ទម្លាប់មួយ ដែលជួយអភិវឌ្ឍន៍គ្រប់ផ្នែក នៃការរស់នៅ គឺការអាន ប៉ុន្តែបច្ចុប្បន្ន មានការរំខានពីមជ្ឈដ្ឋាន ជាច្រើនដូចជា បណ្តាញសង្គម ការមើលវីដេអូក្នុងរយៈពេលវែងៗ ដូច្នេះវាពិបាកក្នុងការវិនិយោគពេលទៅក្នុងទម្លាប់អាន។ បច្ចុប្បន្ននេះយុវជនប្រើប្រាស់ពេលច្រើនម៉ោងនៅពីមុខស្រ្គីន ឆែកទូរស័ព្ទមុនពេលអាន បន្ទាប់មកក៏ទទួលបាននូវអារម្មណ៍មិនសប្បាយចិត្ត ក្រោយការចំណាយពេលជាច្រើនទៅលើរឿងមិនបានការទាំងនោះ។ តើនឹងមានអ្វីកើតឡើង ប្រសិនបើអ្នកចាប់ផ្តើមអានពីថ្ងែនេះ ពេលនេះ? ហើយតើលទ្ធផលនឹងទៅជាយ៉ាងណា ប្រសិនបើបានអានសៀវភៅជារៀងរាល់ថ្ងៃ?

តាមរយៈគេហទំព័រ Heheartysoul បានបង្ហាញរាល់លទ្ធផល ដែលទទួលបានពីការមានទម្លាប់អានជារៀងរាល់ថ្ងៃ ៖

១. វិសាលភាព នៃការស្គាល់ពាក្យបន្ថែម ៖ ការអានសៀវភៅបន្ថែម ជាយុទ្ធសាស្រ្តចាក់ចូលទៅកាន់ការអភិវឌ្ឍពាក្យថ្មីៗ ឬពាក្យដែលមិនសូវប្រើប្រាស់ប្រចាំថ្ងៃ ការស្គាល់ពាក្យច្រើន បានរួមចំណែកដល់ការប្រាស្រ័យទាក់ទង ឬអាជីពវិជ្ជាជីវៈ ការស្គាល់ពាក្យថ្មី ជួយឱ្យការនិយាយកាន់តែមានភាពច្បាស់លាស់ និងភាពសមហេតុផល ដែលចំណុចនេះសុទ្ធសឹងតែ ជាចំណែកខ្វះមិនបាននូវរាល់គ្រប់កិច្ចការទាំងអស់។ គួរជំរាបជូនថា ការចេះចាំពាក្យថ្មីៗ តាមរយៈការអាន មានប្រសិទ្ធភាពជាងការព្យាយាមទន្ទេញឱ្យចាំមាត់តាមរយៈការមើលក្នុងវចនានុក្រមតែមួយមុខ។

២. បង្កើនការផ្តោតស្មារតី ៖ ទម្លាប់មួយដែលអាចជួយការផ្តោតស្មារតី គឺការអាន ទន្ទឹមគ្នានោះ គេអាចអះអាងបានថា ការអានជាទម្លាប់ ដែលមានភាពសកម្មមួយ ដោយហេតុថា កំឡុងពេលអានទាមទារឱ្យប្រើប្រាស់សតិនៅជាមួយការអានជាប្រចាំ មិនតែប៉ុណ្ណោះ ការអានត្រូវមានការច្រោះនិងវិភាគថ្លឹងថ្លែង ថា តើគួរអានចំណុចណាមុន ឬរំលងចំណុចដែលមិនចាំបាច់ចោល ទាំងនេះត្រូវមានការចូលរួម គ្រប់ផ្នែកនៃស្មារតី។

 ៣. មិនជាប់គាំងពេលមានបញ្ហា ​៖ អានជាជំហាន នាំឱ្យខួរក្បាលស្រឡះក្នុងការស្វែងរកវិធីទៅដោះស្រាយបញ្ហា ហើយសៀវភៅ គឺជាកម្លាំងចិត្តដែលជំរុញអ្នកឱ្យទទួលបានបទពិសោធន៍បន្ថែម។ តាមពិតទៅការអានមិនគួរឱ្យធុញទេ ប្រសិនបើមានជម្រើសនៃសៀវភៅច្រើនសម្រាប់ឱ្យអ្នកអានមានឱកាសក្នុងការជ្រើសរើស ប៉ុន្តែជាកិច្ចដំបូង ត្រូវការបង្កើតឱ្យមានទម្លាប់អានជាមុនសិន។ គំនិតថ្មីៗបានផុសចេញពីអំណាន ហើយគំនិតថ្មីៗ ជាកត្តានាំឱ្យការដោះស្រាយបញ្ហាមានភាពរលូនជាងមុន មិនថា ក្នុងវិថីការងារ ការសិក្សា ឬក៏ការរស់នៅ។

៤. ការស្រមើស្រមៃប្រសើរជាងមុន ៖ អ្នកដែលផ្តល់អាទិភាព ឬក៏ភាពហ្មត់ចត់ ក្នុងការអាន​ជារឿយៗ តែងតែផ្តល់នូវគំនិតទូលំទលាយ និងគំនិតសំខាន់ៗ ពង្រីកសមត្ថភាពផ្នែកខាងស្តាំនៃខួរក្បាល និងគំនិតច្នៃប្រតិដ្ឋជាងបុគ្គលដែលមិនមានបទពិសោធន៍អាន។

៥. ពង្រឹងសុខភាពផ្លូវចិត្ត ៖ អានជាវិធីសាស្រ្ត រំឮកដល់ការផ្ទៀងផ្ទាត់សុខភាពប្រចាំថ្ងៃ តាមរយៈការព្យាយាមចងចាំរាល់ពាក្យពេចន៍ដែលកើតមានប្រចាំថ្ងៃ និងដោយការអានប្រចាំថ្ងៃ។ សុខភាព ខួរក្បាល អាចអភិវឌ្ឍន៍ ពីមួយពេលទៅមួយពេលបាន តាមរយៈពាក្យពេចន៍បន្តិចបន្តួចប្រចាំថ្ងៃ។

៦. វិធីសាស្រ្តគ្រប់គ្រងភាពតានតឹង ៖​ តើអ្នកទប់ទល់យ៉ាងណា នៅពេលមានអាការស្រ្តេស? វិធីសាស្រ្តមួយដ៏សាកសម ក្នុងការដោះស្រាយស្រ្តេស គឺ ជ្រើសយកការអាន។ ដូច្នេះដើម្បីជាវិធានការ បង្ការទុកមុនគឺ ការចំណាយពេលយ៉ាងយោចណាស់ ៣០នាទី ដើម្បីអានក្នុងមួយថ្ងៃៗ៕