យោងតាម WE Forum បានបង្ហាញថា ជំងឺវង្វេងអាចបណ្ដាលមកពីការកើតមានជំងឺមួយចំនួនដូចជា ជំងឺសរសៃឈាមបេះដូង ជំងឺលើសឈាម លើសជាតិស្ករក្នុងឈាម ការលើសទម្ងន់ បញ្ហារលាក និងភាពតានតឹងអុកស៊ីតកម្ម។ ហានិភ័យទាំងនេះធ្វើឱ្យខូចសរសៃឈាម កាត់បន្ថយលំហូរឈាម និងអុកស៊ីសែនដែលធ្វើដំណើរទៅកាន់ខួរក្បាល ហើយបង្ករឱ្យមានជំងឺវង្វេង។ យ៉ាងណាមិញ តាមរយៈការផ្លាស់ប្តូរទម្លាប់រស់នៅ យើងអាចកាត់បន្ថយហានិភ័យនៃជំងឺវង្វេងបានមួយកម្រិត។

១. ញ៉ាំត្រីខ្លាញ់ ២ ទៅ ៣ ដងក្នុងមួយសប្តាហ៍៖ ត្រីសាម៉ុន ត្រីសាឌីន(sardines) និងត្រីម៉ាកែល (mackerel) ជាអាហារដែលសម្បូរទៅដោយអាស៊ីតខ្លាញ់ប៉ូលីអាន់សាឈឺរ៉េត (polyunsaturated) Omega-3 ដែលមានឥទ្ធិពលប្រឆាំងនឹងការរលាក និងអាចកាត់បន្ថយសម្ពាធឈាមក្នុងរាងកាយ។ Omega-3s ក៏ត្រូវការចាំបាច់ផងដែរ ដើម្បីទ្រទ្រង់រចនាសម្ព័ន្ធ និងមុខងារកោសិកាខួរក្បាលមនុស្ស។ ដូច្នេះ ការទទួលទានអាហារដែលសម្បូរទៅដោយ Omega-3 បានច្រើន អាចពង្រឹងមុខងារយល់ដឹងរបស់ខួរក្បាលឱ្យមានភាពប្រសើរឡើង និងកាត់បន្ថយហានិភ័យនៃជំងឺវង្វេង។

២. បរិភោគអាហាររុក្ខជាតិ ៖ អាហាររុក្ខជាតិ ដូចជា បន្លែ ផ្លែឈើ និងគ្រាប់ធញ្ញជាតិមានសារៈសំខាន់ណាស់ សម្រាប់រាងកាយ និងខួរក្បាល ព្រោះអាហារទាំងនោះមានផ្ទុកនូវវីតាមីន និងសារធាតុរ៉ែជាច្រើន ដូចជា ប៉ូលីហ្វេណុល (polyphenols) ហ្វាវ៉ូណូអេដ (flavonoids) ការ៉ូទីនណូអេដ (carotenoids) វីតាមីន C និងវីតាមីន E។ មីក្រូសារជាតិទាំងនេះមានទាំងសារធាតុប្រឆាំងអុកស៊ីតកម្ម និងប្រឆាំងនឹងការរលាក ដែលធ្វើឱ្យដំណើរការសរសៃឈាមប្រសើរឡើង រក្សាលំនឹងជាតិស្ករក្នុងរាងកាយ និងកាត់បន្ថយហានិភ័យនៃជំងឺវង្វេង។

៣. កាត់បន្ថយការទទួលទានអាហារកែច្នៃ ៖ ខ្លាញ់ឆ្អែត កាបូអ៊ីដ្រាតចម្រាញ់ និងសាច់កែច្នៃ គឺជាប្រទេសអាហារកែច្នៃ ដែលអាចបង្ករឱ្យមានជំងឺលើសឈាម ជំងឺទឹកនោមផ្អែមប្រភេទទី ២ និងជំងឺធាត់។ ក្រៅពីផលអវិជ្ជមានទាំងនេះ អាហារកែច្នៃ មិនសម្បូរសារធាតុចិញ្ចឹមដូចជា ជាតិសរសៃរ វីតាមីន ម៉ាញេស្យូម សារធាតុ ភីតូញ៉ូទ្រាន (phytonutrient) ដែលមានលក្ខណៈសម្បត្តិប្រឆាំងនឹងការរលាក និងប្រឆាំងអុកស៊ីតកម្មនោះទេ។

៤. ធ្វើខ្លួនឱ្យសកម្ម និងចំណាយពេលខ្លះកម្សាន្ត៖ ការធ្វើសកម្មភាពរាងកាយជាប្រចាំ អាចកាត់បន្ថយការរលាក សម្ពាធឈាម និងធ្វើឱ្យប្រសើរឡើងនូវមុខងារសរសៃឈាម។ លើសពីនេះ ការធ្វើខ្លួនឱ្យសកម្មអាចជួយឱ្យរាងកាយបញ្ជូនអុកស៊ីសែនកាន់តែច្រើនទៅខួរក្បាល ធ្វើឱ្យ​ប្រសើរឡើងនូវការចងចាំ និងមុខងារយល់ដឹងរបស់ខួរក្បាល ដែលអាចកាត់បន្ថយហានិភ័យនៃជំងឺវង្វេង។ ការធ្វើសកម្មភាពនោះទៀតសោធ មិនចាំបាច់ទាល់តែការហាត់ប្រាណកម្រិតធ្ងន់នោះទេ អ្នកអាចដើរ ធ្វើការងារផ្ទះ ឬធ្វើដំណើរកម្សាន្តជាដើម។

៥. ជៀសវាងការជក់បារី៖ យោងតាមសិក្សារបស់ National Library of Medicine បានបង្ហាញថា អ្នកជក់បារីគឺមានហានិភ័យកើតជំងឺវង្វេងខ្ពស់ជាងអ្នកមិនជក់បារី៦០ភាគរយ។ ដោយសារតែការជក់បារីបង្កើនការរលាក និងភាពតានតឹងអុកស៊ីតកម្ម ដែលប៉ះពាល់ដល់រចនាសម្ព័ន្ធ និងមុខងារនៃសរសៃឈាមរបស់មនុស្ស។ ដូច្នេះប្រសិនបើអ្នកចង់ការពារខ្លួនពីជំងឺវង្វេង គួរជៀសវាងការជក់បារីជាចាំបាច់៕