ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បន្ទាប់ពីដាក់ឱ្យប្រើប្រាស់បញ្ញាសិប្បនិម្មិតនៅចុងឆ្នាំ២០២២ សិស្ស-និស្សិតមានទំនោរងាកទៅរកការប្រើ Chatbot ជាពិសេស ChatGPT កាន់តែច្រើនឡើង នៅពេលដែលពួកគេមានភាពតានតឹង ដោយសារបន្ទុកនៃការសិក្សា, ក្នុងការសិក្សាថ្មីមួយបានបង្ហាញថា និន្នាការនៃការពឹងផ្អែកលើ ChatGPT ខ្លាំងពេក បានធ្វើឱ្យសិស្សមានទម្លាប់ពន្យារពេល ចុះខ្សោយការចងចាំ និងលទ្ធផលសិក្សាធ្លាក់ចុះ។
ការស្រាវជ្រាវដែលចេញផ្សាយដោយ International Journal of Educational Technology in Higher Education បានបង្ហាញថា ទោះបីជាបច្ចេកវិទ្យាបញ្ញាសិប្បនិម្មិត ជួយឱ្យការសិក្សា និងស្រាវជ្រាវបានច្រើនក៏ដោយ ក៏វាបង្កើតឱ្យមានការបារម្ភ ក្នុងចំណោមអ្នកអប់រំដែរ ទាក់ទងនឹងការប្រើប្រាស់មិនត្រឹមត្រូវ ជាពិសេស នៅក្នុងវិស័យស្រាវជ្រាវ និងអប់រំ។
លោកសាស្ត្រាចារ្យ Muhammad Abbas នៃសាកលវិទ្យាល័យជាតិកុំព្យូទ័រ និងវិទ្យាសាស្ត្រ (the National University of Computer and Emerging Sciences) ក្នុងប្រទេសប៉ាគីស្ថាន និងសហការីរបស់លោក ដែលជាក្រុមអ្នកស្រាវជ្រាវលើកិច្ចការនេះ បានរកឃើញថា បន្ទុកការសិក្សាធ្ងន់ធ្ងរ និងសម្ពាធពេលវេលា គឺជាមូលហេតុចម្បង ដែលនាំឱ្យមានកំណើននៃការប្រើប្រាស់ ChatGPT ហើយលទ្ធផលនេះ បង្ហាញថា សិស្ស ដែលស្ថិតក្រោមសម្ពាធ និងភាពតានតឹងក្នុងការសិក្សាខ្ពស់ មានទំនោរងាកមកប្រើ AI ដើម្បីជាជំនួយ។
យ៉ាងណាក៏ដោយ បើតាមរបាយការណ៍ស្រាវជ្រាវដដែលនេះ សិស្សដែលឱ្យតម្លៃខ្ពស់លើការពង្រឹងចំណេះដឹង និងសមត្ថភាពត្រិះរិះពិចារណា មិនសូវមានទំនោរប្រើ ChatGPT នោះទេ ព្រោះពួកគេបារម្ភពីការប្រើខុសក្រមសីលធម៌ក្នុងការសិក្សា និងផលវិបាក ដែលអាចកើតឡើង ដោយសារការពឹងផ្អែកខ្លាំងពេកលើ AI ។
លើសពីនេះទៅទៀត ការសិក្សាបានរកឃើញពីផលប៉ះពាល់អវិជ្ជមានមួយចំនួនដែលកើតមានឡើង ដោយសារការប្រើប្រាស់ ChatGPT ត្រូវបានផ្សារភ្ជាប់ទៅនឹង ការពន្យារពេល និងការចុះខ្សោយនៃសមត្ថភាពចងចាំ ព្រមទាំងផលប៉ះពាល់អវិជ្ជមានលើការសិក្សា ដែលបានរកឃើញនៅក្នុងពិន្ទុជាមធ្យមរបស់សិស្ស។
ការរកឃើញទាំងនេះ បានបង្ហាញថា ខណៈពេលដែល ChatGPT ជាបច្ចេកវិទ្យាសំខាន់ក្នុងកាលៈទេសៈមួយចំនួន ការប្រើប្រាស់បច្ចេកវិទ្យានេះច្រើនពេក អាចបង្កផលប៉ះពាល់ធ្ងន់ធ្ងរលើអាកប្បកិរិយា និងលទ្ធផលសិក្សា។
លោកសាស្ត្រាចារ្យ Abbas បានលើកឡើងថា មនុស្សទូទៅ គួរតែទទួលស្គាល់ភាពមិនប្រក្រតី នៃការប្រើប្រាស់ AI លើសលប់ ព្រោះថា ខណៈពេលដែលឧបករណ៍នេះ ផ្ដល់នូវភាពងាយស្រួល និងអត្ថប្រយោជន៍ជាច្រើន វាក៏បង្កផលវិបាក ដូចជា ការពន្យារពេល ការចុះខ្សោយសមត្ថភាពចងចាំ និងលទ្ធផលនៃការសិក្សាមិនល្អផងដែរ។
លទ្ធផលស្រាវជ្រាវនេះ គឺជាការបើកទ្វា ដើម្បីសិក្សាពីផលប៉ះពាល់នៃការប្រើ ChatGPT បន្ថែមទៀត ជាពិសេសទាក់ទងនឹងលទ្ធផលសិក្សា និងសុខភាពរបស់សិស្ស។ លោក Abbas បានបញ្ជាក់ថា ការស្រាវជ្រាវនាពេលអនាគត អាចស្វែងយល់បន្ថែមពីឥទ្ធិពល នៃការពឹងផ្អែកខ្លាំងពេកលើឧបករណ៍ AI ប៉ះពាល់ដល់មុខងារយល់ដឹងរបស់ខួរក្បាល សុខភាពផ្លូវចិត្ត និងបទពិសោធន៍សិក្សាទូទៅរបស់សិស្ស-និស្សិត៕
