ការជ្រើសរើសប្រភេទអាហារសម្រន់ដែលមានសុខភាពល្អ និងងាយស្រួលយកតាមខ្លួន គឺជាទម្លាប់ដ៏ឆ្លាតវៃមួយ ដែលដើរតួនាទីយ៉ាងសំខាន់ក្នុងការជំរុញឱ្យសុខភាពកាន់តែរឹងមាំ និងផលិតភាពកាន់តែកើនឡើង។ យោងតាមគេហទំព័រ Everydayhealth បានបង្ហាញពីវិធីសាស្រ្តមួយចំនួនក្នុងការជ្រើសរើស​អាហារសម្រន់ដែលល្អ និង​ងាយស្រួលក្នុងការដាក់តាមខ្លួន៖

ការចិតចំណិតផ្លែឈើដែលមានរូបរាងស្អាតៗ ៖ កត្តាដែលជំរុញឱ្យទទួលទានអាហារវេចខ្ចប់ស្រាប់ៗមិនមែនដោយសារតែរស់ជាតិមួយមុខនោះទេ ប៉ុន្តែវាក៏បណ្តាលមកភាពងាយស្រួល ភាពស្រស់ស្អាតនៃការទុកដាក់ និងសោភ័ណភាពរបស់អាហារទាំងនោះផងដែរ ដោយឡែកផ្លែឈើវិញក៏មានរស់ជាតិឆ្ងាយមិនចាញ់អាហារសម្រន់ដែលមានស្រាប់ៗដែរ តែពុំងាយស្រួលក្នុងការទទួលទាន ដែលជាហេតុផលមួយពិបាកជំរុញឱ្យការទទួលទានអាហារស្រស់ៗ ឬផ្លែឈើស្រស់ៗ។​ ដើម្បីដោះស្រាយនឹងចំណោទបញ្ហានេះ ក៏ដូចជាការជំរុញឱ្យទទួលទានផ្លែឈើស្រស់ៗ ការរៀបចំទុកជាមុន ឬការចិតសម្បកជាចំណិតៗតូចៗដាក់តាមខ្លួន ឬក៏កែច្នៃផ្លែឈើឱ្យមានទំហំ និងរូបរាងដ៏គួរឱ្យទាក់ទាញ គឺជាកត្តាមួយជួយជំរុញឱ្យការទទួលទានអាហារសម្រន់មានប្រសិទ្ធភាព។

កែច្នៃសោភ័ណភាពបន្លែ ៖ មិនត្រឹមតែផ្លែឈើប៉ុណ្ណោះទេដែលមានសារជាតិផ្អែមស្រស់ សូម្បីបន្លែក៏ជាប្រភេទអាហារដែលអាចកែច្នៃទៅជាអាហារសម្រន់បានដែរ ដូចជាការ៉ុត និងត្រសក់ គ្រាន់តែចិតជាដុំតូចៗហើយច្រកក្នុងប្រអប់ នោះគឺអាចប្រើប្រាស់វាជាអាហារសម្រន់នៅពេកឃ្លានម្តងម្កាលបាន។

គ្រាប់ធញ្ញជាតិដែលមានរស់ជាតិចម្រុះ ៖ ប្រសិនបើមិនអាចជៀសរួចពីអាហារស្រាប់ៗ ឬអាហារវេចខ្ចប់នោះទេ គួជ្រើសរើសអាហារសម្រន់ណាដែលអាចកាត់បន្ថយហានិភ័យ ដូចជាគ្រាប់ធញ្ញជាតិ ហើយបើអាចជ្រើសរើសរសជាតិដែលមានលាយចម្រុះគ្នា ដើម្បីបំពេញតម្រូវការរបស់រាងកាយ។

ការពិនិត្យទៅលើគ្រឿងផ្សំ ៖ ការចំណាយពេលទៅផ្សារនៅពេលដែលមិនសូវប្រញាប់ខ្លាំង ជាឱកាសក្នុងការសង្កេតនិងអានបានលម្អិតអំពីកម្រិតជាស្ករ ឬក៏ប្រភេទគ្រឿងណាមួយដែលអាឡែកហ្ស៊ីនឹងខ្លួនឯង។ លើសពីនេះ ក៏ជាឱកាសក្នុងការជ្រើសរើសប្រភេទអាហារសម្រន់ ដែលមានជាតិប្រូតែអ៊ីនខ្ពស់ផងដែរ។ ទោះមិនអាចជ្រើសរើសផលិតផលដែលមានផ្ទុកសារធាតុដែលធ្វើឱ្យអាហារនៅបានយូរ ប៉ុន្តែនៅតែអាចជ្រើសប្រភេទគ្រឿងផ្សំដែលមានដាក់នៅក្នុងកញ្ចប់អាហារនីមួយៗ៕