ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភាពឯកា មិនត្រឹមតែជាបញ្ហាផ្លូវចិត្តប៉ុណ្ណោះទេ ប៉ុន្តែវាក៏ជាបន្ទុកហិរញ្ញវត្ថុដ៏ធ្ងន់ធ្ងរមួយចំពោះប្រព័ន្ធសុខភាពសាធារណៈផងដែរ។ នេះបើយោងតាមការវិភាគមួយក្នុងចក្រភពអង់គ្លេស។
មនុស្សដែលមានអារម្មណ៍ឯកាជាប្រចាំមានតម្លៃសេវាសុខភាពជាតិ (NHS) នៃចក្រភពអង់គ្លេសរហូតដល់ ៨៨៥ ផោន (១,១៨៩.៥០ ដុល្លារអាមេរិក) ជារៀងរាល់ឆ្នាំ ច្រើនជាងមិត្តរួមការងាររបស់គេ, នេះបើយោងតាមការប៉ាន់ស្មាន ដែលត្រូវបានបោះពុម្ពផ្សាយ នៅក្នុងទិនានុប្បវត្តិ PLOS One ។
អ្នកស្រាវជ្រាវបានស្ទង់មតិជនជាតិអង់គ្លេសជាង ២,៣០០នាក់ លើកម្រិតនៃភាពឯកា សុខុមាលភាព និងការមកទទួលសេវាថែទាំសុខភាពចាប់ពីឆ្នាំ២០២១ ដល់ឆ្នាំ២០២៣ ហើយបានប្រើប្រាស់តួលេខ ដើម្បីប៉ាន់ប្រមាណតម្លៃសុខភាពរបស់ពួកគេ។
លទ្ធផលនៃការស្ទង់មតិបានបង្ហាញថា មនុស្ស ៨% តែងតែមានអារម្មណ៍ឯកា ហើយ ៣២% ទៀត មានអារម្មណ៍ឯកាម្តងម្ដាល។
ការសិក្សាបានរកឃើញថា ភាពឯកាត្រូវបានផ្សារភ្ជាប់ទៅនឹងទុក្ខព្រួយផ្លូវចិត្ត បញ្ហាសុខុមាលភាពផ្លូវចិត្តធ្ងន់ធ្ងរ សុខភាពរាងកាយចុះខ្សោយ និងគុណភាពជីវិតទាប។ ខណៈមនុស្សឯកា ក៏ទំនងជាទៅជួបគ្រូពេទ្យទូទៅ (GP) ឬទៅមន្ទីរពេទ្យញឹកញាប់ជាង មនុស្សដែលមិនឯកាផងដែរ។
លោកស្រី Antonieta Medina-Lara ជាអ្នកនិពន្ធម្នាក់ក្នុងការសិក្សានេះ និងជាសាស្ត្រាចារ្យផ្នែកសេដ្ឋកិច្ចសុខភាពសាធារណៈ នៃសាកលវិទ្យាល័យ Exeter បាននិយាយនៅក្នុងសេចក្ដីថ្លែងការណ៍មួយថា «ការរកឃើញរបស់យើងបញ្ជាក់ពីសារៈសំខាន់នៃការទទួលស្គាល់ភាពឯកាថា ជាបញ្ហាសុខភាពសាធារណៈ និងអាទិភាពរបស់ NHS ត្រូវដោះស្រាយ។»
លោកស្រីមានប្រសាសន៍បន្ថែមថា មនុស្សជាច្រើន តែមើលរំលងបញ្ហាភាពឯកា ដែលនាំឱ្យការចំណាយផ្ទាល់ខ្លួន និងសង្គមកើនឡើងយ៉ាងច្រើន។
អង្គការសុខភាពពិភពលោក (WHO) ប៉ាន់ប្រមាណថា ភាពឯកាកំពុងប៉ះពាល់ដល់ការរស់នៅរបស់មនុស្សរហូតដល់ ១៦% នៅទូទាំងពិភពលោក ហើយចាត់ទុកការផ្ដាច់ខ្លួនពីសង្គមថា ជាការគំរាមកំហែងយ៉ាងធ្ងន់ធ្ងរដល់បញ្ហាសុខភាពពិភពលោក។
ការផ្ដាច់ខ្លួនពីសង្គម និងភាពឯកា ត្រូវបានផ្សារភ្ជាប់ទៅនឹងហានិភ័យ នៃជំងឺបេះដូង ជំងឺទឹកនោមផ្អែមប្រភេទទី២ ជំងឺធ្លាក់ទឹកចិត្ត និងការថប់បារម្ភ, នេះបើយោងតាមអង្គការសុខភាពពិភពលោក។
ប្រទេសជាច្រើនរួមទាំងចក្រភពអង់គ្លេស បានចាប់ផ្ដើមផែនការជាតិ ដើម្បីប្រយុទ្ធប្រឆាំងនឹងភាពឯកាក្នុងរយៈពេលប៉ុន្មានឆ្នាំចុងក្រោយនេះ ដើម្បីជំរុញទំនាក់ទំនងផ្ទាល់ខ្លួន និងលើអ៊ីនធឺណិតរបស់មនុស្ស ដែលអាចប្រឈមនឹងហានិភ័យនៃភាពឯកា ឬការផ្ដាច់ខ្លួនពីសង្គម ព្រមទាំងមនុស្សចាស់ជាដើម។
ការសិក្សាចុងក្រោយបង្អស់បានបង្ហាញថា អាយុក៏ដើរតួក្នុងការបង្កើតគម្លាតនៃការចំណាយផ្នែកសុខភាពផងដែរ។ មនុស្សវ័យជំទង់ និងមនុស្សវ័យចំណាស់ ដែលឯកា មានការចំណាយខ្ពស់ជាងមិត្តភក្ដិរបស់គេ ដែលមិនមានភាពឯកា ខណៈបញ្ហានេះ មិនសូវកើតមានសម្រាប់មនុស្សវ័យកណ្ដាលនោះទេ។
ក្រុមអ្នកស្រាវជ្រាវបាននិយាយថា ពួកគេសង្ឃឹមថា ការយល់ដឹងកាន់តែច្រើនអំពីផលវិបាកផ្ទាល់ខ្លួន និងសង្គមដ៏ស្មុគស្មាញរបស់ភាពឯកា នឹងនាំឱ្យមានសកម្មភាពជាក់ស្ដែងបន្ថែមទៀត ដើម្បីដោះស្រាយបញ្ហានេះ៕
