ប្តេជ្ញាចិត្តដើម្បីសម្រេចរាល់គោលដៅដែលកំណត់ទុក តែងមានឧបសគ្គ និងការរំខានជាច្រើន ដូច្នេះវិន័យជាចំណែក នៃដំណោះស្រាយទាំងនេះ។ តាមរយៈគេហទំព័រ Calm បានឱ្យដឹងថា ការកំណត់វិន័យផ្ទាល់ខ្លួន គឺជាសមត្ថភាពម្យ៉ាងជួយដល់ការលត់ដំចិត្ត និងការគ្រប់គ្រងអារម្មណ៍ទៅសម្រួចកិច្ចការដែលស្របនឹងគោលដៅ ដោយសកម្មភាពទាំងនេះហាក់មិនងាយស្រួលប៉ុន្មានឡើង គឺទាមទារពេល និងវិធីសាស្រ្តក្នុងការអនុវត្ត។

វិន័យមិនមែនជាជំនាញដែលមនុស្សគ្រប់គ្នាមានវាពីកំណើតនោះទេ ប៉ុន្តែជាការតាំងចិត្តហាត់ពត់លត់ដំខ្លួនឯងឱ្យមានវិន័យ ដើម្បីបង្កភាពងាយស្រួលក្នុងការត្រួសត្រាយផ្លូវទៅកាន់គោលដៅសំខាន់ៗ ។ វិន័យជាជំនាញមួយដែលមនុស្សគ្រប់គ្នាអាចអភិវឌ្ឍន៍រៀនសូត្របន្ថែមបាន។

ដូចម្តេចដែលហៅថាមនុស្សមានវិន័យ ឬការកំណត់វិន័យផ្ទាល់ខ្លួន?

វិន័យជាសមត្ថភាពក្នុងការបញ្ចប់ភារកិច្ចអ្វីមួយឱ្យទាល់តែបាន ទោះបីជាក្នុងកាលៈទេសៈមិនមានអារម្មណ៍ចង់ទៅធ្វើវាក៏ដោយ  ហើយកិច្ចការដែលកំពុងតែធ្វើទៀតសោត ត្រូវតែជាការងារសំខាន់ ស្ថិតក្នុងផែនការដែលបានគ្រោងទុក រួមទាំងឆ្លើយតបនឹងគោលដៅក្នុងរយៈពេលវែង។ ជារួមគឺការដាក់គំនាបខ្លួនឯង ឱ្យធ្វើកិច្ចការប្រកបដោយការតាំងចិត្តខ្ពស់ និងការប្តេជ្ញាចិត្តទៅធ្វើរឿងរ៉ាវដែលមិនសូវជាចង់ធ្វើ ប៉ុន្តែសម្រេចលទ្ធផលដែលខ្លួនចង់បាន។ វិន័យមិនសំដៅដល់ការធ្វើអ្វីមួយប្រកបដោយភាពល្អឥតខ្ចោះនោះទេ ប៉ុន្តែជាការធ្វើឱ្យដំណើរការភារកិច្ចទៅមុខជាប្រចាំ ទោះបីជាជំហាននោះស្ថិតក្នុងកម្រិតតូចៗក៏ដោយ។ វិន័យ គឺជាការផ្តោតលើសកម្មភាពបន្តដំណើរឆ្ពោះទៅកាន់គោលដៅ ការមានវិធីគ្រប់គ្រងខ្លួនឯង ឬក៏ការទាញខ្លួនឯងឱ្យចេញពីស្ថានភាពដែលមិនសមប្រកបទាំងឡាយ និងជំនួសមកវិញនូវភាពរីកចម្រើនទៅមុខជាលំដាប់។

វិន័យបណ្តុះសុខុមាលភាព

គោលដៅសម្រេចបានល្អ ក៏អាស្រ័យលើការមានវិន័យខ្ពស់ចំពោះខ្លួនឯងកម្រិតណាដែរ ហើយវិន័យជាចំណែកមួយ ក្នុងការផ្លាស់ប្តូររបត់ជីវិត បណ្តុះបាននូវផ្នត់គំនិតល្អៗ និងជាថាមពលដ៏ខ្លាំងដើម្បីអភិវឌ្ឍន៍ខ្លួនឯងឱ្យប្រសើរជាងមុន ។ ការចេះលត់ដំ ដាក់វិន័យ ដាក់សម្ពាធចំពោះខ្លួនឯង ទាក់ទងនឹងការជ្រើសយកប្រភេទការងារដែលជាអាទិភាព ការប្រើប្រាស់ពេលវេលាដោះស្រាយនឹងការរំខាននានា សុទ្ធសឹងតែជាចំណែកជំរុញការសម្រេចលទ្ធផលក្នុងបរិមាណខ្ពស់ ថែមទាំងប្រើប្រាស់ពេលតិចជាងកាលដែលមិនបានកំណត់វិន័យចំពោះខ្លួនឯងឱ្យបានជាក់លាក់។

វិន័យក៏ជាចំណែកជួយឱ្យការរស់នៅមានភាពស្រស់ស្រាយ  មានសុខភាពល្អទាំងចិត្តនិងកាយ  ហើយតាមរយៈការដាក់វិន័យខ្លួនឯងឱ្យបរិភាគអាហារដែលមានគុណភាព មានជីវជាតិ ឬការកំណត់ម៉ោងគេងឱ្យបានត្រឹមត្រូវជាដើម​ បង្ហាញឱ្យឃើញថា គឺជាការបែងចែក និងគ្រប់គ្រងពេលវេលា ក៏ដូចជាជំរុញឱ្យបន្ថយភាពតានតឹងក្នុងសម័យកាលដែលពោរពេញដោយភាពមមាញឹក។

បុគ្គលមានវិន័យ ក៏ត្រូវកំណត់ពេលដើម្បីសម្រាកដែរ ទោះបីជាត្រូវការឱ្យខ្លួនឯងមានផលិតភាពជាប្រចាំក៏ដោយ ។ ការដាក់វិន័យឱ្យខ្លួនឯងមានទម្លាប់សម្រាក និងថែទាំសុខភាព មិនត្រឹមតែជះផលវិជ្ជមានទៅកាន់សុខភាពផ្លូវកាយប៉ុណ្ណោះទេ ប៉ុន្តែក៏ជាកត្តាសំខាន់ក្នុងការរក្សាស្ថានភាពផ្លូវចិត្តឱ្យមានភាពប្រសើរ និងបង្កើនបាននូវភាពអត់ធ្មត់បន្ថែម៕