គេអាចនិយាយបានថា ទម្លាប់ប្រចាំថ្ងៃ មានតួនាទីសម្រួលដល់ កិច្ចការប្រចាំថ្ងៃ ប្រចាំសប្តាហ៍ និងកាត់បន្ថយភាពច្របូកច្របល់ពេលបំពេញការងារ, ទន្ទឹមគ្នានោះ ទម្លាប់ប្រចាំថ្ងៃ នាំឱ្យជីវិតមានភាពងាយស្រួលជាងមុន ក៏ដូចជាការឆ្ពោះទៅមុខក្នុងល្បឿនមួយដែលលឿនរហ័ស ។ ចំពោះអ្នកទើបតែចាប់ផ្តើម ឬអ្នកមានទម្លាប់ប្រត្តិបត្តិការងារ និងការរៀបចំទម្លាប់ជាប្រចាំរួចហើយ ប៉ុន្តែហាក់មិនទទួលបានប្រសិទ្ធភាព ឬបាត់បង់ថាមពលក្នុងការធ្វើឱ្យទម្លាប់ល្អៗប្រចាំថ្ងៃដែលមានស្រាប់ ហើយត្រូវការដំណោះស្រាយចំពោះចំណោទបញ្ហានេះ តាមរយៈគេហទំព័រ The Spruce បានបង្ហាញគន្លឹះ ៦នៃការវិលត្រឡប់ទៅធ្វើសកម្មភាពល្អៗប្រចាំថ្ងៃឱ្យក្លាយទៅជាទម្លាប់។

១. ​បង្កើតទម្លាប់បែបសាមញ្ញៗ ៖ មិនថាលោកអ្នកកំពុងតែចាប់ផ្តើមប្រភេទសកម្មភាពអ្វីនោះទេ​ ជាដំណើរការដំបូងៗ សូមកុំរំពឹងនូវលទ្ធផលពីការអនុវត្តសកម្មភាពក្នុងរយៈពេលត្រឹមតែមួយថ្ងៃ មិនថាហាត់យូហ្គា ធ្វើសមាធិ និងលំហាត់ប្រាណ ឬការដាក់ផែនការសម្អាតផ្ទះជាដើម គឺត្រូវចាប់ផ្តើមមួយៗ និងត្រងត្រាប់លទ្ធផលក្នុងរយៈកាលវែង។ អ្វីដែលសំខាន់គឺក្នុងការចាប់ផ្តើម គឺ ការទាញខ្លួនឯងឱ្យសាកល្បងធ្វើលើកទីមួយសិន នៅពេលដែលប្រព្រឹត្តិសកម្មភាពទាំងនោះក្លាយទៅជាទម្លាប់ ​វានឹងផ្តល់ភាពងាយស្រួលមកតាមក្រោយ។ ជំនួសឱ្យការរំពឹងលើលទ្ធផល គួរចាប់អារម្មណ៍ពីការធ្វើវាឱ្យ​បានទៀងទាត់ សឹមចាប់ផ្តើមសាកល្បងសកម្មភាពថ្មីៗបន្តបន្ទាប់ទៀត។ ការដាក់គោលដៅ និងទម្លាប់ខ្លួនទៅធ្វើសកម្មភាពណាមួយ បានជំរុញឱ្យមនុស្សមានកម្លាំងចិត្ត និងភាពស្មឹងស្មាធិ៍ក្នុងការសម្រេចយកឱ្យបាននូវសមិទ្ធិផល។

២. រឭកខ្លួនឯង ៖ ពេលខ្លះ យើងគ្រប់គ្នា ត្រូវការជំនួយក្នុងការរឭកយើងជារឿយៗ ជាពិសេសេ នៅពេលចង់បង្កើតទម្លាប់ថ្មីៗប្រចាំថ្ងៃ ទម្រាំតែបង្កើតបានទម្លាប់ប្រចាំថ្ងៃថ្មី ឱ្យក្លាយទៅជាបំណែកនៃធម្មជាតិក្នុងការរស់នៅ បុគ្គលម្នាក់ៗត្រូវមានវិធីសាស្រ្តផ្ទាល់ខ្លួនក្នុងការរឭកសតិខ្លួនជាប្រចាំជាកត្តាចម្បង។ ជាឧទាហរណ៍ ប្រសិនបើ រៀងរាល់ព្រឹក អ្នកត្រូវចម្អិនម្ហូបបរិភោគដោយខ្លួនឯង អ្នកគួរតែដាក់គ្រឿងផ្សំចំពោះមុខម្ហូបដែលគ្រោងនឹងធ្វើឱ្យបានគ្រប់សព្វរួចជាស្រេចនៅលើតុអាហាររៀងរាល់មុនពេលចូលគេង ឬមួយវិញទៀតសរសេរចំណុចសំខាន់ៗ ដែលត្រូវធ្វើដើម្បីយកទៅបិទនៅកន្លែងដែលត្រូវប្រើប្រាស់ប្រចាំថ្ងៃដូចជា កញ្ចក់ឆ្លុះមុខ បិទនៅមុខទ្វារបន្ទប់ទឹក មុខបន្ទប់គេង ឬកន្លែងណាមួយដែលផ្តល់ភាពលឿនរហ័សក្នុងការក្រឡេកឃើញ។ មួយវិញទៀត ការប្រើប្រាស់គ្រឿងអេឡិចត្រូនិច ដើម្បីកំណត់ ជាពិសេសនៅលើទូរស័ព្ទ ប្រើដើម្បីកំណត់ពេល និងប្រភេទសកម្មភាពនីមួយៗដែលត្រូវបំពេញរៀងរាល់ថ្ងៃ។

៣. ត្រៀមយុទ្ធសាស្រ្តក្នុងការបន្ថយហានិភ័យ ៖ ត្បិតថា ការរឭកខ្លួនឯងជាកាតព្វកិច្ច ដែលអាចជួយឱ្យជីវិតមានភាពងាយស្រួល ប៉ុន្តែបើបានត្រៀមខ្លួនដើម្បីកាត់បន្ថយហានិភ័យ គឺរឹងរឹតតែជាចំណែកជួយឱ្យជីវិតកាន់រីករាយ ជាឧទាហរណ៍ ប្រសិនបើអ្នកបានដឹងខ្លួនឯងថា អ្នកជាបុគ្គលដែលពិបាកក្នុងការក្រោកពីដំណេក ដូច្នេះត្រូវតែមានទម្លាប់ត្រៀមសម្លៀកបំពាក់ ដែលត្រូវប្រើប្រាស់នៅថ្ងៃថ្មីឱ្យរួចស្រេចជានិច្ច។ ដូច្នេះរបៀបនៃការត្រៀមយុទ្ធសាស្រ្តក្នុងការបន្ថយឧបសគ្គ ផ្តើមដោយការសង្កេតពីចំណុចខ្សោយខ្លួនឯង ស្គាល់ពីប្រភេទថាមពលរបស់ខ្លួនឯង ក៏ដូចជាការរស្វែងរកគន្លឹះក្នុងការទប់ទល់នឹងបញ្ហាទាំងនោះមុនពេលហានិភ័យណាមួយកើតមាន។

៤. រក្សាភាពបត់បែន និងភាពអត់ធ្មត់ ៖ ប្រសិនបើប្រឹងហើយ ប៉ុន្តែម្តងម្កាលបែរជាភ្លេច ឬក៏អ្នកមិនមានថាមពលក្នុងការអនុវត្តទម្លាប់និងផែនការដែលបានកំណត់ទុក ឬក៏មិនអាចរកអ្វីថ្មីៗ ក្នុងកាលៈទេសៈនេះសូមកុំបង្ខំខ្លួនឯងពេក ពីព្រោះពាក្យថាទម្លាប់មិនមែនបានមកដោយស្រួលៗ និងក្នុងរយៈពេលខ្លីៗនោះទេ ហើយក៏មិនមែនមួយថ្ងៃសម្រេចបាននោះដែរ។

៥. ផ្តល់រង្វាន់ជូនខ្លួនឯង ៖ គួរតែអបអរសាទរ ចំពោះខ្លួនរៀងរាល់ពេលទទួលបានអ្វីថ្មីៗ មិនថា ជាការបង្កើតបាននូវទម្លាប់ថ្មីដែលផ្តល់នូវសិរីសួស្ដី ហើយការផ្តល់រង្វាន់ទៀតសោធ មានច្រើនវិធី ដូចជា ការបង្កើតផែនការបន្ទាប់ ដើម្បីពង្រីកវិសាលភាព នៃការពង្រឹងខ្លួនឯង ការទិញសម្ភារៈជូនចំពោះខ្លួនឯង ឬក៏ទៅលំហែនៅខាងក្រៅ ហើយការជ្រើសរើសរង្វាន់សម្រាប់ខ្លួនឯង ត្រូវតែប្រាកដថា ជារបស់ស្ថិតក្នុងក្ដីប្រាថ្នា និងការចង់បានពិតប្រាកដ។

៦. កុំផ្តាច់ចោលទម្លាប់ដែលសម្រេចបាន ៖ នៅពេលដែលទទួលបានលទ្ធផលក្នុងការបង្កើតទម្លាប់ហើយ សូមព្យាយាមរក្សាវាឱ្យជាប់ និងបន្តអនុវត្តន៍ឱ្យបានទៀងទាត់ មិនថាថ្ងៃឈប់សម្រាក ឬថ្ងៃបុណ្យទាន៕