិតទាំងនេះ អ្នកនឹងអាចស្វែងយល់អំពីការបង្កើតរបៀបគិតថ្មី និងវិធីសាស្ត្រដោះស្រាយបញ្ហាថ្មី។

គ្រប់គ្រងអារម្មណ៍ ៖ អ្នកត្រូវមានគំនិតត្រឹមត្រូវ ក្នុងការផ្លាស់ប្ដូរ រៀន រីកចម្រើន និងសម្របខ្លួន បន្ទាប់ពីមានបទពិសោធន៍តានតឹងក្នុងជីវិត។ នោះមានន័យថា រៀនគ្រប់គ្រងអារម្មណ៍ អវិជ្ជមាន ដូចជា កំហឹង ការភ័យខ្លាច ភាពជូរចត់ និងកំហុស ហើយចាត់ទុកការបរាជ័យ និងការបាត់បង់ ជាមេរៀនជីវិត។ ការគ្រប់គ្រងនេះ អាចធ្វើតាមរយៈ ការធ្វើលំហាត់ប្រាណ សម្មាធិ លំហាត់ដកដង្ហើម និងបច្ចេកទេស សម្រាកកាយចិត្ត ជួយអ្នកគ្រប់គ្រងអារម្មណ៍អវិជ្ជមាន និងផ្ដោតលើបច្ចុប្បន្នភាព។

និយាយជាមួយអ្នកទុកចិត្ត ៖ ចំណុចនេះ ទាមទារឱ្យមានការនិយាយពីបទពិសោធន៍នៃការឈឺចាប់ និងរបៀបដែលព្រឹត្តិការណ៍ទាំងនោះ មានឥទ្ធិពលមកលើអ្នក។ ការពិពណ៌នាអំពីបទពិសោធន៍ដល់អ្នកដទៃ ហើយប្រាប់ពួកគេអំពីទុក្ខលំបាករបស់អ្នក ទាំងអតីតកាល និងបច្ចុប្បន្ន អាចជួយអ្នកឆ្លុះបញ្ចាំង អំពីការប៉ះទង្គិច និងដំណើររបស់វា។

ជួយអ្នកដទៃ ៖ បន្ទាប់ពីជួបការប៉ះទង្គិច មនុស្សជាច្រើន មានផ្លូវចិត្តល្អប្រសើរជាងមុន ប្រសិនបើពួកគេ អាចមានលទ្ធភាពជួយអ្នកដទៃ ឬអ្នកដែលត្រូវការជំនួយ។ ជាក់ស្ដែង​អ្នកអាចជួយអ្នករងគ្រោះផ្សេងទៀត ដែលកំពុងជួបបញ្ហាស្រដៀងនឹងអ្វី ដែលអ្នកធ្លាប់ឆ្លងកាត់ ដោយគិតពីវិធីសាស្ត្រ ជួយពួកគេ ពីការប៉ះទង្គិច ដូចអ្នកដែរ។ ការជួយ អ្នកធ្វើឡើង ក្នុងរូបភាពផ្សេងៗគ្នា ដូចជា បរិច្ចាគប្រាក់ ការចូលរួមក្នុងកម្មវិធីស្ម័គ្រចិត្ត ឬចែករំលែកបទពិសោធន៍ និងដំបូន្មានល្អៗ ទៅកាន់នរណាម្នាក់ ដើម្បីជួយពួកគេរកដំណោះស្រាយ។

លើសពីនេះ ដើម្បីសម្រេចភាពជោគជ័យ ក្នុងការជួយខ្លួនឯង ឱ្យសម្រេចបាននូវប្រយោជន៍វិជ្ជមាន ក្រោយប៉ះទង្គិចផ្លូវចិត្ត អ្នកចាំបាច់ត្រូវតែទទួលស្គាល់ការពិតចំពោះរឿងដែលបានកើតមកលើអ្នក និងអនុញ្ញាត្តឱ្យខ្លួនឯងឈឺចាប់ ដោយព្រឹត្តិការណ៍នោះ, ការទទួលស្គាល់ការពិត និងមិនគេចវេសការពិត អាចធ្វើឱ្យអ្នកមានអារម្មណ៍ឈឺចាប់ ប៉ុន្តែវាជាដំណើរនៃការដោះស្រាយបញ្ហា។ ​ខណៈការមើលជីវិតក្នុងរូបភាពវិជ្ជមាន ទទួលស្គាល់ភាពខ្លាំងខ្លួនឯង ស្វែងរកជំនួយ និងអនុញ្ញាតឱ្យពេលវេលាជាអ្នកព្យាបាលរបួស ក៏អាចជួយអ្នកចាកចេញ ពីអារម្មណ៍អវិជ្ជមានដែរ៕